وبلىس اكىمى ومىرزاق شوكەەۆ ساۋران اۋدانىنىڭ اكىمىنە الداعى جۇمىسىنا ساتتىلىك تىلەي وتىرىپ, ابىرويلى ەڭبەك ەتەتىنىنە سەنىم ءبىلدىردى. باستى نازار اۋداراتىن بىرقاتار ماسەلەلەرگە توقتالىپ, ناقتى تاپسىرمالار جۇكتەدى. ءوز كەزەگىندە عاني رىسبەكوۆ سەنىم ارتقان بارشا ازاماتتارعا العىس ايتىپ, جاڭادان قۇرىلعان اۋداننىڭ دامۋى مەن وركەندەۋى جولىندا بار كۇش-جىگەرىن جۇمسايتىنىن ايتتى.
عاني رىسبەكوۆ 1962 جىل 8 ساۋىردە تۇركىستان قالاسىندا تۋىلعان. 1986 جىلى تسەلينوگراد اۋىل شارۋاشىلىعى ينستيتۋتىن عالىم اگرونوم ماماندىعى, 2005 جىلى ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىن قارجىگەر ماماندىعى بويىنشا بىتىرگەن. ەڭبەك جولىن 1979 جىلى تۇركىستان قالاسىندا چاپاەۆ اتىنداعى كولحوزدا جۇمىسشى بولىپ باستاعان. 1980-2015 جىلدار ارالىعىندا تۇلكىباس جەمىس-جيدەك زاۋىتىنىڭ جۇمىسشىسى, تسەلينوگراد وبلىسى بالحاش اۋدانى ۆەسەلوۆسكي سوۆحوزىنىڭ اعا اگرونومى, تۇركىستان اۋدانى اكىمى اپپاراتى ۇيىمداستىرۋ ءبولىمىنىڭ ينسپەكتورى, مەڭگەرۋشىسى, تۇركىستان قالاسى جاستار ءىسى سپورت جانە تۋريزم باسقارماسىنىڭ باستىعى, تۇركىستان قالاسى اكىمدىگىنىڭ شارۋاشىلىق باسقارماسى مەملەكەتتىك مەكەمەسىنىڭ باستىعى, تۇركىستان قالالىق ءماسليحاتىنىڭ حاتشىسى بولعان. 2019 جىلدان بەرى كەنتاۋ قالاسىنىڭ اكىمى, قازاقستان حالقى اسسامبلەياسى تۇركىستان وبلىستىق فيليالى توراعاسىنىڭ ورىنباسارى, وبلىس اكىمى اپپاراتى باسشىسىنىڭ ورىنباسارى قىزمەتتەرىن اتقارىپ كەلدى.
سونداي-اق بۇل كۇنى ساۋران اۋداندىق ءماسليحاتى جەتىنشى شاقىرىلىمىنىڭ العاشقى سەسسياسى ءوتتى. دەپۋتاتتارعا كۋالىكتەر مەن توسبەلگىلەر تابىس ەتىلدى. ءماسليحات قۇرامىنا «Nur Otan», «اقجول» جانە «اۋىل» پارتيالارىنىڭ مۇشەلەرى كىردى. اۋداندىق ءماسليحات حاتشىسى بولىپ مەيرامبەك كۋنپەيسوۆ سايلاندى. جەرگىلىكتى ءماسليحاتتىڭ تۇراقتى كوميسسياسى قۇرىلىپ, توراعالارى سايلاندى جانە «ساۋران اۋداندىق ءماسليحات اپپاراتى» مەملەكەتتىك مەكەمەسىنىڭ قۇرىلىمى بەكىتىلدى.
