ۇبت-نىڭ جاڭا فورماتى جايلى ءبىلىم جانە عىلىم ۆيتسە-ءمينيسترى شولپان كارينوۆا تەستىلەۋدىڭ قالاي وتەتىنىن بايانداۋعا ارنالعان بريفينگتە: ء«بىلىم جانە عىلىم مينيسترلىگى ءبىلىم سالاسىن دامىتۋ, ساپانى ارتتىرۋ ماقساتىندا بىرقاتار شەشىم قابىلدادى. سونىڭ ىشىندە اشىقتىقتى, ادالدىقتى قامتاماسىز ەتەتىن تسيفرلاندىرۋ پروتسەسىنە كوشكەنىنە دە ءبىراز ۋاقىت بولدى. وسىنداي باعىتتاعى جۇمىستاردىڭ ءبىر كورىنىسى – بيىل ۇبت-نى ەلەكتروندى فورماتتا وتكىزۋدى جوسپارلاپ وتىرمىز», دەدى.
ۇلتتىق بىرىڭعاي تەستىلەۋ 2004 جىلدان بەرى قاعاز نۇسقادا وتكىزىلىپ كەلگەن ەدى. ۇبت-نىڭ ناتيجەسى باستاپقى ۋاقىتتا ەكى ماسەلەنىڭ شەشىمى بولدى. بىرىنشىدەن, مەكتەپ ءبىتىرۋشى تۇلەكتەرىن قورىتىندى اتتەستاتتاۋ ءۇشىن قولدانىلسا, ەكىنشىدەن, جوعارى وقۋ ورىندارىنا ءتۇسۋ ءۇشىن مەملەكەتتىك ءبىلىم بەرۋ گرانتىن يەلەنۋ ماقساتىندا قولدانىلدى. بۇگىندە اتتەستات مەكتەپتەگى قورىتىندى ەمتيحاندار نەگىزىندە بەرىلەدى, ال تەستىلەۋ تەك مەملەكەتتىك گرانت الۋعا جانە ەلىمىزدەگى جوعارى وقۋ ورىندارىنىڭ اقىلى بولىمدەرىنە وقۋعا ءتۇسۋ ءۇشىن تاپسىرىلادى.
ۇبت-نىڭ جاڭا فورماتى تالاپكەرلەر ءۇشىن قولايلى بولماق. جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆتىڭ ايتۋىنشا, تەست تاپسىرۋشى تەستىلەۋدىڭ وتكىزىلەتىن ورنىن جانە ۋاقىتىن ءوزى تاڭداي الادى. «ۇبت بۇرىنعىداي 10 كۇننىڭ ىشىندە عانا ەمەس, 3 اي بويى ەلەكتروندى فورماتتا وتكىزىلەدى. جاڭا فورماتتاعى تەستىلەۋدىڭ ەڭ ۇتىمدى جەرى تالاپكەر تەستىنى قاشان, قاي جەردە وتەتىنىن ءوزى تاڭدايدى. وزىنە ىڭعايلى كۇنى مەن ۋاقىتىن تاڭداپ, قولايلى جەردە تاپسىرادى. سونداي-اق ەلەكتروندى ۇبت تەستىلەنۋشىگە ناتيجەسىن كەشكە دەيىن كۇتپەي-اق سول جەردە الۋىنا مۇمكىندىك بەرەدى. ال تەست ناتيجەسىمەن كەلىسپەگەن جاعدايدا, تەستىلەنۋشى سول ساتتە-اق, ياعني 30 مينۋت ىشىندە اپپەلياتسياعا ءوتىنىش بەرۋگە قۇقىلى», دەدى ءا.تويباەۆ.
بۇعان دەيىن تەستىلەۋ قورىتىندىسى ۇبت وتكىزىلگەن مەكەمەنىڭ حابارلاندىرۋ تاقتاسىندا قاعاز نۇسقادا جاريالاندى. ونداعى اقپاراتتى سوندا جۇرگەن كەز كەلگەن ادام كورە الاتىن. بۇل تەستىلەنۋشىلەردىڭ جەكە دەرەگىن جاريالاۋمەن تەڭ ەدى. كەيبىر تۇلەكتەرگە ءوزىنىڭ ناشار ناتيجەسى ءۇشىن سىنىپتاستارىنىڭ تابالاۋىنا, تومەندەتۋىنە توزۋگە تۋرا كەلەتىن. ەندى ەلەكتروندى ۇبت-نىڭ قورىتىندىسى تەستىلەنۋشىنىڭ سايتتاعى جەكە كابينەتىندە عانا ساقتاۋلى بولادى.
ال ۇلتتىق تەستىلەۋ ورتالىعىنىڭ باسشىسى ديدار سماعۇلوۆ ەلەكتروندى ۇبت-نىڭ باستى قاعيداسىن ءتۇسىندىردى. «جاڭا فورماتتاعى تەستىلەۋ ء«بىر تەستىلەنۋشى – ءبىر كومپيۋتەر – ءبىر كامەرا» قاعيداسى بويىنشا وتكىزىلەدى. بۇل دەگەنىمىز – تەستىلەنۋشىنىڭ كومپيۋتەرى باقىلاۋدا بولادى دەگەن ءسوز. ياعني تەستىلەۋدى تاپسىرۋ پروتسەسى تولىعىمەن بەينەجازبادا ساقتالادى. ەلەكتروندى ۇبت پروكتورينگ جۇيەسىمەن وتەدى. اتالعان جۇيە تەستىلەنۋشىنىڭ تەست تاپسىرمالارىنان بولەك باسقا پاراقشانى اشۋىنا, ءتۇرلى سايتتى قاراۋىنا جول بەرمەيدى. سونداي-اق كەز كەلگەن ادام تەستىلەۋدىڭ وتكىزىلۋ بارىسىن www.education.kz سايتىنان كورىپ, باقىلاي الادى», دەدى ول.
