كاسىپكەرلەر تىگىن فابريكاسىن قايتا جانداندىرۋعا كىرىستى

جەكەشەلەندىرۋ جىلدارى عيماراتى ساتىلىپ، قىزمەتكەرلەرى دە جان-جاققا تاراپ كەتىپ، اتاۋىنان باسقا ەشتەڭەسى قالماعان كاسىپورىننىڭ اياقتان تۇرۋى ءۇشىن قولدا بار مۇمكىندىكتەر  ىسكە اسىرىلىپ جاتىر. اقتوبە قالاسىنىڭ ورتاسىنان  عيمارات جالعا الىنىپ، زاماناۋي جابدىقتار ساتىپ الۋعا «دامۋ» كاسىپكەرلىكتى قولداۋ قورى وڭىرلىك فيليالىنىڭ كەپىلدەندىرۋىمەن نەسيە الىندى. بۇگىندە فابريكاعا ىرىكتەۋ نەگىزىندە 50 تىگىنشى  جۇمىسقا قابىلدانىپ، العاشقى ونىمدەرى ساتىلىمعا شىعارىلا باستادى. 

تسەحتا  تىگىلگەن جەيدەلەر، فۋتبولكالار مەن بالالاردىڭ جازدىق كيىمدەرى قالاداعى «Fiesta»، «ارزان»، «شىگىس» بازارىندا، «دينا» گيپەرماركەتىندە ساتىلىمدا تۇر.  جۇمىسىن باستاعانىنا ءبىر اي دا تولماعان  تىگىن فابريكاسىنىڭ  ىشكى رىنوكتاعى جەڭىل ونەركاسىپ تاۋارلارىنىڭ اراسىنان ءوز ورنىن تابۋى وڭايعا تۇسپەيتىنىن كاسىپكەرلەر جاسىرمايدى. ماسەلەن، قىتاي، تۇركيا، قىرعىزستاننىڭ جەڭىل  ونەركاسىپ ونىمدەرىنىڭ اقتوبە وبلىسىنداعى يمپورتى جىل سايىن 10 ميلليون اقش دوللارىن قۇرايدى. اقتوبە وبلىسىنىڭ  توقىما جانە تىگىن ونەركاسىبىنىڭ ىشكى رىنوكتاعى بولار-بولماس ۇلەسى اتەلەلەر تۇرىندەگى  شاعىن تسەحتارمەن عانا شەكتەلگەن. سوڭعى كەزدەرى تۇركىمەنستاننىڭ توقىما ءوندىرىسىنىڭ بۇيىمدارى مەن وزبەكستان تاۋارلارى دا كوپتەپ ءتۇسىپ جاتىر.

توقىما، تىگىن بۇيىمدارىنىڭ ءوندىرىسى  جۇمىسسىزدىقتى ازايتۋدىڭ ەڭ نەگىزگى جولى بولىپ سانالادى. وسى سالا جاندانسا، تىگىنشىلىك كاسىپپەن تۇراقتى تابىس تاباتىن  قىز-كەلىنشەكتەردىڭ ۇلەسى دە جوعارىلايدى. سونىڭ ءبىر مىسالى، كاسىپكەرلىك نەگىزدەرىن وقىپ، كيىم تىگۋدە تاجىريبە جيناقتاعان 50 تىگىنشى مەن كيىم ءپىشۋشىنىڭ ىرىكتەۋ نەگىزىندە تىگىن فابريكاسىنا جۇمىسقا ورنالاسقانى. تاۋار اينالىمى ارتىپ، جۇمىس كولەمى كوبەيسە  تاعى دا  جۇزدەگەن ادامعا جۇمىس تاۋىپ بەرەمىز دەپ ۋادە ەتىپ وتىر فابريكا باسشىلىعى.  الداعى ۋاقىتتا جۇمىسقا  ديزاينەر ماماندىعىنا وقىپ جاتقان كوللەدج ستۋدەنتتەرى قابىلدانادى دەپ جوسپارلانعان. ماتالاردى ىرىكتەۋ، كيىمدەردى تاراتۋ-ساتۋ جەلىلەرىنە دە قىزمەتكەرلەر كەرەك.

ەلىمىزدىڭ ىشكى رىنوگىن كوپ جىلداردان بەرى جاۋلاپ العان  قىتاي، وزبەكستان، قىرعىزستان تاۋارلارىن ساتىپ الۋعا  وزىمىزدەن قانشاما قارجىنىڭ  كەتىپ جاتقانى وتە وكىنىشتى. كورشىلەرىمىز جەڭىل ونەركاسىپتىڭ وسى سالاسىن الدەقاشان ەكونوميكالارىنىڭ  قوزعاۋشى كۇشتەرىنە اينالدىرىپ الدى. ماسەلەن، قىرعىزستان مەن وزبەكستاندا بارلىق تۇرعىنداردىڭ 20%-ى وسى سالادا ەڭبەك ەتەدى. قازىرگى جاعدايدا ەلىمىزدەگى توقىما جانە تىگىن ءوندىرىسى شاعىن تسەحتاردىڭ ىرىلەنۋى  جانە تىكەلەي مەملەكەتتىك باعدارلامالاردىڭ قولداۋى ارقىلى عانا اياقتان تۇرا الادى.