«ەلىمىزدە تۋريزم سالاسىن دامىتۋ ماڭىزدى ماقساتتاردىڭ ءبىرى. بۇگىن قابىلدانعان زاڭ وسى باعىتتا كەشەندى زاڭنامالىق نەگىز قالىپتاستىرادى. سوعان سايكەس قارجىلاي قولداۋ تەتىكتەرىنىڭ دە اۋقىمى كەڭەيدى. ولاردىڭ قاتارىندا ينۆەستيتسيالىق جەڭىلدىكتەر, تۋريستىك قىزمەتتى ىنتالاندىرۋ, سىرتتان تۋريستەر اكەلەتىن تۋروپەراتورلاردىڭ شىعىندارىن سۋبسيديالاۋ سياقتى باسىمدىقتار بار», – دەدى ماۋلەن اشىمباەۆ.
سونىمەن قاتار سەنات وتىرىسىندا دەپۋتاتتار «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى كوشى-قون سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭدى قاراپ, قابىلدادى. وسى قۇجات ارقىلى كوشى-قون پروتسەستەرى مەن ازاماتتىق ماسەلەلەرىن رەتتەۋ جانە زاڭسىز كوشى-قون ارنالارىن انىقتاۋ بويىنشا مالىمەتتەر الماسۋ ءۇشىن قولايلى جاعدايلار جاسالادى. سول ارقىلى تاراپتار ستاتيستيكالىق, قۇقىقتىق جانە عىلىمي-ادىستەمەلىك اقپاراتتارمەن, ءوز اۋماعىنداعى ەكى مەملەكەتتىڭ ازاماتتارى تۋرالى مالىمەتتەرمەن بولىسۋگە مۇمكىندىك الادى. ودان بولەك, ىنتىماقتاستىق اياسىندا تۋىندايتىن ماسەلەلەر بويىنشا ءوزارا تاجىريبە الماسۋعا دا جول اشىلادى.
«بۇل كەلىسىم زاڭسىز كوشى-قونعا قارسى كۇرەستە جانە كوشى-قون پروتسەستەرىن رەتتەۋدە قوسىمشا قۇقىقتىق تەتىكتەر قالىپتاستىرادى. سونداي-اق, اتالعان زاڭ ەكى ەل اراسىنداعى وسى سالا بويىنشا ىنتىماقتاستىقتى نىعايتۋعا وڭ ىقپالىن تيگىزەدى», – دەدى سەنات توراعاسى.
وتىرىس بارىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ادۆوكاتتىق قىزمەت جانە زاڭ كومەگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ جەكەلەگەن نورمالارى بويىنشا ءماجىلىس پەن سەنات اراسىنداعى كەلىسپەۋشىلىكتى ەڭسەرۋ جونىندەگى كەلىسىم كوميسسياسىنىڭ ۇسىنىسىن دا قاراپ, قابىلدادى.
«وسى قۇجاتتى قاراۋ بارىسىندا زاڭ كونسۋلتانتتارى پالاتالارىنىڭ رەسپۋبليكالىق زاڭ كونسۋلتانتتارى القاسىنا مىندەتتى مۇشە بولۋى تۋرالى نورما قىزۋ تالقىلانعان ەدى. وسىعان وراي كەلىسىم كوميسسياسىنىڭ ۇسىنىستارىن ەسكەرە وتىرىپ, اتالعان نورما زاڭنان الىنىپ تاستالدى. سوعان سايكەس, رەسپۋبليكالىق القاعا مۇشە بولۋ, تيىسىنشە وعان جارنا تولەۋ ەرىكتى تۇردە جۇرگىزىلەدى», – دەدى ماۋلەن اشىمباەۆ.
سونداي-اق, وتىرىس كەزىندە سەناتور ەرىك سۇلتانوۆ گازبەن قامتاماسىز ەتۋ جۇمىستارىن قۇقىقتىق رەتتەۋدى جەتىلدىرۋ جونىندە دەپۋتاتتىق ساۋال جولدادى. ول ءوز ساۋالىندا گاز باللوندارىنىڭ جارىلۋ سالدارىنان بولاتىن قايعىلى وقيعالاردىڭ الدىن الۋعا ارنالعان ۇسىنىستارىن جەتكىزدى.
