الايدا قحل-ءدىڭ الداعى ماۋسىمىندا «بارىستىڭ» وسى جىلعى قۇرامى تۇگەلىمەن وزگەرۋدىڭ ءسال-اق الدىندا تۇر. ويتكەنى وسى ايدىڭ سوڭىندا, ناقتىلاپ ايتار بولساق, 30 ساۋىردە قازاقستاندىق كوماندا ساپىندا وينايتىن 23 حوككەيشى مەن كلۋب تىزگىنىن بىلتىر عانا ۇستاعان باس باپكەر يۋري ءميحايليستىڭ كەلىسىمشارتى اياقتالادى. ازىرگە كلۋب باسشىلىعى ەشبىر ويىنشىمەن كەلىسىمشارتىن ۇزارتۋعا اسىعار ەمەس.
1 مامىردان باستاپ كەلىسىمشارتى اياقتالعان «بارىستىڭ» مىنا حوككەيشىلەرى كلۋبتان كەتۋى مۇمكىن. ولار: قاقپاشىلار – حەنريك كارلسسون, يوني ورتيو, سەرگەي كۋدرياۆتسەۆ. قورعاۋشىلار – دجەسسي بلەكەر, سامات دانيار, الەكس لينتۋنيەمي, الەكسەي ماكليۋكوۆ, ۆالەري ورەحوۆ, ديللون حەتەرينگتون, ۆيكتور سۆەدبەرگ. شابۋىلشىلار – پاۆەل اكولزين, فيل ۆارونە, لينۋس ۆيدەلل, كيورتيس ۆولك, دميتري گۋركوۆ, ياكوب ليليا, ماكسيم مۋسوروۆ, كيريلل پانيۋكوۆ, زاحار پارحومەنكو, ەگور پەتۋحوۆ, مەتتيۋ فرەتتين, دميتري شەۆچەنكو جانە ءاليحان اسەتوۆ.
جالپى «بارىس» كلۋبىندا ونەر كورسەتەتىن حوككەيشىلەردىڭ دەنى قازاقستان ۇلتتىق قۇراماسىندا وينايتىنى بارشاعا بەلگىلى. سوندىقتان كەلىسىمشارتى اياقتالعان قازاقستاندىق ويىنشىلاردىڭ كلۋبتا قالۋ-قالماۋى ۇلكەن ماسەلە بولادى دەپ ويلايمىز. ونىڭ ۇستىنە, سامات دانيار, ماكسيم مۋسوروۆ سياقتى بىرقاتار ويىنشى كوماندانىڭ تاربيەلەنۋشىسى سانالعاندىقتان, كلۋب باسشىلىعى ولاردى وزگە كوماندالارعا جىبەرە قويماس. ال كوماندانىڭ جارتى بيۋدجەتىنە يەلىك ەتەتىن لەگيونەرلەردىڭ كەتۋ-كەتپەۋى كلۋبتىڭ قارجىلىق جاعدايىنا بايلانىستى. بۇعان قوسا بىلتىر پرەزيدەنت قاسىم-جومارت توقاەۆ كاسىپقوي سپورت كلۋبتارىنىڭ بيۋدجەتىن ەكى ەسەگە قىسقارتۋعا تاپسىرما بەرگەن بولاتىن.
قازىردىڭ وزىندە كوماندادا ءۇش جىلدان بەرى ويناپ كەلە جاتقان كانادادا تۋىپ-ءوسىپ, بۇگىندە قازاقستان ازاماتتىعىن العان قورعاۋشى دجەسسي بلەكەر مەن ورتالىق شابۋىلشى كيورتيس ۆولككە قحل كوماندالارىنىڭ ءبىرى قىزىعۋشىلىق تانىتىپ وتىرعانىن قازاقستاندىق جانە رەسەيلىك باق وكىلدەرى جازىپ جاتىر. دەگەنمەن حوككەي ماماندارى بۇل ەكى حوككەيشىنىڭ اگەنتتەرى جاساپ وتىرعان قۇيتىرقى ارەكەت دەپ ەسەپتەيدى. ويتكەنى ۇجىمعا كوپ كومەگى تيەتىن ەكى ويىنشىنىڭ «بارىسپەن» كەلىسىمشارتى اياقتالاتىندىقتان جاڭا كەلىسىم بويىنشا ولار ايلىق جالاقىلارىن كوبەيتىپ الۋدى ماقسات ەتەتىندىكتەرىن ايتادى.
