قارجى • 17 ءساۋىر، 2021

«وڭالتىلدى» دەگەن مارتەبەنى 1 419 مىڭ قازاقستاندىق ازامات الدى

29 رەت كورسەتىلدى

9 ساۋىردەن باستاپ قازاقستاندا قارجى نارىعىن رەتتەۋ جانە دامىتۋ اگەنتتىگى ەنگىزگەن قارىز الۋشىلاردى وڭالتۋدىڭ جاڭا تەتىگى جۇمىس ىستەيدى.  بۇگىنگى كۇنى كرەديتتەر بويىنشا «وڭالتىلدى» دەگەن مارتەبەنى اۆتوماتتى تۇردە 1 419 مىڭ ازامات الدى، دەپ جازادى Egemen.kz.

قازاقستاندا ازاماتتاردىڭ كەيبىر ساناتىنىڭ تەرىس كرەديتتىك تاريحى بار، ياعني ولاردىڭ قارىزدار بويىنشا تولەم مەرزىمى 90 كۇننەن استام كەشىكتىرىلگەن. بۇل اقپارات كرەديتتىك بيۋرو جۇيەسىندە كورسەتىلەدى. بۇرىن تولەم مەرزىمىن كەشىكتىرۋ بولعاندىقتان مۇنداي ازاماتتار بانكتەردە جانە مقۇ-دا جاڭا قارىزدار الۋ كەزىندە قيىندىقتارعا ۇشىراۋى مۇمكىن.

«قارجىلىق كورسەتىلەتىن قىزمەتتەرگە قولجەتىمدىلىكتى قالپىنا كەلتىرۋ ماقساتىندا اگەنتتىك تەرىس كرەديتتىك تاريحى بار جانە پروبلەمالىق بەرەشەكتى قايتا قۇرىلىمداۋعا مۇقتاج قارىز الۋشىلاردى وڭالتۋ تەتىگىن ەنگىزدى. وڭالتۋ تەتىگى قارىز الۋشىعا كرەديتتىك بيۋرو جۇيەسىندە «وڭالتىلدى» دەگەن مارتەبەنى بەرۋدى كوزدەيدى. بۇل مارتەبە ازاماتتىڭ بانكتەر جانە باسقا كرەديتورلار الدىندا ءوز مىندەتتەمەلەرىن ادال ورىنداۋىنىڭ راستاۋى بولىپ تابىلادى»،  دەپ اتاپ ءوتتى اگەنتتىكتىڭ قارجى ۇيىمدارىنىڭ ءادىسناماسى جانە پرۋدەنتسيالىق رەتتەۋ دەپارتامەنتى ديرەكتورىنىڭ ورىنباسارى ەرلان سەيىلوۆ.

مارتەبەنى الۋ ءۇشىن قانداي دا ءبىر قۇجاتتار تالاپ ەتىلمەيدى، ءراسىمدى كرەديتتىك بيۋرو مەرزىمى وتكەن بورىشتى وتەگەننەن كەيىن 12 اي وتكەن سوڭ جانە وسى كەزەڭدە وزگە دە مەرزىمى وتكەن بەرەشەك بولماعان كەزدە جۇرگىزەدى.

ەگەر قارىز الۋشىنىڭ مەرزىمى وتكەن بەرەشەگى تولىعىمەن ەمەس، ءىشىنارا وتەلسە، بانكتەر وڭالتۋ جوسپارىن بارىنشا ىڭعايلى وتەۋ كەستەسىمەن كەيىننەن جاساۋ ءۇشىن ءاربىر وسىنداي قارىز الۋشىمەن ونىڭ تولەم جاساۋ قابىلەتتىلىگىن باعالاۋ بويىنشا جەكە جۇمىس جۇرگىزەدى.

«تيىسىنشە، مۇنداي قارىز الۋشىلاردىڭ «وڭالتۋ» مارتەبەسىن الۋى وڭالتۋ جوسپارىن ورىنداعان كەزدە جانە سوڭعى 12 ايدا وزگە دە مەرزىمى وتكەن بەرەشەك بولماعان كەزدە مۇمكىن بولادى. مارتەبەنى تەكسەرۋ ءۇشىن ازاماتتار مەملەكەتتىك كرەديتتىك بيۋروعا ءوتىنىش جاساۋىنا بولادى. بۇل قىزمەت تەگىن كورسەتىلەدى»،  دەپ قورىتىندىلادى ەرلان سەيىلوۆ.

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار