وبلىس اكىمى ومىرزاق شوكەەۆ اۋداندى ءۇش جىل باسقارعان جامانتاي بەيسەنباەۆتى قۇرمەتپەن زەينەت دەمالىسىنا شىعارىپ سالىپ, اۋداننىڭ ءوسىپ-وركەندەۋىنە, حالىقتىڭ ءال-اۋقاتىنىڭ ارتۋىنا ايانباي ەڭبەك ەتكەنى ءۇشىن العىسىن ايتتى.
«جەتىساي اۋدانى ەرەكشە اۋدان. ەڭ ءىرى اۋدان. وسى اۋداننىڭ دامۋىنا ۇلكەن ۇلەس قوسىپ, كوپتەگەن جاڭا باستامالارعا مۇرىندىق بولعان جامانتاي قاناي ۇلىن قۇرمەت دەمالىسىنا شىعارىپ سالا وتىرىپ, ادال اتقارعان ەڭبەگى ءۇشىن العىس بىلدىرەمىز. جاڭا باسشىعا ماڭىزدى مىندەتتەر جۇكتەلىپ وتىر. ارىس اپاتى كەزىندە ءوزىن ىسكەر, باتىل باسشى ەكەنىن كورسەتتى. الدا اتقارىلار ىستەر كوپ. جاڭا ءوندىرىس ورىندارىن اشۋدى, اۋدان تۇرعىندارىن جۇمىسپەن قامتۋ ءارى قاراي جۇزەگە اسىرۋ قاجەت. اۋىل شارۋاشىلىعىن وزىق تەحنولوگيالارمەن جابدىقتاپ, ينۆەستيتسيا تارتۋ كەرەك. قوعامدىق جانە قۇقىقتىق ءتارتىپتى ساقتاي وتىرىپ, اۋدان تۇرعىندارىنا بارىنشا قولايلى جاعداي جاساۋدى تاپسىرامىن», دەدى وبلىس اكىمى.
2018 جىلى جاڭادان قۇرىلعان جەتىساي اۋدانىن باسقارىپ كەلگەن جامانتاي بەيسەنباەۆ اۋدان اكتيۆىنىڭ الدىندا ءسوز الدى. اۋداننىڭ دامۋ كورسەتكىشتەرىنە توقتالىپ, ريزاشىلىعىن ءبىلدىردى. جاڭا اكىمدى اۋدان اكتيۆىنە ارنايى تانىستىرعان ومىرزاق ەستاي ۇلى ونىڭ الداعى جۇمىسىنا ساتتىلىك تىلەي وتىرىپ, ابىرويلى ەڭبەك ەتەتىنىنە سەنىم ءبىلدىردى.
وبلىس اكىمى اۋداننىڭ جاڭا باسشىسىنىڭ الدىنا ءوڭىردىڭ الەۋمەتتىك-ەكونوميكالىق دامۋى, قوعامداعى بىرلىك پەن كەلىسىمدى نىعايتۋ بويىنشا بىرقاتار مىندەتتەر جۇكتەپ وتىر. مۇرات قادىربەك وزىنە سەنىم ارتقان بارشا ازاماتتارعا العىس ايتىپ, جەتىساي اۋدانىنىڭ دامۋى مەن وركەندەۋى جولىندا بار كۇش-جىگەرىن جۇمسايتىنىن جەتكىزدى.
ايتا كەتەيىك, مۇرات بولات ۇلى 1980 جىلى شاردارا اۋدانىندا تۋعان. ءبىلىمى جوعارى, زاڭگەر, قۇقىقتانۋ ماگيسترى. قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ تۇلەگى.
ەڭبەك جولىن 2002 جىلى قاراعاندى قالاسى قازىبەك بي اۋدانىنىڭ پروكۋراتۋراسىنىڭ ءبولىم پروكۋرورى لاۋازىمىندا باستاعان.
2004-2008 جىلدارى قازىبەك بي اۋدانى پروكۋرورىنىڭ كومەكشىسى, شىعىس قازاقستان وبلىسى № 2 تارباعاتاي اۋداندىق سوتىنىڭ سۋدياسى لاۋازىمدارىن اتقارعان.
2008-2011 جىلدارى قازاقستان رەسپۋبليكاسى قورشاعان ورتانى قورعاۋ مينيسترلىگىندە بيۋدجەتتىك جوسپارلاۋ, قارجى-ەكونوميكالىق قامتاماسىز ەتۋ جانە مەملەكەتتىك اكتيۆتەردى باسقارۋ, ەكونوميكا جانە قارجى دەپارتامەنتتتەرى ديرەكتورىنىڭ ورىنباسارى, الماتى وبلىسى ەڭبەكشىقازاق اۋدانى اكىمىنىڭ ورىنباسارى رەتىندە ەڭبەك ەتكەن.
2011-2016 جىلدارى قر مەملەكەتتىك قىزمەت ىستەرى اگەنتتىگىنىڭ مەملەكەتتىك قىزمەتتى كادرلىق قامتاماسىز ەتۋ دەپارتامەنتى ديرەكتورىنىڭ ورىنباسارى, الماتى وبلىسى بويىنشا دەپارتامەنت باسشىسىنىڭ ورىنباسارى, سولتۇستىك قازاقستان جانە ماڭعىستاۋ وبلىسى بويىنشا دەپارتامەنتتەرى باسشىسى – تارتىپتىك كەڭەس توراعاسى, قر مەملەكەتتىك قىزمەت ىستەرى مينيسترلىگى ماڭعىستاۋ وبلىسى بويىنشا دەپارتامەنتىنىڭ باسشىسى – ادەپ جونىندەگى كەڭەس توراعاسى لاۋازىمدارىن اتقارعان.
2016 جىلدان بەرى ارىس قالاسىنىڭ اكىمى قىزمەتىن اتقاردى.
