سىيلىققا قاتىساتىن مۇعالىم رەسمي سايتتا ساۋالدامانى تولتىرۋى كەرەك (WWW.TEACHERPRIZE.KZ). ساۋالدامالار 2021 جىلدىڭ 1 ساۋىرىنەن 1 تامىزىنا دەيىن قابىلدانادى. ساۋالدامالاردى باعالاۋدىڭ نەگىزگى ولشەمشارتتارىنىڭ ءبىرى – مۇعالىمنىڭ الەۋمەتتىك ماڭىزدى قوعامدىق قىزمەتكە قاتىسۋى. تاربيەشىنىڭ الەۋمەتتىك جوبالارداعى جۇمىسى بالالاردى, جاس ۇرپاقتى بىرىكتىرۋگە, ولاردىڭ ءوزارا ءىس-قيمىلىن شىعارماشىلىقپەن, قوعام يگىلىگى ءۇشىن پايدالى ىستەرمەن تولىقتىرۋعا, ولاردىڭ ءوزىن-ءوزى تانۋىن رۋحاني ادامگەرشىلىك جانە گۋمانيستىك باعىتتا تاربيەلەۋگە مۇمكىندىك بەرەدى.
ۇزدىك ۇمىتكەرلەردى ىرىكتەۋدى قازىلىق قۇرامىنا ءبىلىم جانە عىلىم مينيسترلىگىنىڭ, اتا-انالار قوعامداستىعىنىڭ وكىلدەرى, ءبىلىم بەرۋ سالاسىنداعى تاۋەلسىز ساراپشىلار, تاربيەشىلەردىڭ جەتەكشى ماماندارى, قوعام قايراتكەرلەرى, ەلىمىزدىڭ فيلانتروپتارى كىرەتىن تاۋەلسىز سۋديالار اكادەمياسى جۇرگىزەدى.
ىرىكتەۋ «الەم مۇعالىمى» جاھاندىق سىيلىعىن ۇيىمداستىرۋشى ۆاركە قورىنىڭ (Varkey Foundation) بەلگىلەنگەن ولشەمشارتتارىنا سايكەس وتەدى. حالىقارالىق اۋديتورلىق كومپانيا ىرىكتەۋ پروتسەسىنىڭ اۋديتىنە, باعالاۋىنا جانە تەستىلەۋىنە قاتىسادى جانە ىرىكتەلگەن كانديداتتاردىڭ بەدەلى مەن ءومىربايانى بويىنشا تەرەڭدەتىلگەن سكرينينگ جۇرگىزەدى.
قازاقستاننىڭ تاربيەشىلەرگە ارنالعان جاھاندىق سىيلىققا قاتىسۋىنا مۇمكىندىك بەرگەن – قوعامدىق ماڭىزى بار باستامالاردى دامىتۋ قورىنىڭ باسشىسى ءاليا نازارباەۆا. مۇعالىمدەر – قوعامداعى وزگەرىستەردىڭ كىلتى. «قازاقستان مۇعالىمى» ۇلتتىق سىيلىعىنىڭ ميسسياسى – ماماندىقتىڭ بەدەلى مەن مارتەبەسىن ارتتىرۋ, بەلسەندى مۇعالىمدەر اراسىندا ىنتىماقتاستىق ورناتۋ.
