بۇل وقيعا 77 جىل بۇرىن بولعان: ەكى مايدانداس دوس, نەنەتس يۆان ياپتيك پەن قازاق مۇحتار قايشاتاەۆ ءبىر-بىرىنە سوعىستان كەيىن قازاق جەرىندە كەزدەسۋگە ۋادە بەرگەن ەكەن. «مايدانداس دوستار – نەنەتس يۆان ياپتيك پەن قازاق مۇحتار قايشاتاەۆ قازاقستاننان كەلگەن حاتتى وقىپ وتىر» دەگەن جازۋى بار, بىرگە تۇسكەن فوتوسۋرەت ءالى كۇنگە ساقتاۋلى.
جاۋىنگەرلەر 2-ءشى بەلارۋس مايدانىنىڭ 46-شى اتقىشتار ديۆيزياسىنىڭ 340-شى اتقىشتار پولكىنىڭ قۇرامىندا بولعان. وكىنىشكە قاراي, ەكەۋى دە ۋادەلەرىن ورىنداي الماي, 1945 جىلى مايدان دالاسىندا قازا تابادى.
«ەكى ەل ىزدەۋشىلەرىنىڭ بىرلەسكەن جۇمىسىنىڭ ارقاسىندا قارۋلاس جولداستاردىڭ نەمەرەلەرى تابىلدى. ولار 77 جىل بۇرىن اتالارى بەرگەن ۋادەلەرىن ورىنداۋ ءۇشىن قازاقستاننىڭ باس قالاسىندا باس قوسىپ, وسىلايشا ءفاشيزمدى جەڭگەن قازاقستان مەن رەسەي حالىقتارىنىڭ بىرلىگىن, ۋاقىت ارقىلى ساقتالعان قۇرمەت پەن ساباقتاستىقتىعىن كورسەتتى», دەدى «يامال پلاتسدارمى» ىزدەۋ وتريادى» كوممەرتسيالىق ەمەس سەرىكتەستىگىنىڭ توراعاسى اندرەي گۋنيچەۆ.
ءىس-شارا اياسىندا ىزدەۋشىلەر مەن جاۋىنگەرلەردىڭ ۇرپاقتارى وزدەرىنىڭ قىزمەتتەرى مەن كەزدەسۋدىڭ تاريحى تۋرالى اقپارات بەرەدى.
سونىمەن قاتار مۇحتار قايشاتاەۆتىڭ تۋىستارىمەن كەزدەسۋ ءۇشىن رەسەي دەلەگاتسياسىنىڭ سەمەي قالاسىنا ساپارىن ۇيىمداستىرۋ جوسپارلانعان.
«وتان تاريحىن, حالىقتىڭ مادەنيەتىن, سالت-ءداستۇرىن ءبىلۋ – پاتريوتيزم جانە ۇلتتىق بىرەگەيلىكتى جاڭعىرتۋدىڭ نەگىزى. قازىرگى ۋاقىتتا تاريحي سانانى قالىپتاستىرۋعا, مەملەكەتتىلىكتى جانە قازاق حالقىنىڭ ۇلتتىق بىرەگەيلىگىن نىعايتۋعا ەرەكشە ءمان بەرىلىپ وتىر», دەدى «اتامنىڭ اماناتى» قب باسقارما توراعاسى مۇرات مولداعاليەۆ.
ءىس-شارانى «اتامنىڭ اماناتى» قوعامدىق بىرلەستىگى, «رۋحاني جاڭعىرۋ» قازاقستاندىق قوعامدىق دامۋ ينستيتۋتى, نۇر-سۇلتان قالالىق ارداگەرلەر كەڭەسى جانە نۇر-سۇلتان قالاسى بويىنشا «رۋحاني جاڭعىرۋ» جوبالىق كەڭسەسى ۇيىمداستىردى.
