«بۇگىنگى كۇنى الەمدە كۆي-ءدىڭ 141 ميلليوننان استام جاعدايى تىركەلگەن. تاۋلىگىنە 700 مىڭنان استام جاعداي تىركەلىپ جاتىر. 3 ميلليوننان استام ادام قايتىس بولدى. ءولىم كورسەتكىشى 2,1 پايىزدى قۇراپ وتىر. ددۇ-نىڭ التى ايماعىنىڭ بەسەۋىندە اۋرۋدىڭ ءوسۋ تەندەنتسياسى بايقالادى. 21 ساۋىردەگى جاعداي بويىنشا قازاقستاندا COVID-19 وڭ ناتيجەسىمەن 294 946 ناۋقاس جانە كۆي-ءدىڭ تەرىس ناتيجەسىمەن 52 025 جاعداي تىركەلدى. كۆي-ءدىڭ وڭ ناتيجەسىمەن اۋىرعان 252 598 ناۋقاس جانە كۆي-ءدىڭ تەرىس ناتيجەسىمەن اۋىرعان 50 839 ناۋقاس ەمدەلدى», دەدى ۆيتسە-مينيستر.
ونىڭ اتاپ وتۋىنشە, ەپيدەميالىق جاعداي ماتريتساسىنا سايكەس ەلىمىز 23 كۇن بويى تاۋەكەلدىڭ جوعارى ايماعىندا, ياعني «قىزىل ايماقتا» تۇر.
«سونداي-اق تاۋەكەلى جوعارى ايماقتا 10 ءوڭىر بار. ولار: نۇر-سۇلتان, الماتى جانە شىمكەنت قالالارى, اتىراۋ, باتىس قازاقستان, اقمولا, قاراعاندى, اقتوبە, ماڭعىستاۋ جانە قىزىلوردا وبلىستارى. بۇگىنگى كۇنى تاۋەكەلدىڭ ورتاشا ايماعىندا 4 ءوڭىر, اتاپ ايتقاندا جامبىل, شىعىس قازاقستان, پاۆلودار, الماتى وبلىستارى بار. «جاسىل ايماقتا» تۇركىستان, سولتۇستىك قازاقستان جانە قوستاناي وبلىستارى ورنالاسقان», دەدى ە.قياسوۆ.
كوروناۆيرۋسپەن سىرقاتتانۋشىلىقتىڭ 58 پايىزى 3 وڭىرگە تيەسىلى. «ناۋرىز ايىمەن سالىستىرعاندا ءساۋىر ايىندا سىرقاتتانۋشىلىقتىڭ ءوسۋى اقمولا, قوستاناي, پاۆلودار جانە سولتۇستىك قازاقستان وبلىستارىن قوسپاعاندا, بارلىق وڭىردە بايقالادى. بۇل رەتتە ەل بويىنشا سىرقاتتانۋشىلىقتىڭ 58 پايىزى 3 وڭىرگە, اتاپ ايتقاندا نۇر-سۇلتان جانە الماتى قالالارى مەن الماتى وبلىسىنا تيەسىلى», دەدى ۆيتسە-مينيستر. ونىڭ اتاپ وتۋىنشە, قالىپتاسقان جاعدايدى ەسكەرە وتىرىپ, بارلىق وڭىردە الەۋمەتتىك-ەكونوميكالىق نىسانداردىڭ جۇمىسىن شەكتەۋ ولشەم شارتتارىنا سايكەس قوسىمشا شەكتەۋ شارالارى قابىلدانۋدا.
جيىن بارىسىندا ۆيتسە-مينيستر ەلىمىزدە ۆاكتسينانىڭ ءبىرىنشى كومپونەنتى 766 614 ازاماتقا سالىنعانىن تىلگە تيەك ەتتى.
«بۇگىنگى كۇنى ءبىرىنشى كومپونەنتپەن 766 614 ازامات, ەكىنشى كومپونەنتپەن 126 500 ازامات ەگىلدى. قاجەتتىلىكتى ەسكەرە وتىرىپ, ەگۋ پۋنكتتەرىنىڭ سانى تۇراقتى تۇردە ءوسىپ كەلە جاتقانىن اتاپ ايتقىم كەلەدى. بۇگىنگى كۇنى وڭىرلەردە 1 051 ەگۋ پۋنكتىندە يممۋنداۋ جۇرگىزىلۋدە. بۇدان باسقا, شالعايداعى اۋدانداردا, ۇيىمداسقان ۇجىمداردا, ادامدار كوپ جينالاتىن جەرلەردە كۆي-گە قارسى ۆاكتسيناتسيا جۇرگىزۋ ءۇشىن 303 كوشپەلى ەگۋ بريگاداسى جۇمىلدىرىلدى», دەدى ە.قياسوۆ
ونىڭ دەرەگىنشە, يممۋنداۋ ناۋقانىنا 10 مىڭنان استام مەديتسينا قىزمەتكەرى تارتىلدى.
«اۋىل تۇرعىندارى ءۇشىن ۆاكتسيناتسيانىڭ قولجەتىمدىلىگىن ارتتىرۋ ماقساتىندا ۆاكتسيناتسيا جىلجىمالى مەديتسينالىق كەشەندەردى پايدالانا وتىرىپ ۇيىمداستىرىلادى», دەدى ۆيتسە-مينيستر.
بيزنەس قوعامداستىقتىڭ باستاماسىمەن 2021 جىلدىڭ قاڭتارىنان باستاپ نۇر-سۇلتان, الماتى, قاراعاندى قالالارىندا Ashyq موبيلدىك قوسىمشاسىن ەنگىزۋ بويىنشا جوبانى جۇزەگە اسىرۋ باستالدى.
«اتالعان جوبانى كەڭەيتۋ ماقساتىندا, باس مەملەكەتتىك سانيتار دارىگەردىڭ قاۋلىسىنا سايكەس, وعان اقتوبە, كوكشەتاۋ, تاراز جانە تالدىقورعان قالالارى قوسىلدى. وسى جىلدىڭ 21 ساۋىرىندەگى جاعدايعا سايكەس, باعدارلاما فيتنەس-كلۋبتاردا, سپا-سالونداردا, ساۋنالاردا, باسسەيندەردە, بوۋلينگتەردە, بيليارد زالدارىندا, كومپيۋتەرلىك كلۋبتاردا, كونتسەرت زالدارىندا, قوعامدىق تاماقتانۋ ورىندارىندا جۇمىس ىستەپ تۇر», دەدى ۆيتسە-مينيستر. ونىڭ سوزىنشە, اتالعان جوبا وبلىسارالىق جانە قالاارالىق تۇراقتى ەمەس تۋريستىك تاسىمالداۋعا دا ەنگىزىلىپ جاتىر.
«5 مامىردان باستاپ جوباعا «جاسىل ايماقتاعى» بانكەت زالدارى, سونىمەن قاتار كاراوكە-كلۋبتار قوسىلاتىن بولادى. 26 ساۋىردەن Ashyq جوباسىن رەسپۋبليكانىڭ بارلىق وڭىرىندە تاراتۋ جوسپارلانىپ وتىر. Ashyq جوباسىنا
Info-Kazakhstan سايتى ارقىلى ءوتىنىم بەرگەن جانە قىزمەت تۇرىنە سايكەس QR-كود العان, سونىمەن قاتار اكىمدىكتەردىڭ سايتىنا ورنالاستىرىلعان, 7 كۇندىك وقۋدان وتكەن بيزنەس وكىلدەرى قاتىسا الادى», دەدى ە.قياسوۆ.
