«اتا مەكتەبى» – جاستاردىڭ اتا-اناسىن اۋىلدا قالدىرىپ, وقۋعا, جۇمىس ىستەۋگە, تابىس تابۋ ءۇشىن قالاعا كەتۋگە ءماجبۇر بولاتىنى تۋرالى قويىلىم. الايدا ۋ-شۋى مول قالانىڭ اسەرى مە, الدە البىرتتىق پا, اۋىلدان وكشە كوتەرگەن جاستىڭ دەنى جارىق دۇنيەگە اكەلگەن اتا-اناسىنا حابارلاسۋدى ۇمىتاتىنىن قايتەرسىڭ؟ ءتىپتى كىندىك كەسكەن اۋىلىنا بارمايتىندار كوپ. بۇل – كۇندەلىكتى ومىردە قالىپقا اينالعان ءۇردىس. وسىنىڭ ءبارى ساحنادا اتا مەن نەمەرەنىڭ بەينەسىندە كورىنىس تاپتى. قالا بالاسى اۋىلدا وتكىزگەن قىسقا مەرزىمدە اتاسىنىڭ دانالىق ۇلاعاتىنا قۋانا زەيىن قويادى. پايدالى اقىل-كەڭەس الىپ, دومبىرادا ويناۋدى ۇيرەندى. باقشاداعى جۇمىسقا كومەكتەستى. قالاداعى اتا-اناسىنا ورالار ساتتە اتاسىن قۇشاقتاعان نەمەرە تاعى دا كەلۋگە ۋادە بەردى.
– اعا بۋىن – وتباسىلىق قۇندىلىقتار مەن ءداستۇردى ساقتاپ, كەيىنگى ۇرپاققا جەتكىزەتىن التىن كوپىر. بالا تاربيەسىندە ماڭىزدى ءرول اتقارادى. اتا-اجەنى ەشبىر مەكتەپ تە, بالاباقشا دا الماستىرا المايدى. سول سەبەپتەن, ءبىز اۋىلداعى قارت اتا-انانىڭ بالالارىنا, نەمەرەلەرىنە دەگەن ساعىنىشىن, ونەگەلىك ۇلاعاتىن كورسەتۋدى كوزدەدىك. قاريالار قاراشاڭىراقتى تاستاپ, بالالارى تۇراتىن قالاعا قونىس اۋدارعىسى كەلمەيدى. كەيدە ءوزىم دە الىس اۋىلداعى اتا-انامدى ويلاپ, مۇڭايىپ قالامىن. بۇل – ءومىر. دەسەك تە, ەڭ باستى ويدى – اتا-انانى جالعىز قالدىرماۋدى كورەرمەنگە جەتكىزە الدىق, – دەيدى دراماتۋرگيا اۆتورى
ب.زينۋللين.
اكادەميالىق دراما تەاتردىڭ ديرەكتورى بەرىك جامەنوۆتىڭ ايتۋىنشا, اتىراۋدا قۋىرشاق تەاترىن اشۋ يدەياسى وسىدان بىرنەشە جىل بۇرىن تۋىنداعان ەكەن. الايدا ونى ىسكە اسىرۋعا بالالارعا ارنالعان دراماتۋرگيانىڭ كەنجەلەپ قالعانى قولبايلاۋ بولعان.
– وڭتۇستىك وڭىردەگى قۋىرشاق تەاترىنىڭ ارتىستەرىنىڭ قازاق دالاسىنان وزگە ەلگە قۇلدىققا ساتىلعان بەيبارىس سۇلتاننىڭ بالالىق شاعى تۋرالى جازىلعان راحىمجان وتارباەۆتىڭ «ساعىنىش ءشوبى» اتتى پەسانى ساحنالاعانىنا كۋا بولعان ەدىم. سول سپەكتاكلدەگى كورىنىستەر جۇرەك قىلىن قوزعاپ جىبەردى. مۇنداي تەاتردى اتىراۋدا اشۋعا بولماي ما؟ بۇل تۋرالى تەاترىمىزدىڭ ارتىستەرىنە ۇسىنىس ايتىپ ەدىم. ولار قۋىرشاق تەاترىن اشۋ باستاماسىن بىردەن قولدادى, – دەيدى بەرىك جامەنوۆ.
ونىڭ ايتۋىنشا, بولاشاقتا الماتى مەن اقتوبە قالالارىنداعى قۋىرشاق تەاترلارىنىڭ ماماندارىن, ارتىستەرىن شاقىرۋ جوسپارلانىپ وتىر. جاس كورەرمەندەرگە ارنالعان قويىلىمدارعا بالالار دا قاتىستىرىلادى.
اتىراۋ وبلىسى
