باتىس قازاقستان وبلىستىق حالىق شىعارماشىلىعى ورتالىعى ۇيىمداستىرعان بۇل ساپاردىڭ ءمان-ماڭىزى ەرەكشە بولىپتى. «ناۋرىز شىمكەنتتە باستالادى» جوباسى اياسىندا وتكەن شارالارعا تاپ كەلگەن شىعارماشىلىق قۇرام شىمكەنت قالالىق سالت-داستۇرلەر ورتالىعىندا شەبەرلىك ساعاتىنا قاتىسىپ, كوپتەگەن قۇندى مالىمەتكە قانىقتى.
- ەلىمىزدە ءۇشىنشى مەگاپوليس اتانعان شىمكەنت شاھارىنىڭ تاريحى, قاسيەتتى جەرلەرى ادامعا وي سالادى ەكەن. وسى ساپارىمىز ءوزىڭدى دە, اينالاڭدى دا جاڭاشا تانۋعا جەتەلەيتىن ساتتەرگە تولى بولدى, - دەيدى قازتالوۆتىق رەجيسسەر داناگۇل جۇماباەۆا.
قاي سالادا بولماسىن, تاجىريبە الماسۋ – كاسىبي قاجەتتىلىك. جۇمات شانين اتىنداعى اكادەميالىق قازاق دراما تەاترىندا بەلگىلى دراماتۋرگ سايا قاسىمبەكتىڭ «ناۋرىز كونە شىمقالادا» تاڭعاجايىپ حيكاياتىن تاماشالاعان باتىسقازاقستاندىقتار قويىلىم سوڭىندا اۆتورمەن, تەاتردىڭ كوركەمدىك جەتەكشى جانە قويۋشى رەجيسسەرىمەن, اكتەرلەرمەن كەزدەستى. وسىنداي ارىپتەستىك جۇزدەسۋ ءازىل-سىقاق جانە ساتيرا تەاترىندا نيل سايموننىڭ «اۋمەسەرلەر» كومەدياسىن, قالالىق قۋىرشاق جانە جاسوسپىرىمدەر تەاترىندا «ناۋرىز دۋمان» ەرتەگىسىن, ورىس تەاترىندا گريگوري گورينانىڭ «اتىڭ ءوشسىن, گەروسترات» تراگيكومەدياسىن تاماشالاپ, تالقىلاۋمەن جالعاستى. ورالدىقتار شىمكەنتتىك ارىپتەستەرىنىڭ ەڭبەكقورلىعىنا, شىعارماشىلىق شەبەرلىگىنە ءتانتى بولدى. «عيماراتى كىشكەنتاي بولعانىنا قاراماستان قۋىرشاق جانە جاسوسپىرىمدەر تەاترى ۇلكەن جۇمىس اتقارىپ وتىر ەكەن. دەكوراتسيا, تىگىن تسەحى, رەكۆيزيت الەمىنىڭ تياناقتىلىعىنان كوپ ساباق الدىم. اسىرەسە ءوز جۇمىسىن باستان-اياق جالىقپاي تۇسىندىرگەن رەجيسسەرگە العىسىم شەكسىز. وڭتۇستىك ساپارىندا ەڭ ۇلكەن اسەردى وسى جەردەن تاپتىم» دەيدى ءبورلى اۋدانىنىڭ حالىقتىق «مۇراگەر» تەاترىنىڭ رەجيسسەرى اسەل مولداعاليەۆا.
شىمكەنت ورتالىقتاندىرىلعان كوپشىلىك كىتاپحانالار جۇيەسىنىڭ اباي اتىنداعى ورتالىعىندا قالالىق ءال-فارابي عىلىمي كىتاپحاناسىنىڭ مەرزىمدى باسىلىمدار ءبولىمىنىڭ مەڭگەرۋشىسى تاڭشولپان ساۋلەمباي, تۇركىستان فيلارمونياسى سۋرەتشى-ديزاينەرى ماقسات ايدۇيسەنوۆ, شىمكەنت قالالىق قوعامدىق كەلىسىم جانە مادەني ءىس-شارالار ءبولىم مەڭگەرۋشىسى ءازيزا يساەۆا قاتىسقان كەزدەسۋ دە باتىسقازاقستاندىقتار ءۇشىن وتە پايدالى بولدى. ءوز ءىسىنىڭ ماماندارى اتقارىلعان ءار شاراعا رەجيسسەرلىك, اكتەرلىك تالداۋ جاساپ, ۇسىنىستارمەن پىكىرلەرىن ايتتى.
