ء«تورتىنشى توقسان 1 ساۋىردەن باستالىپ, 25 مامىرعا دەيىن جالعاساتىن بولادى. قالاداعى كارانتيننىڭ كۇشەيتىلۋىن بايلانىستى قالانىڭ بارلىق مەكتەپتەرى مەنشىك نىسانىنا قاراماستان قاشىقتان وقيتىن بولادى. مەكتەپ ءبىتىرۋشى 9,11-سىنىپتاردا وقىتۋ ارالاس فورماتتا: پاندەردىڭ 70%-ى ءداستۇرلى فورماتتا, 30%-ى قاشىقتان وتەدى. سىنىپتا 15 بالادان ارتىق وقۋشى بولماۋى كەرەك جانە اتا-انالاردىڭ وتىنىشتەرى بويىنشا ۇيىمداستىرىلادى», دەپ اتاپ ءوتتى نۇر-سۇلتان قالاسى ءبىلىم باسقارماسى باسشىسىنىڭ ورىنباسارى باعلان سماتاەۆا.
باعلان سماتاەۆانىڭ ايتۋىنشا, 10 ناۋرىزدان باستاپ تاۋەلسىزدىك سارايىنىڭ بازاسىندا ۇلتتىق بىرىڭعاي تەستىلەۋ وتۋدە.
«بۇگىنگى تاڭدا 7 567 وقۋشىنىڭ 490-ى تەستىلەۋدەن ءوتتى. ۇبت ماۋسىم ايىنىڭ سوڭىنا دەيىن جالعاسادى. 9-سىنىپ وقۋشىلارى ءۇشىن قورىتىندى اتتەستاتتاۋ 28 مامىر – 7 ماۋسىم ارالىعىندا 3 پاننەن: قازاق, ورىس جانە انا تىلدەرى, ۇلتتىق مەكتەپتەگى قازاق جانە ورىس ءتىلى مەن ادەبيەتى, ماتەماتيكا, الگەبرا بويىنشا ءبىلىم جانە عىلىم مينيسترلىگىنىڭ ۇسىنىمدارىنا سايكەس جازباشا نۇسقادا وتەتىنىن اتاپ وتەمىز. ال 11-سىنىپ وقۋشىلارى ءۇشىن 1-10 ماۋسىم ارالىعىندا قازاق, ورىس جانە انا تىلدەرى, الگەبرا جانە اناليز باستامالارى پاندەرىنەن جازباشا تۇردە, قازاقستان تاريحى, قازاق جانە ورىس تىلدەرى تەستىلەۋ تۇرىندە وتەدى. 9, 10, 11, 12 – سىىپتاردىڭ ءبىلىم الۋشىلارىن قايتا اتتەستاتتاۋ 11-20 ماۋسىم ارالىعىندا وتەدى», دەيدى ول.
