سۋرەت «ەگەمەن قازاقستاننىڭ» ارحيۆىنەن الىندى
ەرەيمەنتاۋ اۋدانىندا حالقىمىزدىڭ سان عاسىر بويى ساباقتاسىپ كەلە جاتقان ادەمى سالت-ءداستۇرىنىڭ ءبىرى – قايىرىمدىلىق قاعيداتتارى سوڭعى ۋاقىتتا ءمانى مەن مازمۇنىن ايعاقتاپ, ومىرشەڭدىگىمەن ونەگە بولىپ, ءتىپتى تەرەڭدەي تۇسۋدە. اسىرەسە جاس تولقىننىڭ بويىندا ادامگەرشىلىك, پاراساتتىلىق, ىزگىلىك قاسيەتتەرىنىڭ مەنمۇندالاپ تۇراتىندىعى كوڭىل دەمەيدى. اۋدانداعى ەرىكتىلەر قوعامنىڭ كوپتەگەن سالاسىن تولايىم قامتىپ وتىر. ولار مۇقتاج ادامدارعا, الەۋمەتتىك-تۇرمىستىق جاعىنان از قامتىلعاندارعا قولۇشىن سوزۋدا. سونداي-اق ەل ىشىندەگى وزەكتى ماسەلەلەر دە نازاردان تىس قالماعان. ادامعا عانا ەمەس, تابيعاتقا دا جاناشىرلىق جاساپ جاتقاندىعىن كورىپ, ەل ەرتەڭىن ويلاعان جاس بۋىننىڭ كوڭىل كوكجيەگىنە ءتانتى بولاتىنىڭ بار.
ءبارى قالاي باستالىپ ەدى؟ ادەتتە ۇشقىن جالىنعا ۇلاسادى. ەل بولىپ ەڭسە كوتەرگەن ۆولونتەر جىلى شەڭبەرىندە اۋداننىڭ ءاربىر سەلولىق وكرۋگىندە ەرىكتىلەر ورتالىعى قۇرىلدى. جان دۇنيەسىنىڭ قالاۋىمەن جاقسى ىسكە جۇمىلعان جاستار جۇزدەپ سانالادى. قۇلاققاعىس رەتىندە qazvolunter.kz سايتىندا تىركەلگەن ەرىكتىلەردىڭ جاناشىرلىق قىزمەت اياسى ۋاقىت وتكەن سايىن كەڭەيە تۇسۋدە.
قىسى قاتال, قارى مول وڭىردەگى جاستار سىن ساعاتتا قولى قىسقا ادامداردى قامقورلىقتارىنا الدى. ولار جالعىزىلىكتى جانداردىڭ اۋلالارىن قاردان تازالاپ, ازىق-ت ۇلىكتەرىن ۋاقتىلى جەتكىزىپ بەرىپ وتىرسا, كوكتەم تۋعالى سۋ تاسقىنى بولۋى مۇمكىن ايماقتاردا ءبىر جاعادان باس, ءبىر جەڭنەن قول شىعارىپ جۇمىس ىستەپ ءجۇر. ءسوزىمىز دالەلدى بولۋى ءۇشىن ەرىكتىلەردىڭ 70-تەن استام زەينەتكەرگە, 20-عا جۋىق كوپبالالى وتباسىنا, ون شاقتى جالعىزباستى اناعا ناقتى قامقورلىق كورسەتكەنىن ەرەكشە ايتا كەتۋگە بولادى.
جاقسى ءىسى ۇلگى, ومىرشەڭ ونەگە بولىپ ساباقتالعان, ەل ىشىنەن ەكشەلگەن ەرىكتىلەر جىل باسىنان بەرى ۇزىن-ىرعاسى مىڭنان استام ادامدى قامتيتىن وتىزعا جۋىق ءىرىلى-ۇساقتى شارا وتكىزدى. بارلىق شارانىڭ ماقساتى ءبىر ارنادا توعىسىپ جاتىر. ول ەڭ الدىمەن تۋعان جەردىڭ توسىندە الدەبىر جاعدايمەن ەشكىمنىڭ كەمدىك كورىپ, قاتاردان قالماۋى. جان جۇرەكتەرى جابىرقاپ, جالعىزسىراماۋى. بىرلەسە اتقارعان كوپ جۇمىس بىرلىكتىڭ تۋىن بيىكتەتتى, جالىندى جاستاردى جالپاق ەلگە سۇيىكتى ەتتى. اسىرەسە ء«بىز بىرگەمىز», «سۇيىكتى ىسىڭمەن اينالىس» ءتارىزدى اكتسيالاردىڭ شاراپاتى كوپ بولدى. جاستار 8 ناۋرىز كۇنى وڭىردەگى دارىگەرلەردى قۇتتىقتاپ, ەرلىكپەن پارا-پار ەڭبەكتەرىنە لايىقتى قۇرمەت كورسەتتى.
سەلولىق وكرۋگتەردەگى اۋىل جاستارى «قامقورشىلار» باعدارلاماسىنا بەلسەنە اتسالىستى. قيىندىقتان قايمىعا قويمايتىن جاس تولقىن كوپبالالى جانە الەۋمەتتىك جاعىنان از قامتىلعان وتباسىلارىنا جامان تۇماۋدىڭ جولىن كەسەتىن ءدارى-دارمەكتەرمەن قامتاماسىز ەتتى. قارعا ادىم جەر مۇڭ بولىپ قالعان شاقتا قاريالاردىڭ اس-سۋىنا دا قارايلاستى. «قىزىل جارتى اي» قوعامىمەن بىرلەسە, جەرگىلىكتى جومارت جانداردىڭ كومەگىمەن جەتپىستەن استام وتباسىنا ازىق-ت ۇلىك, شارۋاشىلىق تاۋارلارى ءتارىزدى قاجەتتىلىكتەرىن جەتكىزىپ بەردى. ۆولونتەرلەر دەرت ءورشىپ كەتكەن تۇستا الەۋمەتتىك نىسانداردى زارارسىزداندىرۋعا قاتىستى. ەمدەۋ مەكەمەلەرىمەن بىرلەسە وتىرىپ, قورعانىس شارالارىن قالاي جۇرگىزۋ كەرەكتىگى تۋرالى بەينەباياندار ءتۇسىرىپ, الەۋمەتتىك جەلى ارقىلى كورەرمەندەر نازارىنا ۇسىندى. كارانتين كەزىندە 15 ەرىكتى ەمحانا دارىگەرلەرىنە قولعانات بولدى. ولار ەسەپتە تۇرعان, سوزىلمالى سىرقاتى بار ادامدارعا قاجەتتى ءدارى-دارمەكتەرىن اپارىپ, العىستارىن ارقالادى.
الەۋمەتتىك جەلى ارقىلى ەل ەڭسەسىن كوتەرۋ ءۇشىن يناباتتى, يماندى شارۋالاردى ناسيحاتتاۋعا دا تىزە قوسىپ كىرىستى. وسىناۋ شارالاردىڭ ناتيجەسى ەل ىشىندە جەلدەي ەسىپ, حالىقتىڭ رۋحىن كوتەرىپ, تەز تاراپ وتىردى. ونىڭ دا جاقسى جاعى بار. اۋىل-ايماقتىڭ بىرلەسۋىنە, اۋىزبىرشىلىكتىڭ ارتۋىنا ىقپالى تيمەك.
