جيىندا 2021 جىلعا ارنالعان جۇمىس جوسپارى پىسىقتالدى.
قالالىق كوميسسيانىڭ توراعاسى ەرجان باباقۇماروۆ قر پرەزيدەنتى قاسىم-جومارت توقاەۆتىڭ 2020 جىلدىڭ 24 قاراشاسىنداعى «ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا تۋرالى» جارلىعىنا سايكەس كوميسسيا جۇمىسى كەڭەستىك كەزەڭدەگى ساياسي قۋعىن-سۇرگىن قۇرباندارىنىڭ بارلىق ساناتتارىنا قاتىستى تاريحي ادىلدىكتى قالپىنا كەلتىرۋدى كوزدەيتىنىن اتاپ ءوتتى.
قالالىق كوميسسيانىڭ قۇرامىنا تانىمال تاريحشىلار, عىلىمي ينستيتۋتتار مەن قوعامدىق ۇيىمداردىڭ وكىلدەرى ەنگەن.
«بۇل كوميسسيانىڭ جۇمىسىن دۇرىس جۇرگىزۋ ءۇشىن ادىسنامالىق كوميسسيا قۇرىلدى. نۇر-سۇلتان قالاسىندا ورتالىق كەڭسە اشىلدى. ءبىر اپتا بۇرىن الماتىدا وسى كەڭسەنىڭ وكىلدىگى اشىلدى, ونىڭ بازاسىندا ءبىزدىڭ قالامىزدا ورنالاسقان سەگىز جۇمىس توبىنىڭ وكىلدەرى جينالىپ, پىكىر الماستى. بۇل ءۇردىس الداعى ۋاقىتتا دا جالعاسىن تابادى. مەملەكەتتىك كوميسسيا توراعاسىنىڭ بۇيرىعىمەن قازىرگى ۋاقىتتا رەسپۋبليكادا ون ءبىر جۇمىس توبى جۇمىس ىستەيدى. سونىمەن قاتار, ءار وبلىس ورتالىعىندا جۇمىس توپتارى بار», دەدى ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, تاريح عىلىمدارىنىڭ دوكتورى, پروفەسسور زيابەك قابىلدينوۆ.
جيىنعا سونداي-اق, تاريح عىلىمدارىنىڭ دوكتورى, پروفەسسور, ۇلتتىق عىلىم اكادەمياسىنىڭ اكادەميگى حانگەلدى ءابجانوۆ, ساياسي قۋعىن-سۇرگىنگە ۇشىراعان قازاقستاندىق ينتەلليگەنتسيانىڭ مۇراسىن زەرتتەيتىن «ارىس» قورىنىڭ توراعاسى عاريفوللا انەس, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ كافەدرا مەڭگەرۋشىسى, ت. ع. د. باۋىرجان جانعۇتدينوۆ, قر پرەزيدەنتى مۇراعاتى ديرەكتورىنىڭ ورىنباسارى قايرات الىمعازينوۆ, ورتالىق مەملەكەتتىك مۇراعات ديرەكتورىنىڭ ورىنباسارى ءمارزيا جىلىسباەۆا, الماتى قالاسى مەملەكەتتىك مۇراعاتىنىڭ ديرەكتورى ابزال بوتانوۆ قاتىستى.
