بيىلعى ءبىرىنشى توقساننىڭ قورىتىندىسى بويىنشا ماكروەكونوميكالىق كورسەتكىشتەردىڭ جاقسارعانى بايقالۋدا. كەن ءوندىرىسى ونەركاسىبىن ەسەپكە الماعاندا, ناقتى سەكتوردا ءوسۋ 7,9%-عا دەيىن جەدەلدەدى, ال نەگىزگى كاپيتالعا سالىنعان ينۆەستيتسيالار 34% دەڭگەيدە ءوستى. جىلدىق ينفلياتسيا 7%-عا دەيىن باياۋلادى. ناقتى سەكتوردىڭ كوپ سالالارى تۇراقتى ءوسىم كورسەتتى. ولار قۇرىلىس (13,1%-عا ءوسۋ), سۋمەن جابدىقتاۋ (8,6%-عا), وڭدەۋ ونەركاسىبى (7,5%-عا), ەلەكترمەن جابدىقتاۋ (4,9%-عا) جانە اۋىل شارۋاشىلىعى (2,8%-عا) سالالارى. سونىمەن قاتار اقپارات پەن بايلانىس سالاسىندا 9,9%-عا ءوسىم بايقالدى.
«سونىڭ ناتيجەسىندە, جالپى ىشكى ءونىمنىڭ ءوسۋ قارقىنى وسى جىلعى قاڭتار-اقپانداعى مينۋس 2,9%-دان قاڭتار-ناۋرىزدا مينۋس 1,6%-عا دەيىن جاقساردى. وڭدەۋ ونەركاسىبى سالالارىندا ءوسۋ قارقىنىنىڭ جەدەلدەۋى بايقالادى. سەرپىندى ءوسۋ ماشينا جاساۋدا 21,8%-عا, ونىڭ ىشىندە اۆتوموبيل قۇراستىرۋدا – 20,7%-عا بەلگىلەنگەن. قۇرىلىس ماتەريالدارى ءوندىرىسى 30,1%-عا, حيميالىق ونىمدەر ءوندىرىسى 14,2%-عا, پلاستماسسا ونىمدەرى ءوندىرىسى 22,3%-عا, كيىم ءوندىرىسى 25,8%-عا, جيھاز ءوندىرىسى 19,2%-عا, فارماتسەۆتيكا 9,1%-عا ءوستى. وڭدەۋ ونەركاسىبىندە ءوسۋدىڭ جوعارىلاۋ ءۇردىسى ساقتالىپ وتىر. ءوسىم 7,5%-دى قۇرادى», دەدى ءا. ەرعاليەۆ.