ساپار بارىسىندا مەيماندار شىمكەنت قالاسىنىڭ تۇرعىنى, ونەر جاناشىرى كەندەباي اتانىڭ ەتنو-مۋزەيىندە بولىپ, اتايدىڭ ءوز قولىمەن جاساعان مۋزىكالىق اسپاپتارىى مەن قىش قۇمىرالارىن تاماشالادى. ەرەكشە ونەرلى جان 18 ءتۇرلى اسپاپتا وينايتىنىن كورسەتىپ, شەبەرلىك ساعاتىن دا وتكىزىپ ۇلگەرىپتى.
- شىمكەنتتەگى ساياسي قۋعىن- سۇرگىن مۇراجايى ەرەكشە اسەر بەردى. مۋزەيگە كىرگەن ساتتەگى كوزىمە ءابدىلدا تاجىباەۆتىڭ ولەڭ جولدارى ءتۇستى:
ات دەگەن كىم؟
اتقان قايسىڭ؟
قانىم قايدا توگىلگەن؟
قابىرىم قايدا كومىلگەن؟! – بۇل ءمانى دە, ماعىناسى دا ەرەكشە ولەڭنەن سوناۋ قانقۇيلى جىلداردىڭ وقيعاسى, ونىڭ جازىقسىز قۇربانى بولعان ازاماتتاردىڭ ەسىمدەرى كوز الدىمىزعا كەلگەندەي... قازاقتىڭ باسىنا تۇسكەن سوناۋ ناۋبەت زامان ەسكەرتكىشتەرى, الاش زيالىلارىنىڭ حاتتارى, ەڭبەكتەرى, ولاردىڭ فوتوسۋرەتتەرى, سول زاماننان ساقتالعان ەسكى گازەتتەر ساقتالعان ەكەن. وسىنىڭ ءبارىن مۋزەي قىزمەتكەرى تولىقتاي تانىستىرىپ ءوتتى. تاتيانا نەۆادوۆسكايانىڭ اشتىقتان قايتىس بولار الدىنداعى قازاق جىگىتىنىڭ قاسىنداعى فوتوسۋرەتى دە اسەرلى بولدى. سوڭىندا كورسەتىلگەن «اشارشىلىق» تاقىرىبىنداعى دەرەكتى فيلم دە بىزگە تاريحي تىڭ دەرەكتەر سىيلادى, - دەيدى شىڭعىرلاۋ اۋداندىق مادەني-دەمالىس ورتالىعىنىڭ رەجيسسەرى جالعاسبەك مىرزاگەرەەۆ.
ناۋرىزدىڭ 14-ىندە جاڭا جىلدى قول الىسىپ, كورىسىپ باستايتىن باتىسقازاقستاندىقتار ناۋرىز-تويدىڭ وڭتۇستىكتە ەرەكشە كەڭ كولەمدە اتقارىلاتىنىنا كۋا بولدى. تۇركىستان قالاسىنىڭ ەتنواۋىلىندا وتكەن ناۋرىز تويدا جىبەك جولى كوشى جاڭاشا جولعا شىقسا, الاڭدا پىسىرىلگەن 2 توننا ناۋرىزكوجەنىڭ ءدامى دە ەرەكشە بولدى.
- بۇل ساپار بىزگە كوپتەگەن جاڭا اسەر, پايدالى ءبىلىم سىيلادى. اسىرەسە بىزدەي مەيمانعا اياعىنان تىك تۇرىپ قىزمەت قىلعان بارلىق مەكەمە باسشىلارى مەن جاۋاپتى ماماندارىنا العىسىمىزدى ايتامىز. اسىرەسە بارعان كۇننەن بىزگە باعىت-باعدار بەرىپ, ماعىنالى جوسپار سىزىپ, ءار كەزدەسۋىمىزدى پايدالى وتكىزگەن ءازىل-سىقاق جانە ساتيرا تەاترىنىڭ رەجيسسەرى سامات التاي مىرزاعا ەرەكشە ىقىلاسىمىزدى بىلدىرەمىز, - دەيدى باتىس قازاقستان وبلىستىق حالىق شىعارماشىلىعى ورتالىعىنىڭ كوركەمدىك جەتەكشىسى اراي يحسانوۆا.
