جوبانىڭ ىسكە اسىرىلۋىنا ەلباسىنىڭ « ۇلى دالانىڭ جەتى قىرى» ماقالاسى يدەيالىق نەگىز بولدى. نۇرسۇلتان نازارباەۆ اتالعان ماقالادا قازاقستان – قىزعالداقتىڭ وتانى ەكەندىگىن ايتا كەلە:
«وزىندىك ءمان-ماڭىزى زور بۇل وسىمدىكتەر وسى جەردە ءبۇر جارىپ, جەر جۇزىنە تارالعان... قازاق توپىراعىنداعى وسىناۋ قاراپايىم, سونداي-اق ەرەكشە گۇلدەر ءوز ادەمىلىگىمەن كوپتەگەن حالىقتىڭ جۇرەگىن جاۋلاپ, بىرتىندەپ بۇكىل الەمگە تارادى», دەپ جازعان بولاتىن.
انيماتسيالىق تەلەحيكايانىڭ باستى ماقساتى – وسكەلەڭ بۋىنعا عاجايىپ گۇلدىڭ تاريحىن, ەرەكشە قاسيەتتەرىن تانىستىرۋ ارقىلى ونى قورعاۋدى, كوبەيتىپ ءوسىرۋدى ناسيحاتتاۋ.
وقيعا جەلىسى بويىنشا, ايىقپاس دەرتكە شالدىققان گوللانديا ەلىنىڭ سۇلۋ دا مەيىرىمدى حانشايىمىن الاتاۋدىڭ باۋرايىندا وسەتىن ەرەكشە گۇلدىڭ قايناتپاسىمەن عانا ەمدەۋگە بولادى. قايتسەم دە قىزعالداقتار مەكەنىنە جەتەم دەگەن حانزادا نوكەرلەرىمەن بىرگە الىس ساپارعا اتتانىپ, شىتىرمان وقيعالارعا تاپ بولادى. وسىلايشا, 10 بولىمنەن تۇراتىن مۋلتحيكايادا الەم جۇرتشىلىعىنىڭ سۇيىكتى گ ۇلىنە, قازاق دالاسىنىڭ سيمۆولىنا اينالعان قىزعالداقتىڭ ەۋروپاعا بارۋ جولى باياندالادى.
«قازاقستان – قىزعالداقتار مەكەنى» انيماتسيالىق سەريالى 17 ساۋىردەن باستاپ ءار سەنبى-جەكسەنبى كۇندەرى ساعات 20:40 جانە 23:20-دا «Balapan» تەلەارناسىنان كورسەتىلەدى.
