جىلدىڭ باسىنان بەرى جامبىل وبلىسىنىڭ پوليتسەيلەرى 45 ءىز-ءتۇزسىز جوعالعان كامەلەتكە تولماعان ءجاسوسپىرىمدى ىزدەستىردى. ونىڭ 40-ى كەزەكشى تاۋلىكتە تابىلدى. قالعاندارىنىڭ تۇرعان جەرى بىرنەشە كۇن ىشىندە انىقتالدى.
قولدا بار ستاتيستيكاعا سۇيەنە وتىرىپ, پوليتسيا بالالار مەن جاسوسپىرىمدەردىڭ ءوز ەركىمەن كەتۋىنىڭ كەلەسىدەگىدەي نەگىزگى سەبەپتەرىن انىقتادى. ولاردىڭ قاتارىنا: اتا-انالارمەن, مۇعالىمدەرمەن, تاربيەشىلەرمەن جانە قاتارلاستارىمەن قاقتىعىس, بالانىڭ پسيحيكالىق دامۋىنداعى اۋىتقۋ, اتا-انالار تاراپىنان باقىلاۋدىڭ بولماۋى جاتادى.
كەزدەيسوق كەتىپ قالۋ ارەكەتى سيرەك كەزدەسەدى, بالالار تۇرعىلىقتى جەرىن تابا الماي, اۆتوبۋسپەن سەرۋەندەپ نەمەسە ۇيدەن الىس جەردە اداسىپ كەتەدى.
«بالالارىڭىزعا مۇقيات جانە ءادىل بولىڭىز, ولاردىڭ ماسەلەلەرىن بىرگە شەشىڭىز, سودان كەيىن ءسىزدىڭ بالاڭىزدىڭ ۇيدەن كەتىپ قالۋى ەكىتالاي. الايدا, ەگەر ءسىزدىڭ بالاڭىز ۇيدەن ءوز ەركىمەن كەتىپ قالسا, وندا ءسىز ونىڭ بارلىق تانىسى مەن دوستارىنا دەرەۋ قوڭىراۋ شالۋىڭىز كەرەك. ۇيدەگى اقشا مەن قۇندى زاتتاردىڭ بار-جوعىن تەكسەرىڭىز. ول قانداي كيىممەن كەتكەنىن جانە وزىمەن بىرگە نە العانىن انىقتاۋعا تىرىسىڭىز. ەگەر ءسىز بالانىڭ ۇيدەن سانالى تۇردە كەتۋىنىڭ بەلگىسىن كورمەسەڭىز, شۇعىل تۇردە پوليتسياعا حابارلاسىڭىز. وزىڭىزبەن بىرگە بالانىڭ كامەلەتكە تولماعانى تۋرالى قۇجاتتارىن, سۋرەتىن اكەلىپ, ءوتىنىش جازۋىڭىز قاجەت», دەپ حابارلادى ۆەدومستۆو وكىلدەرى.
