ادەبيەت • 14 ءساۋىر، 2021

وقۋشىعا كوركەم ادەبيەتتى وقىتۋدىڭ جولى قانداي؟

636 رەت كورسەتىلدى

بۇگىن ء«بىلىمنىڭ التىن كوپىرى» اتتى ونلاين رەجيمدە وتكەن رەسپۋبليكالىق تەلەكوپىر بارىسىندا «وقۋعا قۇشتار مەكتەپ» جوباسى تالقىلانىپ، مەكتەپ جاسىنداعى بالالاردىڭ وقۋىنا ارنالعان كوركەم ادەبيەتتىڭ مينيمالدى ءتىزىمىنىڭ جاساقتالۋ بارىسى تانىستىرىلدى، دەپ حابارلايدى Egemen.kz

ءبىلىم الۋشىلار اراسىندا كىتاپ وقۋ مادەنيەتىن قالىپتاستىرىپ، الەم ادەبيەتىنىڭ قازاق تىلىندە قولجەتىمدى بولۋىنا جاعداي جاساۋ ءۇشىن ءبىلىم جانە عىلىم مينيسترلىگى وسى جوبانى بەكىتىپ وتىر.

ءىس-شاراعا «وقۋلىق» رعپو ديرەكتورى ەلدوس نۇرلانوۆ، بعم مەكتەپكە دەيىنگى ورتا ءبىلىم بەرۋ كوميتەتىنىڭ باس ساراپشىسى مادينا ەگىنباەۆا، قر ۇلتتىق اكادەميالىق كىتاپحانا ءبولىمىنىڭ باسشىسى ساۋلەش نازيروۆا جانە ءار ايماق مۇعالىمدەرى مەن كىتاپحاناشىلارى قاتىستى.

مەكتەپ وقشىلارىنا ارنالعان كوركەم ادەبيەت ءتىزىمىن جاساقتاۋدىڭ ماقساتى – ءار وقۋشى مەن اتا-اناعا ادەبيەت ءالىمى بويىنشا باعىت بەرۋ، سول ارقىلى قازاقستان ازاماتىنا قاجەتتى الەۋمەتتىك ماڭىزدى قاسيەتتەر مەن قۇزىرەتتىلىكتى دارىتۋ.

تىزىمگە ەلىمىزدىڭ ۇزدىك كلاسسيكتەرىنىڭ شىعارمالارى، قازاق تىلىنە اۋدارىلعان الەم ادەبيەتى جاۋھارلارى، سونىمەن بىرگە قازىرگى زامان اقىن-جازۋشىلارىنىڭ 250 كىتابى ەنگەن.

جيىن بارىسىندا «وقۋلىق» رعپو ديرەكتورى ەلدوس بولاتحان ۇلى ءتىزىم جاساقتاۋدىڭ بارىسىنا، كوركەم ادەبيەتتى وقۋدىڭ ماڭىزىنا توقتالدى.

– ءماتىندى وقۋ جانە ءتۇسىنۋ ساپاسىن باعالايتىن PIRLS–2016 حالىقارالىق زەرتتەۋىنىڭ ناتيجەسى بويىنشا قازاقستاندىق وقۋشىلار باستاۋىش سىنىپتان باستاپ ادەبيتكە قاراعاندا، اقپاراتتىق ءماتىندى كوبىرەك وقيتىنى انىقتالدى. ال الەمدىك تاجىريبەنى الساق، وندا جەتكىنشەكتەر اۋەلى كوركەم ادەبيەتتى، كەيىن اقپاراتتىق ماتىندەردى وقيدى. بۇل ولقىلىقتىڭ ورنىن تولتىرۋ ءۇشىن جاسوسپىرىمدەر اراسىندا كوركەم ادەبيەتتى كەڭىنەن ناسيحاتتاۋ جۇمىسى جولعا قويىلدى. بۇدان بولەك، كوركەم ادەبيەت ءتىزىمى «تولىق ادام» كونتسەپتسياسىن جۇزەگە اسىراتىن ماڭىزدى يدەولوگيالىق قۇرالدىڭ ءبىرى بولىپ تابىلادى، – دەدى ە.نۇرلانوۆ.

ونىڭ ايتۋىنشا، 250 اتالىمنان تۇراتىن ءتىزىمدى جاساقتاۋ بارىسىندا «وقۋلىق» رعپو 2000 جىلدان بەرگى ۇلتتىق كىتاپ پالاتاسىندا (ۇكپ) تىركەلگەن بۇكىل ادەبيەتتىڭ ءتىزىمىن الىپ، ونىڭ ىشىنەن كوركەم ادەبيەتكە جاتپايتىندارىن الىپ تاستاپ، كىتاپحانالىق جانە باسپالىق جۇيەگە ساي سۇرىپتاعان. كوركەم ادەبيەتتى شىعاراتىن باسپالارعا سۇراتۋ جولداپ، قوردا بار كىتاپتار جايلى مالىمەتتى جيناستىرىپ، ورتاق ءتىزىمدى قۇراستىرعان. سونىمەن قاتار ءتىزىم جاساقتاۋداعى حالىقارالىق جانە وتاندىق تاجىريبەنى زەرتتەگەن. اتالعان ءتىزىم قر ۇلتتىق اكادەميالىق كىتاپحانا ماماندارىمەن بىرنەشە رەت تالقىلانعان. قازاق ءتىلى مەن ادەبيەت ءپانى مۇعالىمدەرىنىڭ، مەكتەپ كىتاپحاناشىلارىنىڭ، بۇقارالىق كىتاپحانا ماماندارىنىڭ، ادەبيەتتانۋشىلار مەن جازۋشىلاردىڭ پىكىرى ەسكەرىلگەن.

ايتا كەتەرلىگى، كوركەم ادەبيەتتى وقۋ ارقىلى ءتۇرلى قاسيەت پەن داعدى قالىپتاسادى. ماسەلەن، كەيىپكەردىڭ جان-دۇنيەسىن ءتۇسىنۋ، جاناشىرلىق تانىتۋ، جازۋشى الەمىن ءتۇرلى تاريحي جانە گەوگرافيالىق تۇرعىدا قابىلداۋ ارقىلى كۇيزەلىس پەن قايعىنى سەزىنىپ، رۋحاني تازارادى. اقىل-ويى كەمەلدەنىپ، ءتۇرلى ەموتسيانى سەزىنەدى ەكەن.

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار