- وڭىرىمىزدە كوروناۆيرۋس ىندەتىنىڭ تارالۋى كۇننەن كۇنگە ۋشىعىپ بارادى. حالىقتىڭ سانىنا شاقساق, ءبىزدىڭ وبلىس ەلىمىز بويىنشا ءبىرىنشى ورىنعا شىعىپ كەتتى, - دەگەن بولاتىن باتىس قازاقستان وبلىسىنىڭ اكىمى عالي ەسقاليەۆ دۇيسەنبى كۇنى وتكەن شتاب ماجىلىسىندە. اكىمنىڭ ايتۋىنشا, وبلىس ورتالىعىنداعى ستاتسيونارلىق ورتالىقتاردىڭ جوسپارلى ورىندارى 90%-عا تولعان. سوندىقتان تەز ارادا كۇشەيتىلگەن شەكتەۋ شارالارىن قابىلداماسا, وتكەن جازداعى احۋال قايتالانۋى مۇمكىن.
بۇگىنگە دەيىن وبلىس تۇرعىندارىنان 15677 ادام ىندەت جۇقتىرسا, ونىڭ 12547-ءسى جازىلىپ شىققان. الايدا 247 ادامنىڭ اجالى وسى ۆيرۋستان كەلىپتى. اسىرەسە ناۋرىز ايىندا قايتىس بولعاندار سانى اقپان ايىنان ەكى ەسەگە جۋىق كوپ.
وسىنداي قاۋىپتى جاعدايعا قاراماستان كوپشىلىك شارالار – توي-تومالاق وتكىزۋشىلەر ازايماي وتىرعانىن ايتقان باس سانيتار دارىگەر مۇحامعالي ارىسپاەۆ مۇنداي تويدى ۇيىمداستىرۋشىلارعا عانا ەمەس, قاتىسۋشىلارعا دا ايىپپۇل سالۋدى ۇسىنعان بولاتىن. قازىردىڭ وزىندە كارانتين تالابىن بۇزىپ, تويعا بارعان 80-دەي ادامنىڭ ارقايسىسى 83 مىڭ تەڭگە ايىپپۇلعا تارتىلعانى حابارلاندى.
ءساۋىردىڭ 6-سى كۇنى شىققان جاڭا قاۋلىدا وبلىستىڭ باس سانيتار دارىگەرى ءتۇن مەزگىلىندە حالىقتىڭ كوشەگە شىعۋىنا تيىم سالدى. ياعني تۇنگى 00.00.-06.00. ارالىعىندا قۇقىق قىزمەتكەرلەرى, جەدەل جاردەم, قۇتقارۋشىلار سەكىلدى ارنايى قىزمەت وكىلدەرى عانا شەكتەۋسىز جۇرە الادى. وسى كەزەڭدە دارىگەرگە, دارىحاناعا باراتىن نەمەسە تۇنگى اۋىسىمدا ىستەيتىن تۇرعىندار «109» تەلەفونى بويىنشا ءوتىنىم قالدىرۋى نەمەسە http/www.STOPCOVID.KZ. سايتىنا تىركەلۋى ءتيىس.
كونتينگەنتى 300 وقۋشىعا دەيىنگى اۋىل مەكتەپتەرىندە سىنىپتاعى بالا سانىن 15 ادامنان اسىرماي ءداستۇرلى فورماتتا وقىتۋعا بولادى.
ساۋدا ۇيلەرى مەن ورتالىقتارى جۇمىس كۇندەرى ساعات 10.00-دەن 21.00-گە دەيىن, سەنبى كۇنى ساعات 10.00-دەن 17.00-گە دەيىن قىزمەت كورسەتىپ, جەكسەنبىدە جابىلادى. بۇل شەكتەۋلەر 9 ساۋىردە كۇشىنە ەنبەك.
