زەرتحانا بازاسىندا كوسموناۆتيكاعا ەرەكشە قىزىعۋشىلىق تانىتىپ, بولاشاعىن اۆياتسيا مەن استروناۆتيكامەن بايلانىستىرعىسى كەلەتىن 7-10 سىنىپتىڭ 70-تەن اسا وقۋشىسى ارنايى «NIS Space» كۋرسىن وتەدى.
«NIS Space» وقۋشىلاردى كوسموناۆتيكا سالاسىنداعى سوڭعى جاڭالىقتارمەن تانىستىرۋمەن عانا شەكتەلمەيدى, زەرتحانادا جاس زياتكەرلەر وزدەرىنىڭ عارىشتىق ۇشۋ اپپاراتىن قۇراستىراتىن بولادى.
مەكتەپ ديرەكتورى مەيرام جاكەنوۆتىڭ ايتۋىنشا, قازىر زياتكەرلىك مەكتەپتە كوسموناۆتيكانى كەڭىنەن ناسيحاتتاۋ جانە وقۋشىلار اراسىندا عىلىمي-تەحنيكالىق ءبىلىمنىڭ تارتىمدىلىعىن ارتتىرۋ ماقساتىندا جاڭا, وتە قىزىقتى ءبىلىم بەرۋ جوباسى جۇزەگە اسىرىلۋدا. جوبانىڭ عىلىمي جەتەكشىسى - حالىق قاھارمانى, قازاقستاننىڭ اسكەري-اۋە كۇشتەرىنىڭ گەنەرال-مايورى, عارىشكەر ايدىن ايىمبەتوۆ.
قازىرگى ۋاقىتتا «قازاقستان عارىش ساپارى» ۇلتتىق كومپانياسىمەن ىنتىماقتاستىق تۋرالى مەموراندۋمعا قول قويىلعان. رەسپۋبليكانىڭ عارىش سالاسىنىڭ جەتەكشى ماماندارى, عالىمدار مەن ساراپشىلار زياتكەرلىك مەكتەپ وقۋشىلارىنا ءوز عارىش اپپاراتىن قۇراستىرۋعا جاعداي جاساپ, ەڭ جاڭا عارىشتىق تەحنولوگيالار قالاي جۇمىس ىستەيتىنىن تۇسىنۋگە كومەكتەسەتىن بولادى. مەكتەپ ديرەكتورى اتاپ وتكەندەي, PocketQube نەمەسە femto – satellite سياقتى شاعىن ۇشۋ اپپاراتتارىن قۇراستىرۋ زياتكەرلىك مەكتەپ وقۋشىلارىنا عارىشتىق تەحنيكانى جاساۋدىڭ وندىرىستىك كەزەڭدەرى تۋرالى ءبىلىم الىپ, عارىش سالاسىندا ناقتى زەرتتەۋلەرگە قاتىسۋعا مۇمكىندىك بەرەدى.
جوبا باعدارلاماسى بويىنشا قاتىسۋشىلار ءۇش باعىتتا: «عارىش مەحانيكاسى», «ەلەكترونيكا» جانە «باعدارلامالاۋ» توپتارىندا تەوريالىق بىلىمدەرىن تەرەڭدەتەدى.
مەكتەپ وقۋشىلارى «قازاقستان عارىش ساپارى» ۇلتتىق كومپانياسىنا قاراستى, عارىش اپپاراتتارىن قۇراستىرۋ جانە سىناۋمەن اينالىساتىن «Ghalam» جشس قىزمەتكەرلەرىنىڭ باسشىلىعىمەن جۇمىس ىستەيدى. جاس زياتكەرلەر عالىم اعالارىنىڭ كومەگىمەن Solidworks جانە Altium Designer بىرىڭعاي ديزاين ورتاسىنىڭ باعدارلامالىق ونىمدەرىن جانە Python باعدارلامالاۋ ءتىلىن مەڭگەرەدى, زەرتحانالىق جۇمىستار مەن پراكتيكۋمدار ورىندايدى, ۇلتتىق عارىش ورتالىعىنىڭ زەرتحانالارىندا شەبەرلىك سىنىپتارىنا قاتىسادى.
«ەلەكترونيكا» ءبولىمى بويىنشا ساباقتاردى R&D دەپارتامەنتىنىڭ ينجەنەر مامانى ارمان بازارباي ۇلى سىزدىقوۆ جۇرگىزەدى. ولجاس تاسقوجا مەن ەربول سارسەمباەۆ - «Ghalam» جشس قۇراستىرۋشى-تەحنولوگيالىق بيۋرو ماماندارى جاس زياتكەرلەردى پروگراممالاۋ تىلىنە ۇيرەتەدى.
بالالار فيزيكا-ماتەماتيكا عىلىمدارىنىڭ دوكتورى, پروفەسسور ق.س.باقتىبەكوۆتىڭ جەتەكشىلىگىمەن عارىش مەحانيكاسى مەن استروديناميكا نەگىزدەرىمەن تانىسادى. قازبەك سۇلەيمەن ۇلى – عارىش اپپاراتتارىن جوبالاۋ جانە قۇراستىرۋ جۇمىستارىن جۇرگىزەتىن «عالاماتتاعى» تەحنولوگيالىق بيۋرونىڭ عىلىمي جەتەكشىسى.
بيىلعى جىلى وقۋشىلار شاعىن عارىش اپپاراتىنىڭ ماكەتى بويىنشا جوبالاۋ جۇمىستارىن باستايدى, راكەتانىڭ نەگىزگى ەلەمەنتتەرىن 3D پرينتەردە باسىپ شىعارادى. كەلەسى كەزەڭدە اپپاراتتى قۇراستىرۋعا كىرىسىپ, ىشكى جۇيەلەردى ازىرلەيدى, عارىش كەمەسىن ەلەكترونيكا مەن بورتتىق باعدارلامالارمەن جابدىقتايدى.
جۇمىستىڭ ەڭ ماڭىزدى شەشۋشى كەزەڭى – عارىش اپپاراتىن سىناقتان وتكىزۋ. ۇشۋ نىسانىنا اسەر ەتەتىن ءارتۇرلى مەحانيكالىق جۇكتەمەلەر نەگىزىندە جاس زياتكەرلەر العاشقى زەرتتەۋلەرىن جۇرگىزەدى.
NIS عارىش كەمەسىن ۇشىرۋ 2023 جىلعا جوسپارلانعان. وقۋشىلار تولىعىمەن وزدەرى باسقاراتىن باسقارۋ كەشەنى مەن دەرەكتەردى قابىلداۋ ورتالىعى زياتكەرلىك مەكتەپ عيماراتىندا ورنالاسادى.
ازىرگە جوباعا قاتىسۋشى 7-10 سىنىپ وقۋشىلارى جاڭا زەرتحانادا كوپ وقىپ, كوپ ەڭبەكتەنۋدە, زەرتتەۋ جۇمىستارى مەن جوبالىق جۇمىستارمەن اينالىسۋ ارقىلى وزدەرىنىڭ تاباندىلىعى مەن تاپقىرلىعىن شىڭداۋدا.
جۇلدىزدارعا ۇشۋدى ارماندايتىن زياتكەرلىك مەكتەپتىڭ جاس عارىشكەرلەرى ءۇشىن «NIS Space» زەرتحاناسى جوعارى تەحنولوگيالاردى يگەرۋدىڭ العاشقى قادامى.
