اۋعانستان, قازاقستان, قىرعىزستان, تاجىكستان, تۇرىكمەنستان مەن وزبەكستان ىسكەر ايەلدەر قاۋىمداستىقتارىنىڭ, ۇكىمەتتىك ەمەس ۇيىمداردىڭ, ەلەكتروندى كوممەرتسيالىق الاڭدار جانە ساۋدا-ونەركاسىپ پالاتاسىنىڭ جۇزدەن استام وكىلى قاتىسقان ۆەبيناردا باسەكەگە قابىلەتتىلىكتى ارتتىرۋ, ساۋدا ءىسىن جولعا قويۋ مەن جۇمىسپەن قامتاماسىز ەتۋ ماسەلەلەرى كوتەرىلدى.
ۇلتتىق كيىم, كىلەم توقۋ جانە قولدان جاسالعان بۇيىمدار وندىرىسىندەگى مادەني مۇرالاردى زاماناۋي ماركەتينگتىك بىلىممەن, ەلەكتروندى ساۋدا مۇمكىندىكتەرىمەن جانە ونلاين-ساتۋ پلاتفورمالارىمەن بىرىكتىرەتىن ترەنينگ بارىسىندا بيزنەس نارىعىندا تاجىريبەسى بار امەريكالىق قولونەرشىلەر دە ءوز تاجىريبەلەرىمەن ءبولىستى.
سوڭعى جيىرما بەس جىل ىشىندە قازاقستان قولونەرشىلەر وداعىنىڭ ەلىمىزدىڭ تۇكپىر-تۇكپىرىندەگى سەگىز جۇزدەي مۇشەسى ءداستۇرلى تەحنيكالاردى پايدالانۋ ارقىلى ۇلتتىق بۇيىمداردىڭ ناقىشىن كەلتىرىپ ءجۇر. اتالعان وداقتىڭ توراعاسى ايجان بەكقۇلوۆانىڭ ايتۋىنشا, جاڭا بولمىسقا بەيىمدەلۋ ءۇشىن قولونەرشى ايەلدەردىڭ ىقپالداستىعى اسا قاجەت. مىسالى, الماتىدا پاندەمياعا بايلانىستى جۇمىسى باياۋلاپ قالعان قولونەرشىلەر جەرگىلىكتى تۇتىنۋشىلار ءۇشىن بەتپەردەلەر جانە باسقا قورعانىس زاتتارىن تىگە باستاعان. ەندى ولار تسيفرلى پلاتفورمالاردى پايدالانۋ ارقىلى ءوز وڭىرلەرىنەن تىس نارىققا شىعار جول ىزدەستىرۋدە.
USAID الداعى ۋاقىتتا ورتالىق ازيا مەن اۋعانستاندا قولدان جاسالعان ەرەكشە بۇيىمدار تۋرالى اقپاراتتى كەڭەيتۋ ءۇشىن ەلەكتروندى كاتالوگ ازىرلەيتىن بولادى. ۇيىمداستىرۋشىلاردىڭ پىكىرىنشە, بۇل جاڭا بيزنەس مودەلدەر مەن ەلەكتروندى پلاتفورمالار ارقىلى نارىققا قولجەتىمدىلىككە ىقپال ەتىپ, ءداستۇردى ساقتاۋعا, ءونىمنىڭ ساپاسىن جاقسارتۋعا جانە يننوۆاتسيالىق تەحنولوگيالار ارقىلى قورشاعان ورتاعا زيان كەلتىرۋ اسەرىن ازايتۋعا مۇمكىندىك بەرۋمەن قاتار, ايماقتاعى قولونەرشى ايەلدەردىڭ ۇزاق مەرزىمدى ەكونوميكالىق تۇراقتىلىعىنا ىقپال ەتەتىن بولادى.
