سونىمەن قاتار مينيستر ءشاربانۋ بەيسەنوۆانى جۋىردا « ۇلى دالا ارۋلارى» سەرياسىنىڭ ءۇشىنشى كىتابى - «ۇرپاعىنا ۇران بولعان انالار» اتتى تانىمدىق-كوپشىلىك جيناعىنىڭ جارىق كورۋىمەن قۇتتىقتادى.
ءشاربانۋ بەيسەنوۆا 1947 جىلى 14 قازاندا شىعىس قازاقستان وبلىسى, ۇلان اۋدانىندا دۇنيەگە كەلگەن.
1969 جىلى əل-فارابي اتىنداعى قازاق ۇلتتىق ۋنيۆەرسيتەتىن تəمامداعان.
ەڭبەك جولىن 1968 جىلى قازىرگى «پاراسات» (بۇرىنعى «مادەنيەت جانە تۇرمىس») جۋرنالىندا ادەبي قىزمەتكەر رەتىندە باستاپ, كەيىننەن ءبولىم مەڭگەرۋشىسى بولعان. 1980 جىلىدان باستاپ «قازاقستان ايەلدەرى» جۋرنالىنا ءبولىم مەڭگەرۋشىسى, قازاقستان رەسپۋبليكاسى اقپارات مينيسترلىگىنىڭ باسپا ىستەرى جونىندەگى دەپارتامەنتىندە باس مامان, «قازاق ادەبيەتى» گازەتىندە «كىتاپ الەمى» قوسىمشاسىنىڭ رەداكتورى قىزمەتىن اتقارعان.
«توپجارعان قىزدار» (1985), «سەزىمتال جۇرەك» (1988), «تاعىلىمدى تاعدىرلار» (2002), «سۇزگەنىڭ سوڭعى كۇندەرى» (2008) كىتابىنىڭ اۆتورى.
«ۇرپاعىنا ۇران بولعان انالار» اتتى تانىمدىق-كوپشىلىك – « ۇلى دالا ارۋلارى» سەرياسىنىڭ ءۇشىنشى كىتابى. قۇراستىرعاندار: ءشاربانۋ بەيسەنوۆا مەن جانات اسكەربەكقىزى. بۇدان بۇرىن «سۇيىنبيكە – ۇلى دالا ارۋى», «بوزوق ارۋى» اتتى ەكى كىتاپ جارىق كورگەن. جوبا جانە يدەيا اۆتورى - ءشاربانۋ بەيسەنوۆا.
كىتاپقا ەل تاريحىندا ەسىمى ەرەكشە اتالاتىن اياۋلى انالارىمىزدىڭ ۇلتقا ۇلگى, ۇرپاققا ونەگە بولارلىق تاعلىمدارى, ەلدىكتى نىعايتۋداعى ەرەكشە ءىس-ارەكەتتەرى تۋرالى تانىمدىق جازبالار ەنگىزىلگەن.
كىتاپ ءۇش بولىمنەن تۇرادى: «اسىل تەكتى ءازىز انالار» اتتى ءى بولىمدە بورتە حانىم, اقسۇلۋ – الپەش انا, نۇريلا (دومالاق) انا, بولعان انا, جۇبان انا, ءرابيا سۇلتان بەگىم, جاعان بيكەم, بوپاي حانىم تۋرالى; «ەسىمى رۋ-تايپا اتاۋىنا شىققان انالار» اتتى ءىى بولىمدە قىزاي انا, مۇرىن انا, اباي انا, تاسبيكە. تاتتىبيكە ت.ب. تۋرالى; «ەل جادىنداعى اڭىز انالار» اتتى ءىىى بولىمدە قارقابات انا, ماراۋ, جۇپار, سىلاندى, دارابوز, قويسانا انا, قالامقاس اپا, بوپاي حانشا, ايعانىم انا, زەرە اجە تۋرالى جازبا توپتاستىرىلعان.
