«قازپوشتا» اق تۇرعىندارعا بارىنشا ىڭعايلى قىزمەت كورسەتۋ ءۇشىن GoPost Home جوباسىن قولعا الىپ وتىر. ونىڭ اياسىندا كليەنتتەر سالەمدەمەلەر سۋپەرماركەتىنە بارماي-اق, سالەمدەمەلەر مەن ۇساق پاكەتتەردىڭ ۇيگە دەيىن جەتكىزىلۋىنە تاپسىرىس بەرەدى. بۇگىندە GoPost Home قىزمەتى قاناتقاقتى جوبا رەتىندە نۇر-سۇلتان جانە الماتى قالالارىندا جۇزەگە اسىرىلۋدا. ونىڭ ىشىندە بۇل قىزمەت ەلوردادا ورتالىق وپەراتسيالىق ۋچاسكەدە جانە №20 قالالىق پوشتا بايلانىسى بولىمشەسىندە, ال الماتىدا ورتالىق وپەراتسيالىق ۋچاسكەدە قولجەتىمدى.
ءبىر مەكەنجايعا 5 سالەمدەمەگە تاپسىرىس بەرۋگە مۇمكىندىك بار. بۇل جاعدايدا ءبىرىنشىسىن جەتكىزۋ قۇنى 1 مىڭ تەڭگەنى قۇراسا, قالعان سالەمدەمەلەردىڭ ارقايسىسى ءۇشىن تەك 200 تەڭگە تولەۋ قاجەت. قازىرگى تاڭدا بۇل قىزمەت Telegram-بوت @KazPostBot ارقىلى قولجەتىمدى. كليەنتتىڭ سالەمدەمەسى سۋپەرماركەتكە كەلگەن كەزدە وعان اتالعان مەسسەندجەر ارقىلى حابارلاما جولدانادى. ەگەر ونىڭ تاراپىنان ساعات 16:00-گە دەيىن ۇيگە دەيىن جەتكىزۋ راستالسا, سالەمدەمە سول كۇنى قولعا تاپسىرىلادى. الداعى ۋاقىتتا GoPost Home قىزمەتى WhatsApp جانە 1499 بايلانىس ورتالىعى ارقىلى قولجەتىمدى بولادى.
«قازپوشتا» اق كەلەشەكتە جاڭا قىزمەتتىڭ اياسىن كەڭەيتىپ, ەلىمىزدىڭ بارلىق ءوڭىرىن قامتۋدى جوسپارلاپ وتىر. سول ارقىلى كەلەشەكتە تىركەلەتىن پوشتا جونەلتىلىمدەرىن ۇيگە دەيىن جەتكىزۋ قىزمەتى ءوڭىر تۇرعىندارى ءۇشىن قولجەتىمدى بولماق. بۇگىندە «قازپوشتا» اق-عا قاراستى سالەمدەمەلەر سۋپەرماركەتىنىڭ سانى 237-گە جەتتى. ونىڭ 127-ءسى قالالاردا, قالعان 110-ى اۋداندار مەن اۋىلداردا ورنالاسقان.
