قوعامدىق تاماقتانۋ ورىندارىنا جۇمىس جانە دەمالىس كۇندەرى ساعات 09.00-دەن 22.00-گە دەيىن قىزمەت كورسەتۋگە رۇقسات بەرىلدى. عيماراتتىڭ ءىشى 50%-عا دەيىن عانا تولتىرىلۋى ءتيىس. «جاڭا قاۋلى بويىنشا وبلىستاعى بارلىق سپورتتىق ءىس-شارا توقتاتىلادى. بيليارد, بوۋلينگ, كومپيۋتەرلىك كلۋبتاردىڭ قىزمەتىنە, ويىن-ساۋىق ورتالىقتارىنداعى بالالاردىڭ ويىن الاڭشالارىنا, اتتراكتسيونداردىڭ جۇمىسىنا تىيىم سالىنادى. ال تەاترلاردا بۇعان دەيىن كورەرمەندەردىڭ تولىمدىلىعى 50%-عا دەيىن قىزمەت كورسەتىپ كەلسە, ەندى 20% تولىمدىلىقتا قىزمەت كورسەتەدى», دەيدى وبلىستىڭ باس سانيتار دارىگەرى نۇربەك نىشانوۆ.
الايدا جاڭا قاۋلى قابىلدانىپ, شەكتەۋلەر ەنگىزىلگەنىمەن تۇركىستاندىقتاردىڭ توي-جيىنى توقتار ەمەس. كۇنى كەشە سوزاق اۋداندىق پوليتسيا ءبولىمىنىڭ قىزمەتكەرلەرى كارانتين رەجىمىن جانە شەكتەۋ شارالارىن ساقتاۋ ماقساتىندا تۇراقتى تۇردە ۇيىمداستىرىلاتىن ءىس-شارا كەزىندە 100-گە جۋىق ادام جينالعان بەسىك تويدى توقتاتتى. اۋداندا جالپى جىل باسىنان بەرى كارانتين رەجىمىن بۇزۋشىلىقتىڭ 63 دايەگى تىركەلىپ, اكىمشىلىك حاتتامالار تۇزىلگەن. ونىڭ ەكەۋى جەكە كاسىپكەر, بەسەۋى وتباسىلىق مەرەكە وتكىزگەندەر. قالعانى سالتاناتتى ءىس-شارالار ۇيىمداستىرعان. بۇل ءبىر اۋدانداعى عانا جاعداي. بۇل ورايدا دارىگەرلەر ىندەتتى اۋىزدىقتاپ, اعايىن-تۋىسپەن بۇرىنعىداي ءجيى ارالاسۋعا جاقىنداتاتىن جالعىز جول – ەكپە سالۋ ەكەنىن ايتۋدا.
وڭىردە جاسالعان جاپپاي ۆاكتسينالاۋ الگوريتمىنە سايكەس, قالا جانە اۋدان تۇرعىندارى ۆاكتسينانى جەرگىلىكتى ەمحانالاردىڭ ەگۋ كابينەتتەرىندە ارنايى ءتىزىم جانە الدىن الا جازىلۋ ءتاسىلى بويىنشا سالدىرادى. ەكپە سونداي-اق جىلجىمالى پۋنكتتەردە جۇرگىزىلەدى. تۇرعىندار الدىن الا Egov ەلەكتروندى جۇيەسى ارقىلى تىركەلىپ, ەرىكتى تۇردە ۆاكتسينا جاساتا الادى.
وبلىس اكىمى ومىرزاق شوكەەۆتىڭ توراعالىعىمەن وتكەن اپپارات وتىرىسىندا قوعامدىق دەنساۋلىق باسقارماسىنىڭ باسشىسى مارات پاشيموۆ تۇركىستان قالاسىندا 10 ۆاكتسينالاۋ پۋنكتتەرى ۇيىمداستىرىلعانىن ايتتى. ۆاكتسينانى ساقتاۋ جانە تاسىمالداۋ شارتتارى ساقتالا وتىرىپ, جالپى 80 ەگۋ پۋنكتتەرىندە ەكپە سالىنادى. ولار 60 تەرموكونتەينەرمەن قامتاماسىز ەتىلگەن. قوسىمشا 50 داناسى ساتىپ الىنادى, 30 كوشپەلى ەگۋ بريگاداسى قۇرىلعان. ورتالىقتار ارنايى دايارلانعان ماماندارمەن, 500-دەن استام دارىگەر مەن ورتا بۋىن مەديتسينالىق قىزمەتكەرلەرىمەن قامتاماسىز ەتىلدى. وبلىسقا قاراستى ۆاكتسينا ساقتايتىن قويمادا كولەمى 300 ليتر بولاتىن 2 مۇزداتقىش بار. سونىمەن قاتار وبلىستىق بيۋدجەت ەسەبىنەن كولەمى 143 ليتر 20 دانا جانە كولەمى 601 ليتر 2 مۇزداتقىش ساتىپ الىنعان. ودان بولەك ۆاكتسينالاۋ جۇرگىزۋگە ارنالعان 65 پۋنكت توڭازىتقىشپەن جابدىقتالعان.
پاندەميا باستالعالى وبلىستا 600 مىڭنان استام ادام پتر تەست تاپسىرعان. سوڭعى تاۋلىكتە اۋرۋعا شالدىققان 48 ادام تىركەلدى. ءوڭىردى 185 مىڭ دوزا رەسەيلىك سپۋتنيك V جانە 752 مىڭ دوزا QazCovid-in وتاندىق ۆاكتسيناسىمەن قامتاماسىز ەتۋ جوسپارلانىپ وتىر. اقپان ايىنان باستاپ رەسەيلىك ۆاكتسينانىڭ 43 400 دوزاسى جەتكىزىلدى. بۇگىنگە دەيىن 43 مىڭنان استام ادام ۆاكتسينا قابىلدادى. ءساۋىر ايىنىڭ سوڭىنا دەيىن 72 مىڭنان استام دوزا ۆاكتسينا جەتكىزۋ جوسپارلانعان. وبلىس بويىنشا 610 ينفەكتسيالىق جانە 300 كارانتيندىك توسەكتىك ورىن ۇيىمداستىرىلعان. بۇگىنگى تاڭدا ينفەكتسيالىق توسەكتىك ورىنداردىڭ جۇكتەمەسى – 60,8%, ال كارانتيندىك توسەكتىك ورىندارىنىڭ جۇكتەمەسى – 16%.
تۇركىستان وبلىسى
