اتاپ وتەيىك, سىرداريا وزەنى ورتالىق اتىراۋىنىڭ وڭ جاعالاۋىن الىپ جاتقان قامىشلىباي وزەن جۇيەسىنىڭ ەكولوگيالىق جانە حالىقشارۋاشىلىقتىق ءمانى زور. سۋدىڭ از بولۋ كەزەڭى اسەرىنەن سىرداريا وزەنى باسسەينى سوڭعى 2 جىل بويى «قورەكتەنبەگەن». سول سەبەپتى كولدىڭ تەك جارتىسى عانا تولىپ, سۋ جاعالاۋدان 200-300 مەترگە الىستاپ كەتتى.
ماعزۇم مىرزاعاليەۆ پەن وبلىس اكىمى گۇلشارا ابدىقالىقوۆا جەرگىلىكتى حالىقپەن, ماماندارمەن كەزدەسىپ, سۋ پروبلەماسىنا قاتىستى ۇسىنىستاردى تىڭدادى.
«سۋ شارۋاشىلىعىنا قاتىستى جاعداي قيىن. شۇعىل شارالار قابىلداۋ قاجەت. سىرداريا وزەنىنىڭ امانوتكەل اۋىلى ماڭىندا سۋ تورابىن سالۋ ماسەلەسىن قاراۋ كەرەك. بۇل قامىشلىباي جانە اقشاتاۋ كول جۇيەلەرىندەگى سۋ دەڭگەيىن ۇستاپ, تولتىرىپ وتىرۋعا مۇمكىندىك بەرەدى», دەپ اتاپ ءوتتى مينيستر.
سونىمەن بىرگە مينيستر كوكارال بوگەتىن دە تەكسەردى. قازىرگى ۋاقىتتا بوگەتتىڭ بۇزىلعان 135 مەتر جەرىن قالىپقا كەلتىرۋ ءۇشىن جوبالىق-سمەتالىق قۇجات دايىندالىپ جاتىر, ونىڭ ءارى قاراي بۇزىلماۋىنىڭ الدىن الۋ شارالارى دا جاسالادى. جوبا كوكارال بوگەتىن ساقتاپ قالۋعا, وسىلايشا 27 ملرد.م³ كۋب سۋىمەن كىشى ارال تەڭىزىن دە ۇستاپ تۇرۋعا مۇمكىندىك بەرەدى.
«سوڭعى جىلدارى سىرداريا وزەنىندەگى سۋدىڭ ازايۋى ءوڭىردىڭ اۋىلشارۋاشىلىق سالاسىنا ايتارلىقتاي قيىندىق كەلتىرۋدە. وبلىستىڭ نەگىزگى شارۋاشىلىعى سۋدى كوپ قاجەت ەتەتىن كۇرىش ەگىسى ەكەنىن جاقسى بىلەسىزدەر. الايدا ءبىز جىلدان جىلعا كۇرىش ەگىسىنىڭ كولەمىن ازايتىپ, اۋىلشارۋاشىلىق سالاسىن ءارتاراپتاندىرۋدى باستادىق. وسىلايشا سۋدى ۇنەمدەۋدىڭ جولدارىن قاراستىرىپ جاتىرمىز», دەدى وبلىس اكىمى گۇلشارا ابدىقالىقوۆا.
