جالپى, پاندەميا باستالعاننان بەرى شىعىس قازاقستاندا كوروناۆيرۋس ينفەكتسياسىنىڭ 24 مىڭ جاعدايى تىركەلدى. وبلىس قازىر «سارى ايماقتا». ال وسكەمەن, سەمەي قالالارى مەن اياگوز اۋدانىندا ەپيدەميالىق جاعداي ۋشىعىپ بارا جاتقاندىقتان شەكتەۋ كۇشەيدى. تەك سوڭعى اپتادا سەمەيدە 240 ناۋقاس انىقتالىپ, قالا ۆيرۋستىڭ تارالۋى جاعىنان كوش باستادى. وبلىس ورتالىعى وسكەمەندە 209 وقيعا تىركەلدى. توعىز جولدىڭ تورابىندا جاتقان اياگوز اۋدانىندا 67 ادام كوروناۆيرۋس جۇقتىرعان. ءسويتىپ, ينفەكتسيانىڭ تارالۋى بويىنشا جاعدايدى باعالاۋ ماتريتساسىنا سايكەس بۇل ەلدى مەكەندەر «قىزىل ايماققا» جاتقىزىلدى. بۇدان بىلاي ءۇش ءوڭىردىڭ تۇرعىندارى ءۇشىن تالاپ كۇشەيدى. وبلىستىڭ باس مەملەكەتتىك سانيتارلىق دارىگەرىنىڭ قولدانىستاعى قاۋلىسىنا وزگەرىستەر مەن تولىقتىرۋلار ەنگىزىلدى. وندا «قىزىل ايماقتا» اۋرۋدىڭ تارالۋىن اۋىزدىقتاۋ ءۇشىن بەلگىلى ءبىر شەكتەۋ شارالارى ەنگىزىلگەن. وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى عالىمبەك ءاليننىڭ ايتۋىنشا, وزگەرىستەر ساۋدا, قوعامدىق تاماقتانۋ, مادەنيەت نىساندارىنىڭ جۇمىسىنا قاتىستى.
– 23 ساۋىردەن باستاپ وسكەمەن, سەمەي جانە اياگوز اۋدانىندا دەمالىس كۇندەرى سۋپەرماركەتتەر, گيپەرماركەتتەر, ساۋدا ۇيلەرى مەن ساۋدا ويىن-ساۋىق ورتالىقتارىنىڭ جۇمىسىنا تىيىم سالىنادى. جۇمىس كۇندەرى ساعات 21.00-گە دەيىن عانا جۇمىس ىستەيدى. ال ازىق-ت ۇلىك جانە ازىق-ت ۇلىك ەمەس بازارلار سەنبى كۇنى ساعات 17.00-گە دەيىن جۇمىس ىستەيدى. ال جەكسەنبىدە ولاردىڭ جۇمىس ىستەۋىنە تىيىم سالىنادى. عيماراتتاردىڭ ىشىندەگى بازارلار دەمالىس كۇندەرى جابىق بولادى. قوعامدىق تاماقتانۋ ورىندارىنداعى جۇمىس ءتارتىبى ساعات 9.00-دەن 20.00-گە دەيىن وزگەردى. ال ازىق-ت ۇلىك پورتتارىنا ساعات 9.00-دەن 18.00-گە دەيىن ۋاقىت شەكتەۋىمەن جۇمىس ىستەۋگە رۇقسات ەتىلەدى. قالعان ۋاقىتتا تەك تاماق الىپ كەتۋ جانە جەتكىزۋگە رۇقسات, – دەدى ع.ءالين.
«قىزىل ايماققا» ارنالعان قاۋلى نەگىزىندە مادەني نىساندارعا, تەاتر مەن كينوتەاترلاردىڭ قىزمەتىنە تىيىم سالىندى. دەمالىس كۇندەرى ساۋنالار, جابىق سپورت نىساندارى, فيتنەس-ورتالىقتار, جاتتىعۋ زالدارى جۇمىس ىستەمەيدى. جالپى ءبىلىم بەرەتىن مەكتەپتەردە 1-دەن 5-سىنىپقا دەيىن قوسا العاندا, حالىقارالىق مەكتەپتەردە 1-دەن 7-سىنىپقا دەيىن سىنىپتارداعى بالالار سانى 25-تەن اسىرىلماي ارالاس فورماتتا وقىتۋ جۇيەسى قايتارىلادى. ءبىتىرۋ سىنىپتارى اپتاسىنا التى كۇن ارالاس فورماتتا وقىتىلادى. ارالاس فورمات, ياعني ساباقتاردىڭ 70 پايىزى مەكتەپتە, 30 پايىزى قاشىقتان وقىتىلادى. ال قالعان وقۋشىلار ونلاين رەجىمدە وقۋعا قايتا ورالادى. وسى تۇستا ايتا كەتەرلىگى, وقۋ جىلىنىڭ باسىنان باستاپ مەكتەپ جاسىنداعى بالالار اراسىندا كوروناۆيرۋس اۋرۋىنىڭ 1 723 جاعدايى تىركەلدى. 1 172 بالا قاشىقتان وقىتىلدى. دارىگەرلەردىڭ پىكىرىنشە, بالا ۇيدە وتىرعانىمەن اۋرۋدى اتا-انادان, تۋىسىنان جۇقتىرعان.
– مەكتەپ اۋماعى بلوكتارعا بولىنگەن. ولاردىڭ اراسىندا جۇرۋگە تىيىم سالىنعان. ءار سىنىپقا ءوز كابينەتى بەكىتىلدى. جۇقتىرۋدىڭ ءاربىر جاڭا جاعدايى بويىنشا جۇقتىرۋ سەبەپتەرىن, سونداي-اق بايلانىستا بولعان ادامداردى انىقتاۋ جۇمىستارى مۇقيات جۇرگىزىلەدى, – دەدى وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆا.
