ءبىلىم • 01 ءساۋىر، 2021

ەلوردادا بۇگىننەن باستاپ 1-سىنىپقا قۇجات قابىلداۋ باستالدى

نۇر-سۇلتان قالاسى ءبىلىم باسقارماسىنىڭ ورىنباسارى باعلان سماتاەۆا بۇگىننەن باستاپ 1 تامىزعا دەيىن 1-سىنىپقا قۇجات قابىلداۋ باستالاتىنىن ايتا كەلە ەرەكشە ءبىلىمدى قاجەت ەتەتىن بالالاردى قابىلداۋ قالاي جۇزەگە اسىرىلاتىنىن ءتۇسىندىرىپ ءوتتى، دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.

Marzhan Tileubekova

«1 ساۋىردەن باستاپ ءبىرىنشى سىنىپقا قۇجاتتاردى قابىلداۋ باستالىپ، وسى جىلدىڭ 1 تامىزىنا دەيىن جالعاساتىنىن ايتىپ كەتكىم كەلەدى. اتا-انالار قۇجاتتارىن «ەلەكتروندىق ۇكىمەت» پورتالى ارقىلى بەرە الادى»، دەيدى ءبىلىم باسقارماسى باسشىسىنىڭ ورىنباسارى باعلان سماتاەۆا.

ونىڭ ايتۋىنشا ءبىرىنشى سىنىپقا مىناداي قۇجاتتار قاجەت:

- اتا-انادان ءوتىنىش;
- بالانىڭ تۋ تۋرالى كۋالىگى;
- دەنساۋلىعى جونىندە انىقتاما ( № 063/ۋ جانە № 026/ۋ-3 فورماسى)
- بالانىڭ ۇشتە ءتورت فوتوسى ەكى دانا.

«ال ەرەكشە ءبىلىمدى قاجەت ەتەتىن بالالاردى قابىلداۋ اتا-اناسىنىڭ كەلىسىمىمەن پسيحولوگيالىق-مەديتسينالىق-پەداگوگيكالىق كونسۋلتاتسيانىڭ قورىتىندىسى نەگىزىندە جۇرگىزىلەتىنىن اتاپ وتكىم كەلەدى. سونداي-اق سانيتارلىق نورمالاردى ساقتاي وتىرىپ، مامانداندىرىلعان ءبىلىم بەرۋ ۇيىمدارىنا كونكۋرستىق ىرىكتەۋ 1-20 ماۋسىم ارالىعىندا وففلاين (تەستىلەۋ) رەجيمىندە وتەدى، ال وتىنىشتەردى قابىلداۋ 1 ناۋرىز بەن 15 ءساۋىر ارالىعىندا ەرەجەگە سايكەس سايكەس وتەتىنىن حابارلايمىز»، دەيدى ۆەدومستۆو باسشىسىنىڭ ورىنباسارى.

ال قوسىمشا ءبىلىم بەرۋ ۇيىمدارىندا وقۋ پروتسەسى اتا-انالاردىڭ وتىنىشتەرىنىڭ نەگىزىندە 10 ادامنان اسپايتىن كەزەكشى توپتاردا ساعات 09:00-18:00-گە دەيىن الدىن الا جازىلۋ بويىنشا دا جالعاسادى.

«جالپى ءبىلىم بەرەتىن مەكتەپتەر جانىنداعى قوسىمشا ءبىلىم بەرۋ ۇيىمدارى فيليالدارىنىڭ قىزمەتىنە تىيىم سالىندى، فيليالدار تەك جەكە ورنالاسقان ءۇي-جايلاردا جۇمىسىن جالعاستىرۋدا»، دەدى ول.

سونداي-اق اتا-انالار بارلىق سانيتارلىق نورمالاردى قاتاڭ ساقتاي وتىرىپ، ءبىرىنشى سىنىپقا قۇجاتتاردى قاعاز تۇرىندە ۇسىنا الادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز