ايماقتار • 09 ءساۋىر، 2021

تاسقىن قاۋپى اۋەدەن زەرتتەلدى

27 رەت كورسەتىلدى

باتىس قازاقستان وبلىستىق توتەنشە جاعدايلار دەپارتامەنتىنىڭ ماماندارى وڭىردەگى تاسقىن قاۋپى بار ايماقتاردى، سۋ قويمالارىنداعى احۋالدى اۋەدەن زەرتتەدى، دەپ حابارلايدى Egemen.kz.

وڭىردە كۇن جىلىنىپ، كوكتەم كۇشىنە تولىق ەندى. قازىر وبلىستىق توتەنشە جاعدايلار دەپارتامەنتى كۇن سايىن وبلىستاعى سۋ تاسقىنى جاعدايىنا مونيتورينگ جۇرگىزىپ وتىر. سونىڭ ىشىندە سۋ تاسقىنى قاۋپى بار ۋچاسكەلەرگە تۇراقتى باقىلاۋ ورناتىلعان. ماماندار كوپ جىلعى تاجىريبەگە سۇيەنىپ جانە بيىلعى جاعدايدى سارالاپ، سۋ تاسقىنى قاۋپى بار ۋچاسكەلەر تىزبەسىن جاساعان. وسى ءتىزىم نەگىزىندە ىقتيمال سۋ تاسقىنى نۇكتەلەرىن كارتادا بەلگىلەي وتىرىپ، اەروۆيزۋالدى تەكسەرۋ مارشرۋتى جاسالعان بولاتىن. جاقىندا دەپارتامەنت باسشىلىعى ءتيىستى ماماندارمەن بىرگە تەرەكتى، ءبورلى جانە شىڭعىرلاۋ اۋداندارى اۋماعىن اۋەدەن باقىلاپ قايتتى.

ۇشۋ بارىسىندا اتالعان اۋداندار اۋماعىنداعى قار جامىلعىسى، جايىق، شىڭعىرلاۋ، قايىڭدى، ەلەك، اششى وزەندەرىنىڭ باسسەيندەرىندەگى ىقتيمال تاسقىن سۋ مولشەرى، گيدروتەحنيكالىق قۇرىلىستاردىڭ جاي-كۇيى زەرتتەلىپ، مونيتورينگ جۇرگىزىلدى. قاردىڭ ەڭ كوپ جەرى – شىڭعىرلاۋ اۋدانى ەكەن.

- ساپار بارىسىندا اۋداندىق ماڭىزى بار جولدار، ولاردىڭ قاۋىپتى بولىكتەرى، كوكتەمگى سۋدىڭ كوپ مولشەرى جينالعان جەرلەر انىقتالدى. حالىقتىڭ تۇرعىن جايلارى مەن كولىك قاتىناسىنىڭ قاۋىپسىزدىگى باستى نازاردا بولادى، - دەدى دەپارتامەنتتىڭ ءباسپاسوز حاتشىسى باكيزات ماعزەنوۆا.

وسى زەرتتەۋدىڭ ناتيجەسىندە دەپارتامەنت باسشىلىعى قازتالوۆ اۋدانىنا قاراستى قايىڭدى اۋىلى ماڭىنداعى قايىڭدى وزەنىندە قالىپتاسقان ىقتيمال قاۋىپتى بايقاپ، جەرگىلىكتى اكىمدىككە ەسكەرتتى. ءسويتىپ، اكىمدىك قىزمەتكەرلەرىمەن بىرگە وزەنگە جەردەن زەرتتەۋ جۇرگىزدى. باقىلاۋ بارىسىندا ەلدىمەكەندى سۋ باسۋىنا جول بەرمەۋ جانە قايىڭدى وزەنىنىڭ سۋ ءتۇبىن تەرەڭدەتۋ جۇمىستارىن جۇرگىزۋ تۋرالى كەلىسىلگەن شەشىم قابىلداندى.

«وڭىردەگى سۋ تاسقىنى جاعدايى تۇراقتى جانە وبلىستىق سۋ تاسقىنىنا قارسى شتابتىڭ تۇراقتى باقىلاۋىندا» دەيدى توتەنشەلىكتەر.

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار