سارىاعاش اۋدانىنىڭ ساقشىلارى «جىبەك جولى» كەدەن بەكەتى ارقىلى ەسىرتكىنى زاڭسىز الىپ وتپەكشى بولعان تۇركىستان وبلىسىنىڭ تۇرعىنىن ۇستادى. ناقتىراق ايتساق, باقىلاۋ بەكەتىنىڭ قىزمەتكەرلەرى وزبەكستان رەسپۋبليكاسىنىڭ اۋماعىنا وتپەك بولعان جەرگىلىكتى تۇرعىننىڭ بيلەتىن تەكسەرىپ جاتقان كەزدە, «كليمينتينا» اتتى قىزمەتتىك يت بىرنەشە مەتردەن جۇگىرىپ بارىپ, ەر ازاماتتىڭ جانىنا جاقىنداپ ءۇرىپ, بەلگى بەرە باستايدى. وسىدان سوڭ بەكەتتەگىلەر بىردەن سارىاعاش اپب-ءنىڭ ساقشىلارىنا حابارلاسىپ, بولعان جايتتى تۇسىندىرەدى.
ءتارتىپ ساقشىلارى وقيعا ورنىنا كەلىپ, بىرقاتار تەكسەرۋ جۇمىسىن جۇرگىزەدى. كۇدىك تۋدىرعان تۇرعىننىڭ اتى-ءجونىن انىقتاپ, وعان ءتىنتۋ جۇرگىزەدى. بىرنەشە ۋاقىت بويى تياناقتى جۇرگىزىلگەن تەكسەرۋ جۇمىستارىنىڭ ناتيجەسىندە ەر ازاماتتىڭ قالتاسىنان قاعاز وراماعا ورالعان ەسىرتكى زاتىنا ۇقساس زات تابىلادى. پوليتسيا قىزمەتكەرلەرى ايعاقتى زاتتى ساراپتاماعا جولداپ, ونىڭ قورىتىندىسى بويىنشا جالپى سالماعى 7,5 گرامم كەپتىرىلگەن ماريحۋانا ەكەنىن انىقتايدى.
اتالعان جايت سارىاعاش اپب-دا قر قك-ءنىڭ 286-بابى (اينالىستان الىپ قويىلعان زاتتاردىڭ نەمەسە اينالىسى شەكتەلگەن زاتتاردىڭ كونترابانداسى) جانە 296-بابى (ەسىرتكى, پسيحوتروپتىق زاتتارمەن, سول تەكتەستەرمەن, پرەكۋرسورلارمەن وتكىزۋ ماقساتىنسىز زاڭسىز جۇمىس ىستەۋ) بويىنشا تىركەلىپ, سوتقا دەيىنگى تەرگەپ-تەكسەرۋ باستالادى.
كۇدىكتىنىڭ ايتۋىنشا, ول ەسىرتكى تەكتەس زاتتى تاۋىپ الىپ, ءوزى قولدانباق نيەتتە ساقتاعان. سارىاعاشتىق ساقشىلارمەن تەرگەۋ جۇمىستارى بويىنشا قۇجاتتاردىڭ بارلىعى جيناقتالىپ, اۋداندىق سوتقا جولدانادى.
كوپ ۇزاماي سارىاعاش اۋداندىق سوتى ءوز شەشىمىن شىعارادى. ياعني سوتتىڭ ۇكىمىمەن ەسىرتكى تەرىس قىلىعى بويىنشا ۇستالعان ەر ازامات جوعارىدا اتالعان ەكى باپپەن دە ايىپتى دەپ تانىلىپ, وعان ەكى جىل مەرزىمگە باس بوستاندىعىنان شەكتەۋ جازاسى تاعايىندالادى.
