12 شاعىن اۋداننىڭ 25-ءۇيىنىڭ تۇرعىندارىنىڭ ايتۋىنشا 57-پاتەردە تۇراتىن كورشىلەرى ءبىراز ۋاقىتتان بەرى ۇيىندە بىرنەشە كۇركەتاۋىقتى اسىرايدى. سونىڭ كەسىرىنەن ءۇيدىڭ كىرەبەرىسىنەن-اق جاعىمسىز ءيىس مۇڭكىپ تۇرادى ەكەن. ءتىپتى, پاتەرلەردە جاندىكتەر مەن تىشقان قاپتاپ كەتكەن كورىنەدى.
- مۇندا بالالى جاس وتباسىلار بار. سولاردىڭ بارىنە دە زيان. بۇل قورا ەمەس, پاتەر عوي, - دەيدى تۇرعىن ءابۋتالى ايتماعانبەتوۆ.
وزگە دە تۇرعىندار پاتەرىن تاۋىققوراعا اينالدىرعان كورشىلەرىنە اشۋلى.
- سانيتارلىق تالاپ ساقتالماعان تۇرعىن ۇيدە ءومىر سۇرۋگە ءماجبۇر بولىپ وتىرمىز. كۇركەتاۋىق باعاتىن كورشىمىزدىڭ پاتەرىنەن جاعىمسىز ءيىس شىعادى. دەم الۋ مۇمكىن ەمەس. ۇيىمىزدە جاندىك پەن تىشقان قاپتاپ كەتتى. قۇزىرلى ورگاندارعا شاعىمداندىق. بىراق, ارەكەت جوق, - دەدى اتىن اتاعىسى كەلمەگەن تۇرعىن.
تۇرعىندار كورشىلەرى ەسىگىن اشپاق تۇگىلى بايلانىسقا دا شىقپايدى دەپ پوليتسياعا شاعىمدانعان. قۇزىرلى ورگاننىڭ قىزمەتكەرلەرى 5 ءساۋىر كۇنى تاعى كەلسە دە پاتەردىڭ ەسىگىن اشا المادى. ۋچاسكەلىك پوليتسەيلەردىڭ ايتۋىنشا, ولار ەسىكتى بۇزىپ كىرە المايدى.
- بۇل جاعداي بويىنشا ۋچاسكەلىك ينسپەكتور تۇرعىنداردىڭ ارىزىن قابىلداپ, حابارلاما ارقىلى اقتاۋ قالالىق اكىمدىگىنە جانە سانيتارلىق ەپيدەميولوگيالىق ستانساسىنا جولداعان. الداعى ۋاقىتتا قالالىق اكىمدىكتەن نەمەسە سەس-تەن حابار بولادى, - دەدى ۋچاسكەلىك پوليتسيا بولىمشەسىنىڭ باستىعىنىڭ ورىنباسارى ەركىن ەلەۋسىزوۆ.
ال ماڭعىستاۋ وبلىستىق ۆەتەريناريا باسقارماسىنىڭ ۆەتەرينارلىق-سانيتارلىق قاۋىپسىزدىگى ءبولىمىنىڭ باسشىسى نۇرسۇلتان دۇيسەبەك وزدەرىنە باقىلاۋ, قاداعالاۋ جانە تەكسەرۋ فۋنكتسياسى جۇكتەلمەگەنىن ايتتى. بۇل ماسەلەگە سانيتارلىق ەپيدەميولوگيالىق ستانسا مەن ۆەتەرينارلىق ينسپەكتسيا ارالاسۋ كەرەكتىگىن جەتكىزگەن. ال قالالىق سەس بۇل جاعدايعا قاتىسىمىز جوق دەپ وتىر. ۆەتەرينارلىق ينسپەكتسيا وزدەرى تەكسەرىس جۇرگىزە المايتىنىن, تەك اكىمدىك تاراپىنان كوميسسيا قۇرىلسا ىسكە كىرىسەتىندەرىن ايتقان.
