«تسيفرلى كەنىش» گەولوگيالىق بارلاۋدان دايىن ءونىمدى شىعارۋعا دەيىنگى تۇتاس وندىرىستىك تسيكلدى اۆتوماتتاندىرۋعا مۇمكىندىك بەردى. وسىنىڭ ناتيجەسىندە كومپانيانىڭ وپەراتسيالىق شىعىندارى 15-20 پايىزعا قىسقاردى. تيىسىنشە جەدەل شەشىمدەر قابىلداۋعا, ساپانى جاقسارتۋعا, ءوندىرىس قاۋىپسىزدىگىن ارتتىرۋعا جول اشتى.
بىلتىر «التىنالماس اك» كومپانياسىنىڭ اقتوعاي التىن ءوندىرۋ فابريكاسىندا brains.app پلاتفورماسى بازاسىندا جاساندى ينتەللەكت تەحنولوگيالارىنىڭ كومەگىمەن كەندى ۇنتاقتاۋ پروتسەسىن وڭتايلاندىرۋ جۇيەسى ەنگىزىلدى. فيزيكالىق ءارى ماتەماتيكالىق مودەلدەۋ, ماشينالىق وقىتۋ مودەلدەرىن قولدانۋ وپەراتورلارعا جۇمىس ۇستىندە وڭتايلى شەشىمدەر قابىلداۋعا, تاۋەكەلدەردى ازايتۋعا, ەڭبەك قاۋىپسىزدىگىن كۇشەيتۋگە جانە وندىرىستىك پروتسەستەردى وڭتايلاندىرۋعا مۇمكىندىك بەرەدى.
جوبانى قازاقستاندىق Tech Garden مەملەكەتتىك قورى مەن بريتاندىق IntelliSense.io كومپانياسىنىڭ بىرلەسكەن كاسىپورنى رەتىندە قۇرىلعان IntelliSense-LAB تەحنولوگيالىق دامۋ ورتالىعى ىسكە اسىردى. ماقسات – يندۋستريا 4.0 تۇجىرىمداماسى شەڭبەرىندە كاسىپورىندارعا جاساندى ينتەللەكت تەحنولوگيالارىن ەنگىزۋ.
«التىنالماس اك» اق باس بيزنەس-كەڭەسشىسى دارىن مۇڭسىزباەۆتىڭ ايتۋىنشا, IntelliSense-LAB كومانداسىنىڭ الدىنا بىرنەشە مىندەت قويىلعان. اتاپ ايتقاندا, ديىرمەنگە شامادان تىس جۇك تۇسكەن كەزدە توقتاپ قالۋىن ازايتۋ, شار دەڭگەيىن ولشەۋگە بايلانىستى تۋىندايتىن كىدىرىستەردى بولدىرماۋ, بارابان توسەنىشتەرىنىڭ توزۋىن باقىلاپ, بولجاۋ مىندەتى جۇكتەلگەن. ءسويتىپ, وسى ۇدەرىستەردىڭ ءبارىن بايلانىستىرۋ ءۇشىن ديىرمەننىڭ تسيفرلى ءتۇرى قۇرىلدى. ول ناقتى ۋاقىت رەجىمىندە ۇدەرىستەردى زەردەلەپ وتىرادى.
– بۇل اقتوعاي التىن ءوندىرۋ فابريكاسىنا جاساندى ينتەللەكتىنى ەنگىزۋدىڭ ءبىر كەزەڭى عانا. الداعى ءۇش جىلدىڭ كولەمىندە باسقا دا وندىرىستىك پروتسەستەردى تسيفرلاندىرۋ كوزدەلىپ وتىر. ۇنتاقتاۋ پروتسەسىن وڭتايلاندىرۋ 2020 جىلى كومپانياعا شامامەن 1,3 ملن دوللار كولەمىندە ارتىق ءونىم شىعارۋعا مۇمكىندىك بەردى. سوندىقتان brains.app پلاتفورماسى بازاسىندا جاساندى ينتەللەكت تەحنولوگيالارىن ەنگىزۋ كومپانيا ءۇشىن ناقتى باعىت-باعدار بولۋى كەرەك, – دەيدى دارىن مۇڭسىزباەۆ.
كومپانيانىڭ IT جانە كورپوراتيۆتىك دامۋ جونىندەگى ۆيتسە-پرەزيدەنتى جانار امانجولوۆانىڭ ايتۋىنشا, جاساندى ينتەللەكت جۇيەسى جۇمىستى بارىنشا اشىق ءارى بولجامدى ەتۋگە تىرىسادى, سونداي-اق اپات كەزىندە توقتاپ قالۋ ۋاقىتىن ەداۋىر قىسقارتادى. وسىنىڭ ناتيجەسىندە كاسىپورىننىڭ ونىمدىلىگى ارتادى.
– «تسيفرلى كەنىش» جاساندى ينتەللەكت ەلەمەنتتەرى بار جۇيەنى ىسكە قوسۋدىڭ وڭ تاجىريبەسىنە اينالدى, – دەيدى ول.