ساتىمەن ساباقتالعان ءىس ءبىرجانسال اۋدانىندا دا ورىستەۋدە. اۋدانداعى توقسانعا جۋىق ۆولونتەر ورتاق ماقسات جولىندا ەڭبەك ەتۋدە. ولار وزگە وڭىرلەردەگى ءتارىزدى قوعامنىڭ وسال بۋىنىن ەسەپكە الىپ, قامقورلىق كورسەتۋدە. كوپبالالى جانە الەۋمەتتىك جاعىنان از قامتىلعان وتباسىلارعا قاجەتتى كيىم-كەشەك جيناستىردى. دەمەۋشىلەردىڭ كومەگىمەن ازىق-ت ۇلىك سەبەتتەرىن تاراتتى. اسىرەسە اقپاراتتىق-ءتۇسىندىرۋ جۇمىستارى تياناقتى جۇرگىزىلۋدە. دەرت تىرناعىنا ىلىنبەۋ ءۇشىن قالاي قورعانۋ كەرەكتىگى تاپتىشتەپ تۇسىندىرىلگەن ۇنپاراقتار تاراتىپ, ەل ىشىندە ءتۇسىندىرۋ جۇمىستارىن ۇيىمداستىردى. تاۋەلسىزدىكتىڭ 30 جىلدىعى قارساڭىندا «قايىرىمدى ىستەر ساپارى» اكتسياسىنىڭ شەڭبەرىندە «سەمىزباي-U» جاۋاپكەرشىلىگى شەكتەۋلى سەرىكتەستىگى جالپى قۇنى 300 مىڭ تەڭگە تۇراتىن ازىق-ت ۇلىك سەبەتىن وتىزدان استام وتباسىنا جەتكىزىپ بەردى. ء«بىز بىرگەمىز!» اكتسياسى اياسىندا 1 800 000 تەڭگەنىڭ كومەگى كورسەتىلدى. اۋداندىق پروۆيزورلىق ورتالىققا ەكى وتتەگى كونتسەنتراتى, 45 كومبينەزون جانە مەديتسينالىق حالاتتار مەن توسەك جابدىقتارىن الىپ بەردى. بۇل ىسكە 2 700 000 تەڭگە قاراجات جۇمسالدى.
رەسپۋبليكالىق «مىڭ العىس» اكتسياسىن بەلسەندى قولداعان جاستار ۇلى وتان سوعىسى ارداگەرلەرىنىڭ وتباسىلارى مەن تىل ارداگەرلەرىنە 400 مىڭ تەڭگەنىڭ كومەگىن كورسەتسە, Kaz Beef جاۋاپكەرشىلىگى شەكتەۋلى سەرىكتەستىگى ىزگىلىكتى ىسكە 2 730 000 تەڭگە باعىتتادى.
يماندى شارۋادان ءدىن وكىلدەرى دە سىرت قالعان جوق. اۋدانداعى ءاشىم اتا مەشىتىنىڭ ۇجىمى رەسپۋبليكالىق «مىڭ العىس» اكتسياسىنا قولداۋ كورسەتىپ, كوپبالالى جانە الەۋمەتتىك جاعىنان از قامتىلعان وتباسىلارعا 300 مىڭ تەڭگەنىڭ جاردەمىن بەردى. بالالاردى قورعاۋ كۇنىنە وراي «سەمىزباي-U» سەرىكتەستىگى 615 مىڭ تەڭگە كولەمىندە جاناشىرلىق جاساسا, استانا كۇنىنە وراي 400 مىڭ تەڭگەگە مۇقتاج ادامدارعا قامقورلىق جاسادى.
ءوڭىردىڭ ءوڭىن ادامگەرشىلىككە نەگىزدەلگەن جاناشىرلىق ىستەر جاقسارتا تۇسۋدە. دارقان دالا توسىندەگى سان عاسىر بويى ساباقتاسىپ كەلە جاتقان جومارتتىقتىڭ ءتىنى وسىلايشا بىرىككەن بىرلىككە, ۇيىعان ۇيىمشىلدىققا ۇلاسىپ, ىزگىلىك وتىن لاۋلاتىپ جالعاسىپ كەلە جاتقانى قانداي جاراسىمدى.
اقمولا وبلىسى
