ەكونوميكا • 02 ءساۋىر، 2021

كاسىپورىن اشىلسا، جۇمىسسىزدىق ازايادى

ەلدەگى ءتيىمدى ساياساتتىڭ ناتيجەسىندە شىمكەنتتە شاعىن جانە ورتا كاسىپكەرلىكتىڭ كوكجيەگى كەڭەيىپ كەلەدى. الەۋمەتتىڭ ءال-اۋقاتىن كوتەرەتىن اۋقىمدى جوبالار جىل وتكەن سايىن جەمىس بەرىپ، شاھار رەسپۋبليكاداعى كاسىپورىنى كوپ وڭىرگە اينالۋدا. سوڭعى جىلدارى وتاندىق ءىرى كومپانيالاردىڭ بىرەگەيى NURTAU distribution company جشس مەن «كازتەحنيكاس» جشس-نىڭ شىمكەنت نارىعىنا ەنۋى، قالا اۋماعىندا ءوندىرىس وشاقتارىن سالۋى سونىڭ دالەلى بولسا كەرەك.

نۇرشات توكەن

بۇگىندە جىلىنا نارىققا 1 ملن-نان استام شوكولادتى كامپيت وندىرەتىن كاسىپورىن «تاسساي» يندۋستريالى ايماعىندا ورنالاسقان. شوكولادتى كامپيت جانە ساعىز وندىرۋمەن اينالىساتىن زاۋىت 1،2 گەكتار اۋماقتى الىپ جاتىر. 2019-2020 جىلدارى قۇرىلىسى قىزۋ جۇرگەن كاسىپورىن بيىل 60 ازاماتتى جۇمىسپەن قامتىپ، تولىقتاي ىسكە قوسىلىپ وتىر. جاڭا كاسىپورىننىڭ وندىرىستىك قۋاتى جىلىنا 1،15 ملن دانا شوكولاد كامپيتىن، 1،8 ملن دانا ساعىز كامپيتىن قۇرايدى. سونداي-اق مەكەمەنىڭ قازاقستان رەسپۋبليكاسىنىڭ بارلىق قالاسىندا وكىلدەرى، ساۋدا كومانداسى مەن الاڭدارى بار. كومپانيانىڭ نەگىزگى تۇتىنۋشىلارى جاسوپىرىمدەر بولعاندىقتان، «وربيت» ەمەس، ساعىز كامپيتتەر ساتىلادى. 12 ءتۇرلى اسسورتيمەنتى بار. مىسالى، الما، بانان، تاڭقۋراي دامىمەن ۇسىنىلادى. بۇل كامپيتتەر مەن ساعىزدار شىمكەنتتە وندىرىلەتىن بولعاندىقتان، شەتەلدىك بالامالارىنان 10 پايىزعا ارزان.

ونىمدەر MEXXI اتاۋىمەن شىعارىلىپ، جەرگىلىكتى بازارلار مەن بارلىق دۇكەننىڭ سورەلەرىنە تاراتىلادى. 70 پايىزى ىشكى نارىقتا، 30 پايىزى ەكسپورتقا جونەلتىلەدى.

ايتا كەتەرلىگى، مۇنداعى ماماندار جاڭا جابدىقتا جۇمىس ىستەۋ ءۇشىن ارنايى وقىتۋدان وتكەن. الداعى ۋاقىتتا كومپانيا جۇگەرىدەن جاسالعان، كارامەل جانە تاياقشاداعى قاتتى كامپيتتەر وندىرەتىن جەلىلەردى ىسكە قوسپاقشى.

«تاسساي» يندۋستريالى ايماعىندا ورنالاسقان تاعى ءبىر ءىرى كاسىپورىن – «كازتەحنيكاس» جشس. مۇندا جارىقديودتى شامدار وندىرىلەدى. «بيزنەستىڭ جول كارتاسى-2020» باعدارلاماسىمەن يندۋستريالى ايماقتان 1،5 گەكتار جەر بولىنگەن. قۇنى 500 ملن تەڭگەنى قۇرايتىن بۇل جوبا 2020 جىلى باستاۋ الىپ، بيىل ىسكە قوسىلدى. قازىر مەكەمەدە 25 قالا تۇرعىنى جۇمىس جاسايدى. زاۋىت جىلىنا 20 مىڭ دانا جارىقديودتى شام وندىرۋگە قاۋقارلى. شامداردىڭ ساپاسى وندىرىلگەننەن كەيىن سۋ ىشىندە 5 مينۋت تۇرادى دا، كەيىننەن ىسكە قوسۋ ارقىلى تەكسەرىلەدى ەكەن. ياعني سۋعا توزىمدىلىگى انىقتالىپ بارىپ، ساتىلىمعا شىعارىلادى. سونىمەن قاتار مۇندا تەمىر سورەلەر دە جاسالادى.

ءوندىرىس ورنى الداعى ۋاقىتتا مەملەكەتتىك قولداۋ ارقىلى ءونىم كولەمىن ۇلعايتىپ، ەكسپورتقا شىعارۋدى جوسپارلاپ وتىر.

شىمكەنت