بۇل جولى ءبىز بىلعارى قولعاپ شەبەرلەرىنىڭ جەكپە-جەكتەرى تۋرالى ەمەس, كوزگە تۇسكەن ءبىر جويداسىز كەمشىلىك جايىندا ايتا كەتۋدى ءجون سانادىق.
كەلتسە رينگىندە سىنعا ءتۇسىپ جاتقان بوكسشىلارىمىزدىڭ جەيدەسىنەن كوك تۋىمىزدىڭ سۋرەتىن كورە المادىق. ال ارقالارىندا قازاقستاننان ەكەنىن بىلدىرەتىن «KAZ» دەگەن قىسقارعان جازۋ دا جوق ەكەن.
سوندا بۇل قالاي بولعانى؟ حالىقارالىق ارەنادا ەلىمىزدىڭ اتىنان سىنعا ءتۇسىپ جاتقان ورەندەرىمىزدىڭ سپورتتىق كيىمىنە مەملەكەتتى تانىتاتىن اتريبۋتتىق بەلگىلەر نەگە تاڭبالانباعان؟
جالپى, ەلىمىزدەگى جەتەكشى سپورتتىڭ ءتۇرى بوكسقا جىل سايىن قىرۋار قارجى بولىنەدى. سويتە تۇرا, ساپانىڭ بيىك دەڭگەيىنە شىعۋدىڭ ورنىنا, مىناداي سالعىرتتىققا جول بەرىلگەندىگى بوكسسۇيەر قاۋىمنىڭ ورىندى رەنىشىن تۋدىرۋى مۇمكىن دەگەن ويدامىز.
