وسى اپتادا «Asia Park» ساۋدا جانە ويىن-ساۋىق ورتالىعىندا ورنالاسقان «ارمان» كينوتەاترى, «ارۋجان» ساۋدا جانە ويىن-ساۋىق ورتالىعىنداعى «ARU Cinema» كينوتەاترى, «سارىارقا», «كەرۋەن» جانە «Keruen City» ساۋدا جانە ويىن-ساۋىق ورتالىقتارىنداعى «Kinopark» كينوتەارلار جەلىسى, «TALAN GALLERY» نىسانىنداعى «KERUEN CINEMA» كينوتەاترى كورەرمەنگە ءوز ەسىكتەرىن قايتا اشتى. تاعى «Movie Room», Chaplin كينوتەتارلار جەلىسى دە قوسىلدى.
«كينوتەاترلار قاجەتتى تىركەۋ جانە نۇسقاۋلاردان ءوتىپ, QR-كود الدى. ەندى سانيتار دارىگەر جازعان قاۋىپسىزدىك شارالارىن ساقتاپ, اپتا بويى جۇمىس ىستەۋگە مۇمكىندىك الدى. مىندەتتى تالاپتار قاتارىندا – كەلۋشىلەردى ءار ەكى ورىندىق سايىن شاحمات تارتىبىندە وتىرعىزۋ بار, جالپى تولىمدىلىق 30 پايىزدان اسپاۋى ءتيىس. سونىمەن قاتار ماسكا كيۋ – كەلۋشىلەر مەن پەرسونالعا قويىلعان مىندەتتى تالاپ. نىساندار ىشىندە سانيتارلىق وڭدەۋ جۇرگىزىلىپ وتىرۋى كەرەك», دەدى نۇر-سۇلتان قالاسى وڭىرلىك كاسىپكەرلەر پالاتاسى ديرەكتورىنىڭ ورىنباسارى قۋانىشبەك مۇقاش.
بۇل ورايدا «ارمان» كينوتەاترىنىڭ وكىلى كاميلا باشپانوۆا ءار جاڭاشىلدىق سەكىلدى جوبانى قولدانۋدا ءبىراز سۇراق بارىن ايتتى. دەگەنمەن كينوتەاتر قىزمەتكەرلەرى كومەگىمەن كەلۋشىلەر قوسىمشا تالاپتارىن تەز يگەرىپ جاتىر.
«اكىمشىلەرىمىز قوناقتارعا قوسىمشانى جۇكتەۋگە كومەكتەسىپ, قوسىمشاعا قالاي تىركەلىپ, قولدانۋ قاجەتتىگىن ءتۇسىندىرىپ جاتىر. كينوتەاتر ىشىندە قوسىمشانى قولدانۋعا قاتىستى نۇسقاۋلىقتار ىلىنگەن. جالپى العاندا, ادامدار جاڭاشىلدىققا تەز بەيىمدەلىپ, ساقتىق شارالارىن قولدانۋعا دايىن», دەيدى ول.
