پالاتا سپيكەرى ەلشىنىڭ قازاقستاندىق-جاپوندىق قارىم-قاتىناستى, سونىڭ ىشىندە, پارلامەنتارالىق بايلانىستى نىعايتۋعا قوسقان ايرىقشا ەڭبەگىنە توقتالدى.
بۇگىندە جاپونيا قازاقستاننىڭ ماڭىزدى ستراتەگيالىق ارىپتەستەرىنىڭ ءبىرى سانالادى.
نۇرلان نىعماتۋلين اتاپ وتكەندەي, ءبىزدىڭ ەلدەرىمىزدى بەيبىت ءومىر قۇندىلىقتارى, الەۋمەتتىك-ەكونوميكالىق دامۋدى قامتاماسىز ەتۋگە باعىتتالعان ورتاق ۇستانىمدار بىرىكتىرەدى.
ءماجىلىس توراعاسى نۇر-سۇلتان مەن توكيو اراسىنداعى ءداستۇرلى دوستىق ءوزارا ءتيىمدى ارىپتەستىك جانە ىنتىماقتاستىق نەگىزىندە جوعارى دەڭگەيدە دامۋ جولىنا تۇسكەنىن العا تارتا كەلىپ, بۇل باعىتتا قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ ءرولى زور ەكەنىن اتاپ ءوتتى.
قازىرگى ۋاقىتتا مەملەكەت باسشىسى قاسىم-جومارت توقاەۆ اتالعان ەلمەن قاتىناستى ودان ءارى تەرەڭدەتۋگە كوڭىل ءبولىپ كەلەدى.
ءوز كەزەگىندە تاتسۋحيكو كاساي بيىل تاۋەلسىزدىگىنە 30 جىل تولاتىن قازاقستان, وسى ۋاقىتتار ىشىندە تولاعاي تابىستارعا قول جەتكىزگەنىن, بۇل ءتيىمدى ساياسي باسشىلىقتىڭ جانە بىرلىگى جاراسقان حالىقتىڭ ەرەن ەڭبەگى ەكەنىن ايتىپ, شىنايى ريزاشىلىق سەزىمىن ءبىلدىردى.
