قىلقالامعا قۇشتار قۇراقتاي ورەندەردى ءبىر الاڭدا قاۋىشتىرعان كورمە الماتى قالاسىنداعى 20-دان استام بالالار شىعارماشىلىعىن دامىتۋ جانە بەينەلەۋ ونەر ورتالىقتارى شاكىرتتەرىنىڭ سۋرەت جانە ساندىك-قولدانبالى ونەر جانرىنداعى تاڭداۋلى جۇمىستارىن قامتىعان.
اتالعان شارا ءجاسوسپىرىم سۋرەتشىلەرگە ەلىمىزدىڭ تاريحى مەن مادەنيەتىن تانىستىرۋعا, تۋعان جەرىنىڭ ۇلتتىق قۇندىلىقتارى, داستۇرلەرى مەن سۇلۋلىعى تۋرالى تۇسىنىكتەرىن كەڭەيتۋگە جول اشىپ, ونەر الەمىنە دەگەن سۇيىسپەنشىلىكتەرىن وياتقانى داۋسىز. جاس سۋرەتشىلەر ءوز جۇمىستارىندا قورشاعان الەمگە, ەلدىڭ وتكەنى, بۇگىنى جانە بولاشاعى تۋرالى ءوز كوزقاراستارىن بىلدىرۋگە تىرىسقان. ولار قازاقستاننىڭ تاريحى, مادەنيەتى, تابيعاتىمەن بايلانىستى ءتۇرلى اسپەكتىلەر مەن سيۋجەتتەردى بەينەلەيدى. كوركەم پەيزاجداردا ادام پورترەتتەرى جانە ناتيۋرمورتتار, قالا كوشەلەرى مەن تاۋەلسىز مەملەكەتىمىزدىڭ رامىزدەرى بالا قيالىن قاناتتاندىرا تۇسكەن.
ونەرگە ىڭكار وسكىندەردىڭ يدەيالارى مەن شىعارماشىلىق نيەتتەرىن كورسەتەتىن اۆتورلىق تۋىندىلار ءارتۇرلى تەحنيكادا ورىندالعان. ايتالىق, كورمە قابىرعاسىنان كەسكىندەمە, اكۆارەل, ساندىك-قولدانبالى ونەر – گوبەلەندەر, كەستە تىگۋ, اپپليكاتسيالار, قۋىرشاقتار, ماسكالار سىندى ءتۇرلى جانرداعى تۋىندىلاردى كەزدەستىرۋگە بولادى. سۋرەتتەن بولەك, شەبەرلەر گراۆيۋرالاردى, پلاستيليننەن, سازدان, گيپستەن جاسالعان مۇسىندىك كومپوزيتسيالاردى, سۋرەتپەن بەزەندىرىلگەن كەراميكادان, ماتادان, اعاشتان جاسالعان بۇيىمداردى بەدەرلەگەن.
– ونەر ورتالىقتارىنىڭ ۇستازدارى بالالاردىڭ شىعارماشىلىق داعدىلارىن دامىتۋعا زور ۇلەس قوسقاندىعى مۇندا كەلگەن ورەندەردىڭ قابىلەتىنەن بايقالىپ تۇر. بالالاردىڭ قولتاڭباسى وتە كوركەم, اشىق, ەرەكشەلىگى مەن ءار الۋان بولعاندىعى سونداي, قورشاعان الەمگە دەگەن قۋانىشتى كوزقاراستارى مەن قيالدارى, ويلارى تاڭعالدىرادى. اتالعان شارانى بالالاردىڭ تاۋەلسىزدىك تويىنا تارتۋى دەپ قابىلدادىق, – دەيدى كورمە جەتەكشىسى گۇلمايرا احاتوۆا.
200-دەن استام ونەر تۋىندىسىن قامتىعان ايرىقشا كورمە ءساۋىر ايىنىڭ سوڭىنا دەيىن جالعاسادى.
الماتى
