بۇگىن تۇسكى ۇشتەر شاماسىندا الماتىداعى «بۇقار جىراۋ تاۋەرس» تۇرعىن ءۇي كەشەنىنىڭ كۇزەتشىسى مەن بەلگىسىز ەر ادامنىڭ اراسىندا جانجال تۋىنداپ, ەر ادام كۇزەتشىگە وق اتقان. اياعىنا وق تيگەن كۇزەتشى اۋرۋحاناعا جەتكىزىلگەن.
ال وق اتقان ەر ادام سول ءۇيدىڭ 17-قاباتىنداعى ءوزىنىڭ پاتەرىنە جاسىرىنىپ, وتىزعا جۋىق وق جاۋدىرىپ, كەلگەن پوليتسەيلەرگە عيماراتتى جاراتىنىن ايتىپ, قوقان-لوققى كورسەتكەن. كەيىن تەرەزەسىنە تۇسىنىكسىز جازۋ جازىلعان قاعاز ءىلىپ قويعان. پوليتسيا تۇرعىن ءۇي كەشەنىن قورشاپ, كۇدىكتىمەن كەلىسسوز جۇرگىزۋگە تىرىسقان. بىراق كۇدىكتى ديالوگقا بارۋدان باس تارتقان. وسى سارساڭنىڭ سەبەبىنەن تۇرعىن ءۇي كەشەنىنىڭ تۇرعىندارى 6-7 ساعات بويى پاتەرلەرىنە كىرە الماعان. كۋاگەرلەردىڭ ايتۋىنشا ەر ادام بۇعان دەيىن دە كورشىلەرىنە دورەكىلىك تانىتىپ كەلگەن.
كەشكى توعىز جارىم شاماسىندا كۇدىكتى 17-قاباتتاعى ءوز ءۇيىنىڭ تەرەزەسىنەن سەكىرىپ كەتتى.
وسى جاعدايعا بايلانىستى الماتى قالالىق پوليتسيا دەپارتامەنتىنىڭ وكىلدەرى وقيعا ورنىندا شاعىن بريفينگ وتكىزدى.
پوليتسيانىڭ مالىمەتى بويىنشا ونى ەشكىم تەرەزەدەن يتەرمەگەن, ول ءوزى قولىنداعى قارۋىمەن بىرگە 17-قاباتتان سەكىرىپ كەتكەن.
«پوليتسيا قارۋ قولدانعان جوق. تەك دىبىس شىعاراتىن گراناتالار عانا قولداندى. كۇدىكتىمەن كەلىسسوز جۇرگىزۋگە 6 ساعاتتاي ۋاقىت جۇمسالعانمەن ناتيجە بەرمەدى. الدىن الا بولجام بويىنشا, كۇدىكتى جاساعان قىلمىسى ءۇشىن جاۋاپكەرشىلىكتەن قورىققان بولۋى كەرەك. قازا تاپقان ەر ادام 1963 جىلى تۋعان. پوليتسيا قىزمەتكەرلەرى مەن تۇرعىندار اراسىندا زارداپ شەككەندەر جوق», دەدى الماتى قالاسى پوليتسيا دەپارتامەنتىنىڭ رەسمي وكىلى سالتانات ازىربەك.
بۇعان دەيىن ول سەكىرگەن كەزدە «اللاھۋ اكبار» دەپ سەكىردى دەگەن اقپارات تاراعان بولاتىن. قۇزىرلى ورگان بۇل اقپاراتتىڭ شىندىققا جاناسپايتىنىن جەتكىزدى.
قازىر تەرگەۋ امالدارى باستالعان.
