بۇل تۋرالى ساۋدا جانە ينتەگراتسيا مينيسترلىگىنىڭ ءباسپاسوز قىزمەتى حابارلادى. جاۋاپتى ۆەدومستۆونىڭ بيرجالىق ساۋدا باسقارماسىنىڭ باسشىسى ماقسات تۇرسىنبەكوۆتىڭ ايتۋىنشا, زاڭ جوباسى نەگىزگى ءۇش باعىتقا بايلانىستى بيرجالاردى دامىتۋدى كوزدەيدى.
«بىرىنشىدەن, تاۋار بيرجالارىنىڭ اشىقتىعىنا قويىلاتىن تالاپتار كۇشەيتىلەدى. ەكىنشىدەن, جاعدايدى وزگەرتۋگە جانە شىن مانىندە باسەكەلەستىك ورتا مەن بيرجالىق ساۋدانى دامىتۋ ءۇشىن جاڭا جاعدايلار جاساۋعا ايتارلىقتاي قادام جاسالدى. ۇشىنشىدەن, بيرجالىق ساۋدا كولەمىن ۇلعايتۋ مىندەتى قويىلىپ وتىر.
ەگەر دە انىقتاپ ايتساق, ءبىرىنشى باعىتقا سايكەس, جارعىلىق كاپيتالدى ۇلعايتۋ, بيرجالىق ساۋدانىڭ بىرىڭعاي قاعيدالارىن بەكىتۋ, تاۋار بيرجالارىنىڭ ەكى دەڭگەيلى جۇيەسىن ەنگىزۋ, تاۋار بيرجالارى مەن بيرجالىق ساۋداعا قاتىسۋشىلاردىڭ قارجىلىق تۇراقتىلىعى بويىنشا تالاپتاردى بەلگىلەۋ كوزدەلگەن», دەدى م.تۇرسىنبەكوۆ.
ەكىنشى باعىت اياسىندا دا بىرقاتار شارا قاراستىرىلىپتى. مىسالى, بيرجالىق بروكەرلەر مەن تاۋار ديلەرلەرىنە بىرنەشە تاۋار بيرجاسىنا قاتىسۋعا تىيىم سالۋدى ءبىر مەزگىلدە الىپ تاستاپ, بىرىڭعاي اككرەديتتەۋ تالابى بەلگىلەنەدى. سونداي-اق, ازاماتتارعا دەلدالسىز ءبىر رەت كەلەتىن كليەنت رەتىندە بيرجالىق ساۋدا-ساتتىققا قاتىسۋعا مۇمكىندىك بەرەتىن تەتىكتى ەنگىزۋ قاراستىرىلىپ وتىر. تاۋارلار مەن ساۋدا-ساتتىقتى سەكتسيالار بويىنشا ءبولۋ ەسكەرىلەدى. بۇدان باسقا, ۋاكىلەتتى ورگانعا ءبىر ساۋدا سەسسياسىندا لوتتىڭ ەڭ جوعارى مولشەرىن بەلگىلەۋ بويىنشا وكىلەتتىكتەر بەرىلەدى.
ء«ۇشىنشى باعىت – ىسكە اسىرىلعان مامىلەلەر كولەمى مەن سەكتسيا تۇرىنە بايلانىستى سارالانعان مولشەرلەمەنى ورناتۋعا مۇمكىندىك بەرىپ, بيرجادا كەلىسىمدەردى جاساۋ مەن شارتتاردى ورىنداۋعا قاتىستى ساقتاندىرۋ قۇرالى ەنگىزىلەدى», دەدى بيرجالىق ساۋدا باسقارماسىنىڭ باسشىسى.
زاڭناماعا وسى تولىقتىرۋلاردى ەنگىزۋ ارقىلى بيرجا ساۋداسىنىڭ كولەمى ارتىپ, ونىڭ اشىقتىعى قامتاماسىز ەتىلەدى دەگەن سەنىمدە زاڭ جوباسىنىڭ اۆتورلارى. «ماڭىزدى ارتىقشىلىقتاردىڭ ءبىرى – نارىقتىڭ تالابىنا ساي باعالار بەلگىلەنىپ, جاڭا ارىپتەستەردى تارتۋعا مۇمكىندىك بەرىلەدى. بۇل ءوز كەزەگىندە باسەكەلەستىكتىڭ ارتۋىنا اسەر ەتەدى. تۇراقتى بيرجالىق سالانى قالىپتاستىرۋداعى تاعى ءبىر ماڭىزدى ماسەلە – بيرجالىق كەلىسىمشارتتاردىڭ اشىقتىعى. زاڭ جوباسىندا بۇل دا ەسكەرىلگەن», دەدى م.تۇرسىنبەكوۆ.
بيىل اقپاندا اتالعان زاڭ جوباسى ۇكىمەت باسشىسىنىڭ كەڭسەسىنە ەنگىزىلدى. ەندى رەفورمالىق قۇجات پارلامەنتتىڭ قوس پالاتاسىندا قارالاتىن كۇن دە الىس ەمەس.