وتكەن ماۋسىمدا 50 ويىن وتكىزگەن بلەكەر ءتورت شايبا سوعىپ, ارىپتەستەرىنىڭ جەتى گولىنا اسسيستەنتتىك جاساعان. ال جالپى ءۇش ماۋسىمدا 40-تان اسا ۇپاي جيناعان ول وسى ماۋسىمدا سوڭعى ءۇش ماڭىزدى ويىننىڭ شەشۋشى گولىن سوعىپ, كومانداسىنا جەڭىس سىيلاعان. ۆولك تا ءدال سولاي. 62 ويىندا مۇزايدىنعا شىققان شابۋىلشى 10 شايبا سوعىپ, ارىپتەستەرىنە 21 مارتە ناتيجەلى پاس شىعارعان.
بلەكەر مەن ۆولكتان بولەك, تاعى قانداي لەگيونەرلەردىڭ كەلەسى ماۋسىمدا «بارىسقا» كومەگى ءتيۋى مۇمكىن؟ بۇل سۇراقتىڭ جاۋابىن ءبىلۋ ءۇشىن ويىنشىلاردىڭ بىلتىرعى ماۋسىمداعى ستاتيستيكالىق دەرەكتەرىنە كوز جۇگىرتسەڭىز جەتكىلىكتى. ماسەلەن, شابۋىلشى لينۋس ۆيدەلل 65 ويىندا قارسىلاستاردىڭ قاقپاسىن 10 مارتە كوزدەسە, 31 رەت ءدال پاس اسىرعان. ال تاعى ءبىر شابۋىلشى ياكوب ليليا بۇكىل ماۋسىم بويى 36 (21+15) ۇپاي جيناعان. «بارىسقا» قايتا ورالعان كانادالىق مەتتيۋ فرەتتيننىڭ ەنشىسىندە 30 (12+18), فيليپ ۆارونەدە 27 (10+17) ۇپاي بار. مىنە, بۇل – لەگيونەر شابۋىلشىلاردىڭ وتكەن ماۋسىمداعى ناتيجەلەرى.
ال ويىنى جانكۇيەرلەردىڭ دە, باپكەرلەر قۇرامىنىڭ دا كوڭىلىنەن شىقپاعان قورعاۋشىلار, اتاپ ايتقاندا, جاراقاتىنا بايلانىستى 28 ويىنعا عانا قاتىسقان ۆيكتور سۆەدبەرگ (3+5, 8 ۇپاي) جانە ماۋسىم ورتاسىندا ەلوردالىق كلۋبتىڭ قاتارىنا قوسىلعان ديللون حەتەرينگتون (2+5, 7 ۇپاي) مەن الەكس لينتۋنيەمي (0+4) كلۋبتان كەتۋى مۇمكىن.
باس باپكەر يۋري ءميحايليستىڭ كلۋبتا قالۋ-قالماۋ ماسەلەسى الداعى مامىر ايىندا لاتۆيانىڭ باس شاھارى – ريگادا وتەتىن الەم چەمپيوناتىنداعى قازاقستان ۇلتتىق قۇراماسىنىڭ ناتيجەسىنە بايلانىستى بولماق. ەگەر شاكىرتتەرى جوعارى توپتا قالىپ جاتسا, ميحايليس «بارىستاعى» جۇمىسىن ودان ءارى جالعاستىرا بەرۋى عاجاپ ەمەس. ال تومەنگى توپقا ءتۇسىپ قالسا, كلۋبتا قالمايتىنى انىق.
