ۆاكتسينانىڭ ءبىرىنشى كومپونەنتىن ساۋدا, ويىن-ساۋىق ورتالىعىنىڭ قىزمەتكەرلەرى, بۋتيكتەردى جالعا الۋشىلار, ساتۋشىلار جانە ورتالىق قىزمەتكەرلەرى الدى. بۇدان باسقا, قالادا كوروناۆيرۋسقا قارسى ۆاكتسينالاۋ الدىن الا جازىلۋ ارقىلى مەديتسينالىق-سانيتارلىق كومەك ۇيىمدارىندا, ياعني ەمحانالاردا, وتباسىلىق دەنساۋلىق ورتالىقتارىندا, دارىگەرلىك امۋبلاتوريالاردا جانە وزگە دە نىسانداردا جۇرگىزىلىپ جاتىر.
ەلوردادا ەگۋ پۋنكتەرىنىڭ سانى 36-دان 100-گە دەيىن ۇلعايتىلدى, ال ولاردىڭ جۇمىس كەستەسى ساعات 08:00-دەن 00:00-گە دەيىن ۇزارتىلدى. ۆاكتسينانى الۋعا egov موبيلدىك قوسىمشاسى ارقىلى نەمەسە 109 ءنومىرى بويىنشا call-ورتالىققا قوڭىراۋ شالۋ ارقىلى جازىلۋعا بولادى.
«بۇگىن تەستىلىك رەجىمدە سوسو قىزمەتكەرلەرىن ەگۋدى باستادىق. مۇندا شامامەن 100 ادام بار. ۆاكتسيناتسيادان بۇرىن ولاردىڭ ءبارى دارىگەرلەردىڭ مىندەتتى مەديتسينالىق تەكسەرۋىنەن ءوتتى. ال سوسو-دا بريگادالار كەزەكشىلىك ەتەدى. ۆاكتسيناتسياعا رۇقسات بەرىلگەندەر ەگىلەدى», دەدى نۇر-سۇلتان قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا.
سونداي-اق ول سوسو-دا قالا تۇرعىندارىن جاپپاي ۆاكتسينالاۋ قاشان باستالاتىنىن ايتتى.
«بۇگىن قالالىق سانيتارلىق دارىگەردىڭ قاۋلىسى بويىنشا ساۋدا, ويىن-ساۋىق ورتالىعى كەلۋشىلەر ءۇشىن جابىق. سول سەبەپتى دۇيسەنبىدە سوسو-دا ورنالاسقان ەگۋ ورتالىعى تۇرعىنداردى دا, ورتالىققا كەلۋشىلەردى دە ۆاكتسينالاۋدى باستايدى», دەدى ءا.رۇستەموۆا.
بۇگىندە ەلوردادا ۆاكتسينالاردىڭ جەتكىلىكتى مولشەرى بار. ءساۋىر ايىنىڭ سوڭىنا دەيىن نۇر-سۇلتانعا 250 مىڭنان استام دوزا كەلەدى. جالپى, ءار اپتا سايىن دەنساۋلىق ساقتاۋ باسقارماسىنىڭ قويمالارىنا «سپۋتنيك V» جاڭا پارتياسى كەلىپ تۇسەدى. قازىرگى كۇنى كوروناۆيرۋس ينفەكتسياسىنا قارسى 26 مىڭنان استام ادام ەكپە الدى. قاجەت بولعان جاعدايدا حالىقتى ۆاكتسينالاۋ پۋنكتەرى بىرقاتار سوسو مەن قوناقۇي كەشەندەرىندە اشىلاتىن بولادى.
