ونىڭ ايتۋىنشا, جەر رەفورماسى جونىندەگى كوميسسيانىڭ جەر يەلىگىنە قاتىستى نورمالارعا بەلگىلەنگەن موراتوري مەرزىمىن 5 جىلعا ۇزارتۋى تۋرالى شەشىمى كوڭىلگە سەنىم ۇيالاتار جايت. «قازاق ءۇشىن توقىمداي جەر قىمبات» دەگەن قازاقستان پرەزيدەنتى قاسىم-جومارت توقاەۆتىڭ ءبىر اۋىز ءسوزى كوكەيدەن شىققانى دا انىق.
«القيسسا, كەڭ بايتاق قازاق جەرىنە كىم كورىنگەننىڭ كوز قۇرتى تۇسە باستاعانى كۇنى بۇگىن دەيسىز بە؟! سوناۋ جاۋگەرشىلىك زامانداردا اتا-بابالارىمىز اتتان تۇسپەي, قالماعى مەن جوڭعارى بار نە ءبىر جاۋلارمەن وسى جەر ءۇشىن الىسىپ ءوتتى ەمەس پە؟ ودان كەيىن ورىس پاتشاسىنىڭ وتارلاۋ ساياساتى دا قازاققا از قاسىرەت اكەلمەگەنى انىق. «ەدىلدى كەلىپ العانىڭ ەتەككە قولدى سالعانى, جايىقتى كەلىپ العانى, جاعاعا قولدى سالعانى, ويىلدى كەلىپ العانى, ويىنداعىسى بولعانى» دەپ مۇرات موڭكە ۇلىنىڭ جۇرەگى قارس ايىرىلا ايتقانىن دا قازاق بالاسى ۇمىتا الار ما؟ كوميسسيا مۇشەلەرى جەر يەلىگىنە قاتىستى نورمالارعا جىل سوڭىنا دەيىن بەلگىلەنگەن موراتوري مەرزىمىن 5 جىلعا ۇزارتۋدى قولداپ داۋىس بەرۋىن ورىندى دەپ ويلايمىن», دەدى جابال ەرعاليەۆ.
«مەنشىككە بايلانىستى «بولادى نە بولمايدى» دەپ شەشىم قابىلداماي, ونى بولاشاققا قالدىرۋ كەرەك دەپ ويلايمىن», دەگەن قر پرەمەر-ءمينيسترىنىڭ ورىنباسارى ەرالى توعجانوۆتىڭ وسى پىكىرى دە ءجون. ءبىز ەندىگى ارادا وسى موراتوري جاريالانعان 5 جىلدىڭ ىشىندە جەرىمىزدىڭ ەسەبىن تۇگەندەپ, تياناقتاپ, «انادا مىنشا جەر بار ەكەن» دەگەندى جاي عانا ايتپاي, كىمدە قانشا جەر بار ەكەنىن اشىق جاريالاپ وتىرساق تا بولار ەدى.
وسى رەتتە, ول ارقايسىمىز جەرگە يە بولۋدىڭ وسى زامانعى ءادىسى مەن ءتاسىلىن جەتە مەڭگەرىپ, جەرمەن ەڭبەك ەتۋ ماسەلەسىنە ەرەكشە دەن قويۋمىز قاجەت ەكەنىن ايتۋدا.
«جەردە ەڭبەك ەتسەك قانا ول جەردىڭ يەسى بولا الامىز. سونىمەن بىرگە مەملەكەت تە ەندىگى ارادا حالىقتىڭ جەردى يگەرۋ ماسەلەسىنە دە قاتىستى ءوز شەشىمدەرىن انىق تا ايقىن ايتۋعا ءتيىستى. قازاق جەرى - ءبىرتۇتاس ۇلتتىڭ جەرى. ەگەر دە ءدال بۇگىنگىدەي اۋىلدارىمىز قاڭىراپ بوس قالىپ جاتسا, جايلاۋىمىز مالسىز قالسا, حالقىمىز وسپەي جاتسا, كوبىمىز شەت ەلدە تۇرۋعا ۇمتىلىپ وتىرساق, ارينە قازاق جەرى كىم كورىنگەننىڭ كوز قۇرتى بولىپ قالا بەرەرى بار. باياعى بياعاڭنىڭ, بەيىمبەت ءمايليننىڭ «گۇلدەنسە اۋىل, گۇلدەنەمىز ءبارىمىز» دەگەن ۇرانىن قايتا كوتەرەتىن كەز كەلگەن سياقتى. سونىمەن بىرگە ەلدىڭ بىرلىگى مەن تىنىشتىعىن ساقتاۋ, تاۋەلسىزدىكتى ەڭ قاسيەتتى جەتىستىگىمىز دەپ بىلگەنىمىز دە ابزال. جەر تۇتاستىعى-تاۋەلسىزدىكتىڭ بەرىك تۇعىرى!», تولىقتىردى جابال ەرعاليەۆ.
