ايتۋلى جارىسقا قازاقستاننىڭ ءتورت ويىنشىسى قاتىسقانىمەن ياروسلاۆا شۆەدوۆا مەن ەلەنا رىباكينا العاشقى اينالىمدا ءسۇرىندى. ال الەمنىڭ 31-راكەتكاسى يۋليا پۋتينتسەۆا مەن WTA تىزىمىندە 88-ساتىعا جايعاسقان زارينا دياس وزدەرىنىڭ تۇساۋكەسەر كەزدەسۋلەرىن جەڭىسپەن اياقتادى. يۋليا ۇلىبريتانيالىق حەرريەت دارتتان ايلاسىن اسىرسا, زارينا رەسەيلىك ناتاليا ۆىحليانتسەۆانىڭ ويسىراتا ۇتتى. ەكىنشى كەزەڭدە قوس جەرلەسىمىز ءوزارا كۇش سىناستى. بۇل تارتىس 6:2, 6:2 ەسەبىمەن پۋتينتسەۆانىڭ پايداسىنا شەشىلدى.
ءۇشىنشى كەزەڭدە وتانداسىمىز گاربينە مۋگۋرۋسامەن شەبەرلىك بايقاسادى. بىردەن ايتا كەتەيىك, يسپانيانىڭ وكىلى وتە مىقتى ويىنشى. بۇل كۇندەرى الەمدىك رەيتينگتە 13 ورىندا تۇرعان مۋگۋرۋسا كەزىندە رولان گارروس جانە ۋيمبلدون تۋرنيرلەرىندە توپ جارىپ, اۋستراليانىڭ اشىق بىرىنشىلىگىنىڭ فينالىندا ونەر كورسەتكەن.
