ەلىمىزدە تۇڭعىش رەت وتكىزىلىپ جاتقان جوبانىڭ نەگىزى ماقساتى – ءوڭىر-وڭىردەگى سۋرەتشىلەر مەن اقىنداردىڭ شىعارمالارىن ناسيحاتتاۋ ءھام تانىتۋ, ولاردىڭ تۋىندىلارى ارقىلى قاراعاندى وبلىسىنىڭ تاريحي تۇلعالارىن, مادەني ەسكەرتكىشتەرىن, ساكرالدى ورىندارىن, تابيعاتىن, تاۋەلسىزدىك كەزەڭىندە ولشەۋسىز ۇلەس قوسقان تۇلعالاردىڭ ەسىمىن اسقاقتاتۋ, پوەزيا مەن سۋرەت ونەرىنىڭ ۇندەستىگىن باعالاۋ ءارى باعامداۋ, وقىرمان قاۋىمنىڭ مودەرندىك ورتاسىن قالىپتاستىرۋ بولىپ وتىر. قازاق جانە ورىس تىلىندە وتەتىن ونەر سايىسىنا قاتىسۋشى اقىندار مەن سۋرەتشىلەردىڭ جاس ەرەكشەلىگىنە شەكتەۋ قويىلمايدى. كەز كەلگەن دارىندى ۇمىتكەر بۇرىن جاريالانباعان شىعارماسىن «مادەنيەت پورتالىنا» تىركەۋ ارقىلى قاتىسا الادى.
«تاۋەلسىزدىك: ءسوز بەن سۋرەت» اتتى اقىندار مەن سۋرەتشىلەر اراسىنداعى رەسپۋبليكالىق ونلاين-بايقاۋى اياسىندا جەڭىمپاز اقىنداردىڭ ولەڭدەرى قازاق, ورىس جانە اعىلشىن تىلدەرىنە اۋدارىلىپ, سۋرەتشىلەردىڭ كارتينالارىمەن بىرگە ارنايى البوم دايىندالماق. سونداي-اق جۇلدەگەرلەردىڭ شىعارمالارىنان قۇرالعان البوم اعىلشىن جانە ورىس ءتىلدى مەملەكەتتەردىڭ ۇلتتىق كىتاپحانالارىنا جولدانادى. مۇنىمەن قوسا البوم ارنايى تۇسىرىلگەن بەينەروليكتەرگە سىلتەمە بەرىلگەن QR-كودتارمەن جارىق كورمەك.
