احۋال الاڭداتىپ تۇر

ءساۋىردىڭ باسىنان بەرى عانا وبلىستا 2 361 ادام قاۋىپتى ۆيرۋس جۇق­تىرىپ تىركەلگەن. سوڭعى ءبىر اپ­تا­نىڭ وزىندە اۋىرعاندار سانى 1 مىڭ­نان اسىپتى. قاۋىپتىلىگى جو­نى­نەن ال­دىڭعى قاتاردا – ورال قالاسى, بايتەرەك جانە ءبورلى اۋدان­دا­رى قالىپ وتىر. ەپيدەميالىق جاعدايدى باعالاۋ ماتريتساسىنا سايكەس اقجايىق, تەرەكتى, قازتالوۆ, شىڭعىرلاۋ اۋداندارى دا «قىزىل ايماقتا» بولسا, تاسقالا اۋدانى – «سارى», بوكەي ورداسى, جاڭاقالا جانىبەك, سىرىم جانە قاراتوبە اۋدان­دارى «جاسىل ايماقتا». وبلىس بو­يىنشا ىندەت جۇقتىرعاندار سانى سوڭ­عى تاۋلىكتە 237-گە جەتىپ, ءتورت مەك­تەپ كارانتينگە جابىلعان.

ارنايى دايىندالعان 11 ينفەك­تسيا­لىق ستاتسيوناردا كەرەۋەتتەر 62 پايىزعا تولعان.

– جىل باسىنان بەرى باتىس قا­زاق­ستان وبلىسىندا 96 ادام كو­رو­نا­ۆيرۋستان قازا تاپتى. مارقۇم­دار­دىڭ 28-ءى – قاڭتاردا, 15-ءى – اقپان ايىن­دا ومىردەن وتسە, ناۋرىزدا ىن­دەت­تەن قايتىس بولعاندار سانى 30-عا جەتتى. ال ءساۋىر ايىنىڭ 21-ىنە دەيىن عانا 23 ادام قايتتى, – دەي­دى وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ارمان قاليبەكوۆ.

كوروناۆيرۋس ەڭ الدىمەن ەگدە ادامدارعا قاۋىپتى. دەگەنمەن, ۆيرۋس جۇقتىرعان مەكتەپ وقۋشىلارى دا از ەمەس. ءوڭىردىڭ باس دارىگەرىنىڭ ايتۋىنشا, 4-توقساننىڭ باسىنان بەرى 162 وقۋشى كوروناۆيرۋس جۇقتىرعان. قازىر 4 مەكتەپ كارانتينگە جابىلسا 29 مەكتەپتەگى 66 سىنىپ, 6 با­لا­­باقشادا 8 توپ جانە ءبىر جوو-دا 2 توپتا ۋاقىتشا وفلاين وقۋ توقتاتىلدى.

– وڭىردە ەكى اپتادان استام ۋا­قىت بويى ىندەت جۇقتىرعاندار سانى تاۋلىگىنە 100 ادامنان تومەن تۇسپەي تۇر. بىزدە ەندى جۇقپالى اۋرۋلار اۋرۋ­حاناسىندا توسەكتىك ورىندار جەتىس­پەي­دى. وسىعان بايلانىستى قوسىمشا 200 ورىن دايىنداپ جاتىرمىز. ۆاك­تسي­نانى تۇرعىندار الىپ جاتىر. ۆاكتسينانىڭ تاعى ءبىر پارتياسى جا­قىن ارادا كەلەدى. سوندىقتان ەكپە العىسى كەلەتىندەردىڭ بارلىعىنا ەمحانا ارقىلى كەزەككە تىركەلۋ قاجەت. وكىنىشكە قاراي, مونيتورينگتىك توپتاردىڭ جۇمىسى كۆي-مەن كۇرەستە ۇلكەن ناتيجە بەرمەيدى. وتباسىلىق, ۇيلەنۋ تويلارى جالعاسۋدا, ال قوعامدىق كولىكتەردە ادامداردىڭ دەنى ماسكا تاقپايدى, الەۋمەتتىك قاشىقتىق تا ساقتالمايدى. قالا اكىمى مەن اۋدان اكىمدەرىنە بۇل جۇمىستى, اسىرەسە ءتۇرلى ءىس-شارالار وتەتىن كۇنى كۇشەيتۋدى تاپسىرامىن. ورال قالالىق №2 جانە №4 ەمحا­نا­لاردىڭ Call-ورتالىقتارى قوڭىراۋلارعا جاۋاپ بەرمەيتىنى بەلگىلى بولدى. بۇل پروتسەسس شۇعىل تۇردە رەتتەلۋى كەرەك. بارلىق تەلەفوندار كورسەتىلگەن ۋاقىتتا جاۋاپ بەرۋى ءتيىس. كوروناۆيرۋس ايماقتىڭ ومىرىنە قاتتى اسەر ەتتى, ەكونوميكاعا, بيزنەسكە سوققى بەردى. ەگەر وسى اپتادا كۆي ناۋقاستارىنىڭ تومەن­دەۋى تىركەلمەسە, ءبىز شارالاردى كۇشەي­تەمىز. مەملەكەتتىك ورگان­دار­عا, جەدەل شتاب مۇشەلەرىنە كوروناۆيرۋسقا قارسى كۇرەس بويىنشا جاڭا ۇسىنىستار مەن ادىستەردى ەنگىزۋ قاجەت, – دەدى كوروناۆيرۋسقا بايلانىستى وتكەن ارنايى شتاب وتىرىسىندا وبلىس اكىمى عالي ەسقاليەۆ.

اۋرۋدىڭ بەتىن قايتارۋ ءۇشىن كارانتين تالاپتارىن تولىق ساق­تاۋ­مەن بىرگە, جاپپاي ۆاكتسينا الۋ قاجەتتىگىن ماماندار قايتالاۋدان جالىعار ەمەس. قازىردىڭ وزىندە وبلىستا 23 790 ادام ۆاكتسينانىڭ ءبىرىنشى ەكپەسىن العان. حالىقتى ەكپەمەن قامتاماسىز ەتۋ ءۇشىن وبلىس ورتالىعى مەن اۋدانداردا ارنايى 30 كابينەت اشىلعان.

– وڭىرىمىزگە 23 ءساۋىر كۇنى ۆاكتسي­نا­نىڭ 9 800 دوزاسى كەلەدى. ونىڭ 4 900 دوزاسى – ءبىرىنشى كەزەڭگە, 4 900-ى – ەكىنشى مارتە ەگۋگە ارنالعان. 25 ساۋىردە تاعى 15 مىڭ دوزا, 28-ىندە تاعى 14 مىڭ دوزا كەلەدى, – دەيدى ارمان قاليبەكوۆ.

باتىس قازاقستان وبلىسى