الەم • 08 ءساۋىر، 2021

رەسەي تسيفرلىق ۆاليۋتانى سىناقتان وتكىزەدى

18 رەت كورسەتىلدى

رەسەيدىڭ ورتالىق بانكى 2022 جىلعا دەيىن  تسيفرلىق ءرۋبلدى سىناقتان وتكىزۋگە شەشىم قابىلدادى، سودان كەيىن ونى قولدانىسقا ەنگىزۋدىڭ جول كارتاسى دايىندالادى، دەپ جازادى Egemen.kz  ورتالىق بانك توراعاسىنىڭ ءبىرىنشى ورىنباسارى ولگا سكوروبوگاتوۆانىڭ مالىمدەمەسىنە سىلتەمە جاساپ.

2021 جىلدىڭ جەلتوقسانىنا دەيىن رەتتەۋشى تسيفرلىق رۋبل پلاتفورماسىنىڭ ءپروتوتيپىن قۇرۋدى جوسپارلاپ وتىر. «2022 جىلى تەكسەرىستەن وتكىزەمىز دەپ جوسپارلاپ وتىرمىز. تەك تەستىلەۋ ناتيجەلەرى بويىنشا ءبىز ماقساتتى پلاتفورمانى ىسكە اسىرۋدىڭ قانداي جول كارتاسى جانە قانداي مەرزىمدە جۇزەگە اسىرىلاتىنىن تۇسىنەتىن بولامىز»، دەدى سكوروبوگاتوۆا.

رف ورتالىق بانكتىڭ سايتىندا جاريالانعان مالىمەتتەردە قولدانىستاعى   زاڭناماعا تۇزەتۋلەردى ازىرلەۋ 2022 جىلدىڭ قاڭتارىنا، ال تسيفرلىق ءرۋبلدى تەستىلەۋدى باستاۋ 2022 جىلدىڭ ءبىرىنشى توقسانىنا جوسپارلانعانى جازىلعان. 

رەسەي بانكى ازاماتتار مەن كاسىپكەرلەردىڭ تسيفرلىق امياندارىنداعى قالدىقتارعا شەكتەۋ قويۋدى جوسپارلامايدى، دەپ حابارلادى ورتالىق بانك. «تسيفرلىق اميانعا تۇسەتىن بارلىق سوما بارلىعى، ول ادام ءۇشىن، بيزنەس ءۇشىن تولىقتاي قول جەتىمدى بولادى. ساندىق امياندارداعى قالدىقتارعا شەكتەۋ قويىلمايدى»، دەدى سكوروبوگاتوۆا

رەسەي بانكى سونىمەن بىرگە سالىق تولەمدەرى ءۇشىن تسيفرلىق ءرۋبلدى پايدالانۋعا رۇقسات بەرەدى.

ەسكە سالا كەتەيىك، 2020 جىلدىڭ قازان ايىنىڭ ورتاسىندا رەسەي فەدەراتسياسىنىڭ ورتالىق بانكى ءوز ەسەبىندە تسيفرلىق رۋبل تۇجىرىمداماسىن ۇسىندى. ول ارنايى ەلەكتروندىق ءامياندا ساقتالاتىن بىرەگەي تسيفرلىق كود تۇرىندە بولادى، ال تسيفرلىق ءرۋبلدى ءبىر قولدانۋشىدان ەكىنشىسىنە اۋىستىرۋ تسيفرلىق كودتى ءبىر ەلەكتروندى ءامياننان ەكىنشىسىنە اۋىستىرۋ تۇرىندە بولادى.

تسيفرلىق ءرۋبلدى رەسەي بانكى اينالىسقا شىعارادى. اقشا يەلەرى رۋبلدەردى ءبىر فورمادان ەكىنشىسىنە ەركىن اۋدارا الادى. بۇعان دەيىن جاپونيا بانكى ءوزىنىڭ تسيفرلىق ۆاليۋتاسىن شىعارۋ مۇمكىندىكتەرىن تەكسەرۋگە ارنالعان ەكسپەريمەنتتىڭ ءبىرىنشى كەزەڭىن باستاعانى تۋرالى حابارلانعان بولاتىن.

ءوز كەزەگىندە، قىتاي وتكەن جىلى ساندىق يۋانمەن تاجىريبە جاساي باستادى: رەتتەۋشى CDBC-ءدى 2020 جىلدىڭ قاراشاسىندا سىناقتان وتكىزە باستادى. بيلىك ساندىق ۆاليۋتانى بەيجىڭ-2022 قىسقى وليمپيادا ويىندارى كەزىندە قولدانۋدى جوسپارلاپ وتىر.

ەۋروپالىق ورتالىق بانك (ECB) وسى ونجىلدىقتىڭ ورتاسىندا تسيفرلىق ەۋرونى شىعارۋدى جوسپارلاپ وتىر.

قازاقستاندا قازاقستان ۇلتتىق بانكىنىڭ 2021-2022 جىلدارعا ارنالعان زەرتتەۋ باعدارلاماسى شەڭبەرىندە تسيفرلىق ۆاليۋتانى شىعارۋدىڭ ورىندىلىعى تۋرالى ماسەلە قارالاتىن بولادى.

سوڭعى جاڭالىقتار

ۇقساس جاڭالىقتار