شەيح زايد سىيلىعىنىڭ ون بەسىنشى ماۋسىمىنىڭ شورت-پاراعى التى نوميناتسيا بويىنشا جاريالانعان. وعان الەمنىڭ 57 مەملەكەتىنەن ەكى مىڭنان استام جازارمان قاتىستى. ال فيناليستەردىڭ قۇرامىنا 9 مەملەكەتتەن 13 اۆتور ىلىكتى. اسىرەسە, «ادەبيەت», «جاس اۆتورلار» جانە «بالالار ادەبيەتى» جانرلارى بويىنشا ايەل-قالامگەرلەر باسىم ءتۇسىپ وتىر. بۇل اتالعان سىيلىقتىڭ تاريحىندا بۇرىن-سوڭدى بولماعان وقيعا-تىن.
اتاپ ايتساق, «ادەبيەت» اتالىمىندا ء«ومىردى ءسۇيۋ» نوۆەللاسىمەن ليۆاندىق اقىن الاۆيا سوبح, «جولاۋشىلار زالى» شىعارماسىمەن ەگيپەتتىك اۆتور ەززات ەل-كامحاۆي مەن «ينايات ال-زايات ىزىمەن» اتتى رومانمەن يمان مەرسال باق سىناسۋدا. ال «بالالار ادەبيەتى» بويىنشا ءباا جازۋشىسى ناسيبا الوزايبي ماروككولىق رادجي مالاحا مەن تۋنيستىك ميزۋني بانناني شىعارمالارى سىنعا تۇسۋدە.
بۇل ماراپاتتىڭ تاعى ءبىر جاڭالىعى, 2021 جىلدان باستاپ كورشىلەس رەسەيلىك قالامگەرلەر ەكى نوميناتسيا بويىنشا («اراب مادەنيەتى» جانە «اۋدارما») ۇسىنىلا الادى.
ءار جانرداعى سىيلىق يەگەرلەرىنە مامىر ايىندا وتەتىن ماراپاتتاۋ راسىمىندە 750 مىڭ ديرحامدى (204181 اقش دوللارى) قۇرايتىن قارجىلاي سىياقى تابىستالماق. ال «جىلدىڭ مادەني تۇلعاسى» اتالىمىنداعى لاۋرەات 1 ميلليون ديرحامعا يە بولادى. سونداي-اق «بالالار ادەبيەتى», «جاس اۆتور» جانە «ادەبيەت» نوميناتسيالارىنىڭ شورت-پاراعىنا ەنگەن قالامگەرلەر كىتاپتارىنىڭ باسقا تىلدەرگە اۋدارىلۋىنا بەرىلەتىن گرانتقا قۇقىلى. «ادەبي جانە كوركەم سىن» جانە «ۇلتتىڭ دامۋىنا ۇلەس» اتالىمدارى بويىنشا جەڭىمپازدار الداعى اپتالاردا بەلگىلى بولماق.
ايتا كەتەيىك, شەيح زايد اتىنداعى كىتاپ سىيلىعى اراب الەمىنىڭ, اراب مادەنيەتى مەن ءداستۇرىنىڭ ءھام اراب ادامىنىڭ كوركەم شىعارماداعى بولمىس-بەينەسى ءۇشىن ۇيىمداستىرىلادى. ءتىپتى تەرەڭدەسەك, ارينە, مۇنىڭ بارلىعى رۋحاني ءىلىمنىڭ قانات جايىپ, ۇلت ادەبيەتىنىڭ دامۋى ماقساتىندا جاسالىپ وتىر.
بايقاساق, اراب ادەبيەتىنىڭ ءبىر كەڭىستىگىن قالىپتاستىرعان ماراپاتتىڭ داڭقى جىلدان-جىلعا دۇنيە ءجۇزىنىڭ تۇكپىر-تۇكپىرىنە اسىپ جىعىلۋدا. ءتىپتى, بيىلعى ۇمىتكەرلەردىڭ اراسىندا ايەل اۆتورلاردىڭ كوش باستاپ تۇرۋى دا اراب قوعامىنىڭ ءبىر جەتىستىگى سەكىلدى.
