ءبىر مەزەتتە الماتى وبلىسى, ءۇشارال قالاسىنداعى جانە شىعىس قازاقستان وبلىسى ءۇرجار اۋىلىنداعى ەكى اۋەجايدىڭ ۇشۋ-قونۋ جولاقتارىن (ۇقج) قايتا جوندەۋ ماسەلەسىن قر پرەمەر-ءمينيسترىنىڭ ءبىرىنشى ورىنباسارى ءاليحان سمايىلوۆتىڭ توراعالىعىمەن وتكەن كاسىپكەرلىك سۋبەكتىلەرىنىڭ پروبلەمالىق ماسەلەلەرىن قاراۋ جونىندەگى اپتا سايىنعى جيىنعا قاتىسۋشىلار ەگجەي-تەگجەيلى تالقىلادى.
جوندەۋ جۇمىستارى الاكول كولىنىڭ جاعالاۋىنداعى جازعى تۋريستىك ماۋسىمنىڭ باسىندا باستالادى. وسىعان بايلانىستى ءا. سمايىلوۆ الداعى جازعى تۋريستىك ماۋسىمعا كەدەرگى كەلتىرمەس ءۇشىن جوندەۋ جۇمىستارىن كەزەڭ-كەزەڭىمەن جۇرگىزىپ, تۋريستەردى قىزىقتىراتىن جەرلەرگە بالاما كولىك بايلانىستارىن كوبەيتۋدى تاپسىردى.
اتاپ ايتقاندا, يندۋستريا جانە ينفراقۇرىلىمدىق دامۋ مينيسترلىگى الماتى جانە نۇر-سۇلتان قالالارىنان الاكول باعىتىندا پويىزدار مەن قوسىمشا تىركەمە ۆاگوندار سانىن كوبەيتۋ بويىنشا جۇمىستار جۇرگىزۋدە. بيىل 17 ماۋسىمىنان باستاپ حالىقتىڭ سۇرانىسىن قاناعاتتاندىرۋ ءۇشىن الماتى-دوستىق باعىتىندا اپتاسىنا 3 رەت جاڭا جولاۋشىلار پويىزىن شىعارۋ ۇسىنىلادى.
سونداي-اق جازدا نۇر-سۇلتان قالاسىنان قاتىنايتىن جولاۋشىلار پويىزدارىنىڭ قوزعالىس مولشەرى ۇلعايتىلادى. الماتى جانە شىعىس قازاقستان وبلىستارىنىڭ اكىمدىكتەرى جاز ماۋسىمىنا دايىندىق بويىنشا اتقارىلىپ جاتقان جۇمىستار تۋرالى ەسەپ بەردى. وسىلايشا, «تالدىقورعان-ءۇشارال» (313,5 كم) جانە ء«ۇشارال-دوستىق» (180 كم) رەسپۋبليكالىق ماڭىزى بار اۆتوموبيل جولدارىنىڭ 493,5 شاقىرىمىن قايتا جاڭارتۋ جانە سالۋ جۇمىستارى جالعاسۋدا. بۇل جوبالاردىڭ اياقتالۋى كول جاعالاۋىنا تۋريستەر اعىنىن ەداۋىر ارتتىرادى. الاكولدە قازىردىڭ وزىندە اۋە جانە تەمىرجول بايلانىسىنىڭ ارقاسىندا ءبىر ماۋسىمدا 1 ملن استام ادام دەمالادى.
كوكتەمگى ەگىسكە نەسيە بەرۋ ماسەلەسى بويىنشا فەرمەرلەردى قارجىلاندىرۋ ناۋرىز ايىنان باستاپ جۇرگىزىلۋدە, ال وتەۋ مەرزىمى قاراشا ايىندا دەپ بەلگىلەندى. تابيعي-كليماتتىق جاعدايلاردى ەسكەرە وتىرىپ, وڭتۇستىك وبلىستاردىڭ فەرمەرلەرىنە جەلتوقسان-قاڭتار ايلارىندا كوكتەمگى ەگىس جۇمىستارىن (تۇقىم, جانار-جاعارماي, گەربيتسيدتەر, قوسالقى بولشەكتەر جانە ت.ب. ساتىپ الۋ) جۇرگىزۋ ءۇشىن قاراجات قاجەت. پرەمەر-ءمينيستردىڭ ءبىرىنشى ورىنباسارى كوكتەمگى دالا جانە ءونىمدى جيناۋ جۇمىستارىنا قاراجات ءبولۋ ماسەلەسىن قاڭتار-اقپان ايلارىندا پىسىقتاۋدى تاپسىردى.
