– اتاپ ايتقاندا, وبلىستاعى اۋرۋحانالار 4 مرت, 12 كومپيۋتەرلىك توموگرافيا, 41 رەنتگەن اپپاراتىمەن قامتىلدى. بۇعان قوسا اۋرۋحانالاردا 669 وتتەگى كونتسەنتراتورى, 1 514 پۋلسوكسيمەتر, 267 وكپەنى جاساندى جەلدەتۋ اپپاراتى بار. سەگىز اۋرۋحانادا وتتەگى ستانساسى ىسكە قوسىلدى, – دەيدى ق.ابداليەۆ.
ونىڭ مالىمەتىنشە, جەدەل مەديتسينالىق جاردەم ستانساسىنىڭ اۆتوپاركى تولىق جاڭارتىلىپتى. قازىر بۇل ستانسادا «103» قىزمەتىنە تۇسكەن شاقىرۋعا باراتىن 113 ارنايى كولىك پەن 7 جىلجىمالى مەديتسينالىق كەشەن بار.
وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ اقپاراتىنا قاراعاندا, پتر-تەست جۇرگىزەتىن 15 زەرتحانا جۇمىس ىستەپ تۇر. بۇل زەرتحانالاردا بىلتىرعى ناۋرىزدان بەرى جۇرگىزىلگەن پتر-تەست سانى 827 مىڭعا جەتىپ وتىر. قازىر تاۋلىگىنە 8 300 پتر-تەست زەرتتەۋىن جۇرگىزۋگە بولادى. ال بيىلعى ناۋرىزدا كوروناۆيرۋس ينفەكتسياسىنا قارسى 95 مىڭ پتر-تەست الىنىپتى.
الايدا وبلىستىڭ باس مەملەكەتتىك سانيتار دارىگەرى مادەنيەت تاناۋوۆ كوروناۆيرۋس ينفەكتسياسىنىڭ ءورشۋى ءالى باسەڭدەمەگەنىن جەتكىزدى. ونىڭ مالىمەتىنە سۇيەنسەك, قاۋىپتى ۆيرۋس ناۋقاسپەن جاقىن قارىم-قاتىناستا بولۋدان 22,5%, قوعامدىق كولىكتە جۇرۋمەن بايلانىستى 7,2%, ادامدار كوپ جينالاتىن ورىندارعا بارعاننان 26,9%-عا ارتقان. ال ۆاحتالىق كەنتتەردە جۇمىس ىستەيتىندەر اراسىندا, تۇراتىن جەرىندە جۇقتىرۋ 43%-دى قۇراپ وتىر.
– جىل باسىنان بەرى 6 546 رەيدتىك تەكسەرۋ وتكىزىلىپ, 27 296 نىسان قامتىلدى. مونيتورينگتىك توپتار 213 قۇقىق بۇزۋشىلىقتى انىقتادى. ال ناۋرىزدا انىقتالعان 64 قۇقىق بۇزۋشىلىققا قاتىستى شاعىن جانە ورتا بيزنەس نىساندارىنا, جەكە تۇلعالارعا 3 ملن 853 مىڭ تەڭگەنىڭ 49 ايىپپ ۇلى سالىندى. بۇل ايدا ادامداردىڭ وتباسىلىق شارالارعا كوپتەپ قاتىسۋىنان كوروناۆيرۋس ينفەكتسياسى 18 پايىزدان 26,9 پايىزعا جوعارىلادى, – دەيدى م.تاناۋوۆ.
ال وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ اقپاراتىنا قاراعاندا, 1 اقپاننان بەرى سپۋتنيك V ۆاكتسيناسىنىڭ ءبىرىنشى كومپونەنتىن 3 600 ادام سالدىرىپتى. ال, ەكىنشى كومپونەنتىن 1 255 ادام الىپ وتىر. ەكى ايدا ۆاكتسينا سالدىرعانداردىڭ اراسىندا 1 611 مەدقىزمەتكەر, 1 413 پەداگوگ, 486 پوليتسەي بار. سونداي-اق مەملەكەتتىك قىزمەتتىڭ 42 وكىلى ۆاكتسينا سالدىردى. ەندى بۇگىن, 2 ساۋىردە سپۋتنيك V ۆاكتسيناسىنىڭ تاعى دا 3 600 دوزاسى جەتكىزىلمەك.
اتىراۋ وبلىسى
