ءوزىن عانا ەمەس, اينالاسىنداعىلار مەن جاقىنىن ويلاعان تۇركىستان وبلىسىنىڭ 21 مىڭنان استام ازاماتى ەكپە قابىلدادى. ولاردىڭ باسىم بولىگى, ياعني 14 مىڭعا جۋىعى مەديتسينا قىزمەتكەرى, 5 مىڭنان استامى مۇعالىم بولسا, مىڭعا جۋىعى قۇقىق قورعاۋ ورگاندارى جانە جارتى مىڭداي ءارتۇرلى توپتاعى ازاماتتار. بۇل ايدا ەكپە سالدىرۋعا نيەت بىلدىرگەندەردىڭ سانى ارتىپ وتىر. وبلىستىق قوعامدىق دەنساۋلىق باسقارماسىنىڭ حابارلاۋىنشا, ەكپە قابىلداعاندار دارىگەرلەردىڭ باقىلاۋىندا. ال ەكىنشى كومپونەنتپەن 10 مىڭعا جۋىق ازامات ۆاكتسينا الىپتى. ينفەكتسياعا قارسى ۆاكتسينالاۋ جۇمىستارى 65 ەمدەۋ مەكەمەسىندە جۇرگىزىلۋدە. سوڭعى تاۋلىكتە تۇركىستان وبلىسىندا 19 ادامدا COVID-19 ىندەتى انىقتالعان. جالپى وبلىستا پاندەميا بەلەڭ العالى 600 مىڭعا جۋىق پتر-سىنامالارى الىنعان. سوڭعى تاۋلىكتە زەرتحانالاردا 3 مىڭداي ادام تەكسەرىلگەن. جۇقپالى اۋرۋلار اۋرۋحاناسىندا بارلىعى 610 ورىن بار.
جىل باسىنان بەرى كوروناۆيرۋس ينفەكتسياسىنىڭ راستالعان 800-دەن استام جاعدايى تىركەلدى. جالپى وبلىستا كوروناۆيرۋستى ينفەكتسيادان 4500-دەن استام جاعداي راستالىپ, جىل باسىنان بەرى 625 پنەۆمونيا اۋرۋشاڭدىعى تىركەلگەن. سوڭعى ەكى اپتادا كوروناۆيرۋس – 36%, پنەۆمونيا 54%-عا وسكەن. «وزگە وبلىستارداعى جاعدايدىڭ كۇردەلەنۋىنە بايلانىستى كوروناۆيرۋس جانە پنەۆمونيا جۇقپالى اۋرۋلارىنا شالدىعۋدان بارىنشا ساقتانعان ءجون. ال ساقتانۋدىڭ بىردەن-ءبىر جولى – ۆاكتسينا قابىلداۋ. تۇرعىندار اراسىندا وتباسىلىق, مەرەكەلىك ءىس-شارالاردى ۇيىمداستىرۋ تولاستاماي تۇر. 2021 جىلدىڭ قاڭتار ايىنان باستاپ, تىيىم سالىنعان 192 مەرەكەلىك ءىس-شارا ۇيىمداستىرىلعانى بەلگىلى بولدى», دەيدى وبلىستىڭ باس مەملەكەتتىك سانيتارلىق دارىگەرى نۇربەك نىشانوۆ.
ايماقتا بۇگىندە جالپى 23 مىڭنان اسا مەديتسينا قىزمەتكەرى بار. ونىڭ 5 مىڭنان استامى – دارىگەر, قالعاندارى ورتا بۋىن ماماندارى. اق حالاتتى جانداردىڭ ەرەن ەڭبەگىنىڭ ارقاسىندا وڭىردە قاۋىپتى ىندەتتى جۇقتىرعان 4500-گە جۋىق ناۋقاس تولىق جازىلىپ شىقتى. ايتا كەتەلىك, دارىگەرلەر ىندەتپەن كۇرەسۋمەن قاتار باسقا دا اۋرۋلاردى ەمدەۋدى نازارىنان تىس قالدىرعان جوق. مىسالى, جۋىردا وبلىستىق كلينيكالىق اۋرۋحاناسىنىڭ دارىگەرلەرى اۋىر حالدە جەتكىزىلگەن 23 جاستاعى جۇكتى ايەلگە ءبىر مەزەتتە ەكى وتا جاسادى. انا مەن نارەستەنىڭ ءومىرىن امان الىپ قالۋ ءۇشىن الدىمەن ونى كەسار تىلىگىمەن بوساندىرىپ العان. كەيىن سول جاق باۋىرىن قۇرتتان لاپاروتوميا ءادىسى ارقىلى تازالاعان. «وتا شۇعىل دياگنوستيكالىق, لابوراتوريالىق جانە سالالىق دارىگەرلەردىڭ تەكسەرۋىنەن سوڭ جاسالىندى. ەحينوكوكتى كيستاسى جارىلۋ قاۋپىنەن انا مەن بالا ءومىرى قىل ۇستىندە تۇرعان. قازىر ءسابي مەن انانىڭ ومىرىنە قاۋىپ ءتونىپ تۇرعان جوق», دەيدى حيرۋرگيا ءبولىمىنىڭ مەڭگەرۋشىسى ماقسۇت ايماعانبەتوۆ. ال №3 وبلىستىق پەريناتالدىق ورتالىعىنىڭ دارىگەرلەرى نەبارى 1,5 كيلو سالماقپەن تۋىلعان ۇشەمدى 40 كۇن بويى كۇتىپ, جەتىلدىرىپ بارىپ, پەرزەنتحانادان شىعاردى. دارىگەرلەردىڭ ايتۋىنشا, جۇكتىلىكتىڭ 32-ءشى اپتاسىندا ايەلگە جەدەل وتا جاساۋعا تۋرا كەلگەن. العاش رەت انا اتانعان دينارا مۋحيتوۆانىڭ جاقىندارى سابيلەرگە حاديشا, فاتيما, زاحرا ەسىمدەرىن بەرگەن. دارىگەرلەر امان الىپ قالعان ءۇش قىز مەرزىمىنەن بۇرىن دۇنيەگە كەلىپ, ءبىر اپتا بويى جانساقتاۋ بولىمىندە جاتقان. وكپەسى دۇرىس دامىماي تۋىلعان نارەستەلەردىڭ ۇشەۋى بىردەي جاساندى تىنىس الۋ اپپاراتىنا قوسىلعان. دارىگەرلەردىڭ قاتاڭ باقىلاۋىندا بولعان نارەستەلەردىڭ ارقايسىسى وسى ۋاقىت ىشىندە ءبىر كيلودان سالماق قوسقان. جاس وتباسى كەنتاۋ قالاسىنا قاراستى قاراشىق اۋىلىنىڭ تۇرعىندارى. ايتا كەتەلىك, وبلىستىق پەريناتالدىق ورتالىعىندا جىل باسىنان بەرى 2 652 نارەستە دۇنيەگە كەلگەن.
تۇركىستان وبلىسى