سانيتارلىق نورمالار ساقتالعانىمەن, ءساۋىر ايىندا 131 وقۋشى ىندەت جۇقتىرعان. باسىم بولىگى ساباقتى ءداستۇرلى تۇردە وقىپ جۇرگەن ەدى. قاتاڭ شەكتەۋ شارالارى وسكەمەن, سەمەي قالالارىنا جانە اياگوز اۋدانىنا عانا قاتىستى. وبلىستىڭ قالعان اۋداندارى مەن قالالارىنداعى نىساندار «سارى ايماقتىڭ» قاۋلىسى نەگىزىندە جۇمىستارىن جالعاستىرا بەرەدى.
دەنساۋلىق ساقتاۋ باسقارماسىنىڭ باسشىسى ەرمەك وماربەكوۆتىڭ ايتۋىنشا, وڭىردە كوروناۆيرۋس اۋرۋىنىڭ 24 مىڭعا جۋىق جاعدايى تىركەلگەن. قازىر وبلىستا 3 544 ينفەكتسيالىق, 319 رەانيماتسيالىق ورىن بار. بۇل رەتتە, ينفەكتسيالىق ستاتسيونارلارعا 265 پاتسيەنت ەمدەۋگە جاتقىزىلعان. كۆي ناۋقاستارى ءۇشىن توسەك قورىنىڭ جۇمىسپەن قامتىلۋىنىڭ جالپى پايىزى 6,9 پايىزدى قۇرادى.
– ەپيدەميالىق جاعداي ناشارلاعان جاعدايدا وبلىستا ەكى ءىس-قيمىل جوسپارى ازىرلەندى. «د» جوسپارى اياسىندا وبلىس ستاتسيونارلارىندا قوسىمشا ينفەكتسيالىق جانە رەانيماتسيالىق توسەكتەر ورنالاستىرىلادى. وسى جوسپار بويىنشا بارلىعى 6 010 ينفەكتسيالىق جانە 670 رەانيماتسيالىق ورىن بولادى. ال «چ» جوسپارى ىسكە قوسىلعان كەزدە قوسىمشا مىڭ ينفەكتسيالىق توسەكتىك ورىن اشۋ مۇمكىندىگى بار. جۇقپالى اۋرۋلار اۋرۋحانالارىندا كوروناۆيرۋسپەن كۇرەسۋگە مەديتسينالىق قىزمەتكەرلەردىڭ تولىق قۇرامى تارتىلعان جاعدايدا, جەكە قورعانىس قۇرالدارى ءبىر ايعا جەتكىلىكتى, – دەيدى ە.وماربەكوۆ.
وبلىستىڭ مەديتسينالىق ۇيىمدارى كوروناۆيرۋستى ەمدەۋگە ارنالعان قاجەتتى جابدىقتارمەن 100 پايىزعا جابدىقتالعان. ماسەلەن, وڭىردە 67 رەنتگەن-اپپاراتى, 368 ءوجت اپپاراتى, مىڭنان استام وتتەگى كونتسەنتراتورى, 18 كومپيۋتەرلىك توموگراف بار. 12 مەديتسينالىق ۇيىمدا ورتالىقتاندىرىلعان وتتەگى ماگيسترالى بەرىلىپ, وتتەگى ستانسالارى ورناتىلدى. سونىمەن قاتار وبلىستا 22 پتر زەرتحاناسى بار, ونىڭ جالپى قۋاتتىلىعى تاۋلىگىنە 14 مىڭعا جۋىق زەرتتەۋ جاساي الادى. وڭىردە كوروناۆيرۋس ينفەكتسياسىن ەمدەۋ ءۇشىن ءدارى-دارمەك قورى جەتكىلىكتى. ورىن مۇلدەم بوس بولماي قالعان كۇننىڭ وزىندە قور 2 ايعا جەتەدى.
– بىزدە 380 مىڭنان استام ىستىق تۇسىرەتىن پرەپارات, 166,5 مىڭعا جۋىق ۆيرۋسقا قارسى پرەپارات, 533,5 مىڭ انتيبيوتيك, 245 مىڭ انتيكواگۋليانت بار. «سق-فارماتسيادان» ۇنەمى قوسىمشا الامىز. سونداي-اق تۇراقتاندىرۋ قورىندا 2 ملن-نان استام ۆيرۋسقا قارسى پرەپارات بار. اتالعان كولەم 115 مىڭ پاتسيەنتتى ەمدەۋ كۋرسىنا جەتكىلىكتى, – دەپ اتاپ ءوتتى ە.وماربەكوۆ.
ىندەتتىڭ الدىن الۋ ءۇشىن حالىق جاپپاي ەكپە سالعىزىپ جاتىر. ءساۋىردىڭ باسىندا عانا ەكپە العان ازاماتتاردىڭ سانى 14,5 مىڭعا جەتكەن. بۇل كورسەتكىش كۇننەن-كۇنگە ارتىپ وتىر. وبلىس باسشىلىعىنىڭ ايتۋىنشا, ءساۋىردىڭ سوڭىنا دەيىن ەكپەنىڭ 72 مىڭ دوزاسى جەتكىزىلەدى. قازاننىڭ باسىنا دەيىن وڭىردەگى حالىق سانىنىڭ 53 پايىزىن ەگۋ جوسپارلانعان. بۇل ءۇشىن بارلىق مۇمكىندىك بار.
شىعىس قازاقستان وبلىسى
