بولجام ءدال كەلدى. بۇگىندە الەمدەگى بىرنەشە ءىرى مەملەكەت ەتەك-جەڭىن جيناپ, ءورشىپ بارا جاتقان ينفەكتسيانى بولدىرماۋعا بارىن سالىپ جاتىر. ءبىزدىڭ ەلىمىزدە دە احۋال ايتارلىقتاي ءماز ەمەس. قازاقستان تاياۋدا الەمدىك ەپيدەميولوگيالىق باعالاۋ ماتريتساسى بويىنشا «قىزىل ايماققا» ءوتتى. قىزىلوردانىڭ جاعدايى «جاسىل» بولىپ تۇرعانىمەن, ءبىر اپتانىڭ مۇعدارىندا مۇندا دا ىندەتكە ىلىنگەندەر كورسەتكىشى ەداۋىر ءوسىپ تۇر. مىسالى, 1 ءساۋىر كۇنى 27 ادامنىڭ ۆيرۋس جۇقتىرعانى بەلگىلى بولعان. كەلەسى كۇنى تاعى 32 ادامنىڭ بويىنان دەرت بەلگىسى ءبىلىندى.
وبلىستا ىندەت باستالعالى بەرى 4 103 تۇرعىن ينفەكتسيا جۇقتىرعان. ونىڭ جارتىسىنان استامى سكرينينگتىك تەكسەرۋ ناتيجەسىندە انىقتالىپتى. قارىم-قاتىناس ارقىلى جۇقتىرعان جاعدايلار دا جيىلەپ وتىر. وسى ۋاقىت ارالىعىندا 3 913 ادام دەرتتەن ايىعىپ شىقتى. ءدال وسى كۇنى ەمدەۋ مەكەمەلەرىندە 102 ناۋقاس ەم الىپ جاتىر, 11 ادام وبلىستىق ينفەكتسيالىق ستاتسيوناردىڭ جانساقاۋ بولىمىنە جاتقىزىلعان. ەپيدەميالىق ماۋسىم باستالعالى بەرى وبلىستىق فتيزيوپۋلمونولوگيا ورتالىعى, ۇلتتىق ساراپتاما ورتالىعى مەكەمەلەرى جانە ينۆيۆو, «وليمپ» كلينيكالارى, ارال وباعا قارسى لابوراتورياسى ارقىلى 259 118 سىناما الىنعان.
– ناۋرىز مەرەكەسىنەن كەيىن ىندەت جۇقتىرعاندار سانىنىڭ كۇرت كوبەيگەنى بايقالادى. قانشا ايتىلسا دا, كارانتين تالاپتارىن ساقتاماي مەرەكەلىك كورپوراتيۆتەر, جاسىرىن توي-جيىندار جاسايتىندار ازايماي وتىر. كارانتينگە الىنىپ, ءۇي جاعدايىندا وقشاۋلانعان ادامدار مەن ولارعا كۇتىم جاسايتىنداردىڭ دا ساقتىق شارالارىنا سالعىرت قاراۋى كەزدەسىپ قالىپ جاتىر. ۆيرۋستىڭ مۋتاتسيالانعان جاڭا شتامدارىنىڭ بەلسەندىلىگى ارتىپ كەلە جاتقانى دا مامانداردى قاتتى الاڭداتادى, – دەيدى وبلىستىڭ باس مەملەكەتتىك سانيتاريالىق دارىگەرى دينارا جاڭابەرگەنوۆا.
وبلىس «جاسىل ايماقتا» بولعانىمەن, كورمەلەر, فورۋمدار, كونفەرەنتسيالار, سونداي-اق وتباسىندا ادامدار كوپ جينالاتىن وزگە دە ءىس-شارالاردى وتكىزۋگە سالىنعان تىيىم كۇشىندە تۇر. بەتپەردە كيىپ, جەكە گيگيەنا ەرەجەلەرىن ۇستانۋ, قوعامدىق ورىنداردا اراقاشىقتىق ساقتاۋ تالاپتارى دا وزگەرگەن جوق. وبلىستىڭ باس سانيتارى دەنە قىزۋى كوتەرىلىپ, جوتەلگەن جانە تىنىس الۋ قيىنداعان جاعدايدا بىردەن مەديتسينالىق كومەككە جۇگىنۋگە شاقىرىپ وتىر. اتا-انالار كۇن سايىن بالالارعا ساقتىق شارالارىنىڭ ماڭىزدىلىعىن ءتۇسىندىرىپ وتىرۋى كەرەك. IV توقساننان باستاپ ءبىلىم بەرۋ ءداستۇرلى فورماتقا كوشىرىلدى. مەكتەپ وقۋشىلارى اراسىندا كوروناۆيرۋس ينفەكتسياسى تارالۋىنىڭ الدىن الۋ ماقساتىندا شەكتەۋ شارالارى, ونىڭ ىشىندە كارانتين كەزىندە ءبىلىم بەرۋ ۇيىمدارىنا قويىلاتىن سانيتارلىق-ەپيدەميالىق تالاپتار بەلگىلەندى. بۇل تالاپتار ءاربىر مەكتەپتە بۇلجىتپاي ورىندالۋى ءتيىس. جاعداي اياق استى ۋشىعا قالسا جۇقپالى اۋرۋلار جانە پروۆيزورلىق ستاتسيونارلاردا 3 200 توسەكتىك ورىن دايىن. قىزىلوردا قالاسىندا 200 توسەكتىك ورىندىق جاڭا ءمودۋلدى جۇقپالى اۋرۋلار اۋرۋحاناسى, جالاعاشتا 100 توسەكتىك ورىندىق اۋرۋحانا بوي كوتەردى. وبلىستىق كوپبەيىندى جانە قازالى اۋدانارالىق اۋرۋحانالارى جانىنان وتتەگى ستانسالارى سالىندى. وڭىردە ءدال قازىر 3 500 قىزمەتكەردەن كادرلىق رەزەرۆ جاساقتالىپ تۇر. بىلتىر جازدا بولعان ءدارى-دارمەك جەتىسپەۋشىلىگىنىڭ ەندى قايتالانباۋىنا نازار اۋدارىلدى. قازىردىڭ وزىندە 2 ايلىق قور بار. بيۋدجەتتەن ونى تولتىرىپ تۇرۋعا تاعى دا 488 ملن تەڭگە قارالدى. الىس اۋىلدىڭ تۇرعىندارى ءۇشىن 2 مەديتسينالىق كەشەن جانە 40 سانيتارلىق كولىك الىندى.
بۇگىنگى دايىندىق بارىسى وسىلاي بولىپ تۇر. بىراق ماماندار ەڭ باستىسى تۇرعىندار «ساقتانساڭ عانا ساقتايتىنىن» ۇمىتپاسا ەكەن دەيدى. سوندا عانا دەرتتىڭ بەتى قايتار ەدى. ءبىز كوپ رەتتە سانيتارلىق تالاپتى اينالىپ ءوتىپ كەتۋدىڭ امالىن ىزدەپ جاتامىز. سوندايلاردىڭ جىل باسىنان بەرى 105 مارتە كارانتين تالاپتارىن بۇزعانى انىقتالىپ, ولارعا اكىمشىلىك ايىپپۇل سالىندى. ارينە, دەرتكە شالدىققانعا كومەك كورسەتۋ – دارىگەردىڭ مىندەتى. بىراق ابزالى اۋىرماعان عوي. ال ول ەڭ الدىمەن وزىمىزگە بايلانىستى.
قىزىلوردا وبلىسى
